Agege 2 - BUK OBAŊA ACIL AME OLWOŊO NI BAIBUL AME OGEO LOKO I LEB LAŊO

¹ Polo kede lobo rik oketo otum kite-nono, kede jami ducu ame tye iye.

² Obaŋa ogiko ticcere ame rik otio i nino me abiro, eka te weo i nino me abiro i tic ducu ame rik en otio.

³ Obaŋa te miyo nino me abiro gum, omio obedo acil, pien i nino-nono en Obaŋa rik owe iye i ticcere ducu ame en obedo tiyo i keto lobo.

⁴ Man en kite ame polo kede lobo ocakere kede i kare ame oketogi iye. I nino ame Rwot Obaŋa rik otio iye polo kede lobo,

⁵ yattoro me tim onwoŋo mom ru tye i lobo, kit lummoro daŋ onwoŋo mom ru otu; pien Rwot Obaŋa onwoŋo mom ru omio kot ocwe i lobo, dano ame puro lobo daŋ onwoŋo pwod pe,

⁶ ento ekuna te cako duny malo, bido wi lobo ducu.

⁷ Rwot te cweyo dano kede apua me lobo, okuta yamo me kwo i wume, dano te doko gin ame tye kede kwo.

Poto ame oyiko i Eden

⁸ Rwot Obaŋa te yiko poto i Eden tuŋ kide, te keto iye dano ame en ocweo.

⁹ Eka Rwot Obaŋa te miyo kwon yen ducu abeco me anena kede me acama tu i lobo, kede yat me kwo daŋ i dye poto, kede yat me poko gin aber kede gin arac.

¹⁰ Kulo ame onwoŋo mol ya iyi Eden kelo pii i poto, yie te, pokere i kuno, te doko kulo aŋwen.

¹¹ Me agege omano lobo Kavila ducu, kan ame tye iye jabu, nyiŋe Picon.

¹² Jabu me lobo-nu beco; odok yat ame olwoŋo ni bedola onwoŋo tye iye, kede gweŋ onik.

¹³ Kulo me aryo, omano lobo Kuc luŋ, nyiŋe Gikon.

¹⁴ Kulo me adek ame mol dok tuŋ kide me Acuria, Tigiric. Kulo me aŋwen, nyiŋe Efurate.

¹⁵ Rwot Obaŋa okwanyo dano te keto i poto me Eden, me en pur dok gwoki,

¹⁶ Rwot Obaŋa te ciko dano ni, “Yen ducu ame tye i poto itwero camo giri aboŋo lworo,

¹⁷ cite yat me poko gin aber kede gin arac, kur icam, pien i nino ame ibino camo iye, ibino to.”

¹⁸ Rwot Obaŋa te dok kobo ni, “Pe ber dano ibedo kene; abino tiyo ŋat ame konye ame oporre pire.”

¹⁹ Rwot Obaŋa te cweyo leyi ducu me tim kede winy ducu a twarre malo kun cweo kede lobo. Eka te kelogi baŋ dano me nen kite ame ebino cako kede nyiŋgi; doŋ nyiŋŋoro ducu ame dano ocakki gin akwo acel acel, doko doŋ nyiŋe.

²⁰ Dano ocako nyiŋ leyi ducu me paco, kede winy a twarre malo, kede leyi me tim; cite ŋat ame myero kony dano ame oporre pire onwoŋo pwod pe.

²¹ Rwot Obaŋa te miyo nino mako waŋ dano atek meicel; i kare ame en onino, Rwot Obaŋa te kwanyo amara mere acel oko, te mwono kakare kede riŋo.

²² Amara mere ame Rwot Obaŋa okwanyo-nono, otio odoko dako, te kelo baŋ dano.

²³ Dano te kobo ni, “Man en cogo ame oya i cogona, kede riŋo me riŋo koma. Obino lwoŋe ni Dako, pien okwanye i kom Ico.”

²⁴ Man en gin omio dano weko pappere kede tottere, te moko i kom dako mere, gin aryo ote doko kom acel.

²⁵ I karenaca ico kede dako mere onwoŋo tye onoro, lewic gire onwoŋo mom makogi.