2 Tamuwen 9 - Ala Wone Peenok Peebi Mbanak

Ndawut nen Mepibotet obeelom eeppereegerak wone

¹ Ne ambi paga at Ndawut nen ari logonet, “Yonatan nimbirak kunik wonogogurak me, at eeppukwak Tawun apuri mendek ineenik ambi wonogwe kenok, abuwa nen obeelom eeppikit nduk, yinip o.”

² Ari nagagerik, Tawun apuri mendek inayeloman endage Tiba aret wonagagerak me, Ndawut wonage me woraawak nduk, wiireegwaarak wage mbareegi, aap endagembogut Ndawut nen at yoge, “Kat Tiba aret ilik?” Yoge mbareegi, at Tiba nen, “Kayeloman an aret o, nogoba.”

³ Yoge mabreegi, at endagembogut nen at yoge logonet, “At Ala aakumi inabuwa nen obeelom eeppiige menggi kwak, an Tawun apuri wiganak mendek ambi wonogwe iyo, inabuwa nen obeelom eeppiyaakit nduk, yo'niru o.” Yoge mbareegi, at Tiba nen aap endagembogut nogo yoge logonet, “Yonatan aput iyok maluk agagerak nogo perak, wonage o.”

⁴ Yoge mbareegi, aap endagembogut nen, “At eebe nggeeme wonage o?” Yoge mbareegi, at Tiba nen, “Aap Amiyen aput Makit ame o Lorebat time wonage o,” yinuk, yoreegerak.

⁵ Yoge mbareegi, aap endagembogut Ndawut nogo nen wonok woraawak nduk, awuri nappiyareegerak nogo nogogwaarik, aap Amiyen aput Makit nogo ame o Lorebat wonage me, wonok wogogwaarak.

⁶ Wonok wogo mbareegwa, Yonatan aput Mepibotet nogo Ndawut owagam wage nagagerik, abu'me tebe yinuk, ayuk wuke kagak, at Ndawut nen, “Mepibotet wae.” Yoge mbareegi, at Mepibotet nen, “Ai, nogoba. Kayeloman an aret o,” yoreegerak.

⁷ Yoge mbareegi, at Ndawut nen at yoge logonet, “Kat kogoba Yonatan nimbirak niniki kunik wonagagirak paga kabuwa nen obeelom eeppagakit nduk, wiigigirak me, kagabiti mbarugun o. Obeelom eeppagage logonet, kombo Tawun anggween nogo abok waganogo kat wokkege logominggirik, kat nimbirak yime mondok logonet, ninom mbi nonggo logogun o,” yoreegerak.

⁸ Yoge mbareegi, at Mepibotet eebe tebe yinuk, yoge logonet, “Ai, nogoba. An kayeloman yi, abu meek lombok nggeewo kambak kwak wonage neegak, nonggop nduk, liippanegen o?” yinuk, yoreegerak.

⁹ Yoge mbareegi, aap endagembogut nen Tawun ayeloman Tiba nogo wiige nagagerik, wage mbareegi, yoge logonet, “At Tawun nogo apuri inom inanggween eege, inayi mendek ndi mendek eege, abok aret kat kogoba ombooluk Mepibotet muk wogogirak me,

¹⁰ kat inom, kapuri inom, kayeloman mini inom, kogoba Tawun ombooluk Mepibotet ake yabu eeppiigo logonet, amendek ambi lek kenok kolage logowak nen, anggen yugu nogo wonok iri wogo logomunggup o. Ndi, kogoba ombooluk Mepibotet nogo, mbi nengge logorak perak, an nimbirak mondok-mondok nonggo logogun o,” yinuk, yoreegerak. At Tiba nogo apuri ineebe 15, ndi, ayeloman mini ineebe 20, wonogogwaarak.

¹¹ At Ndawut nen wone nogo Tiba yoge mbareegi, at Tiba nen aap endagembogut yoge logonet, “Ai, nogoba. Kat nen an kayeloman yo'nege keenok, abok aret an kayeloman ndak-ndak aret eeke logokit o,” yoreegerak. Ti yoge mbareegi, aap Mepibotet nogo, aap endagembogut Ndawut apuluk negen aret imbirak mbi nonggo nogogwaarak.

¹² At Mepibotet nogo apuluk wulaga endage Mika aret. Ndi, it aakumi Tiba ame wonogwe nogo abok aret Mepibotet ayeloman mini a'nuk wonogogwaarak.

¹³ Togop aret me, at Mepibotet nogo iyok peenok-peenok maluk aret me, o Yerutalem time logonet, aap endagembogut mbi nengge menggim time inom mondok-mondok mbi nengge nagagerak.