2 Tamuwen 20 - Ala Wone Peenok Peebi Mbanak

At Teba iniki mi'nagagerak wone

¹ Ti eekwi eyom paga aap Mbeniyamin mendek Mbikiri aput ndugwi iyak wuka endage Teba, time wonage me, at nen oone nggwok eeka trompet nogo, oone pu eeke nagagerik, wone ari logonet, “At Ndawut nen nit ambi eeppinangge, Aap Itayi aput nen nineyate wo'nirage, Eerigin lek aret me, Aakumi Iterali yi wae. Kinalitak lombok kinawooliyana nanip o.”

² Yorage mbareegi, it aap Iterali mendek nogo abok aret at Ndawut mbo punuk, aap Mbikiri aput Teba nogo mugurok nogwe iigak, it aap Yekura mendek nogo perak, yi Yoraran kuli nen inowe endagembogut inom perenak aret o Yerutalem wogogwaarak.

³ At Ndawut nogo iyokan awi o nggwok abe wurik Yerutalem nogome abu aret wage nagagerik, wonage logonet, at akuwi ayeloman mendek wogo 10 o nggwok abe wurik arum logowak nduk piinok wundeegerak nogo, waganogo o ambime mambiige nagagerik, inarum logowak nduk, aap ambi mippege, inambi nonggo logowak nduk, wogorage, eereegerak kwe, inom nogo yega'lek kumi nanu wonogo mengga kwak o nogome keele maarak negen logonet, kambit nogo nogogwaarak.

⁴ At akuwi ayeloman mini mendek wogo nogo ti, eerogo piige nagagerik, aap Amata yoge, “Yogondak ilik, ko'lu ilik, ata, ko'lukwak a? it aap Yekura mendek neya woraawak nduk, yorage logomenggendik, kinom aret wa'nu o.”

⁵ Yoge mbareegi, at Amata nogo it aap Yekura mendek yoranet nagagerak kwe, at Ndawut nen, “O ne yi paga woraanu o,” yoreegerak nogo paga waga'lek mbareegi,

⁶ at Ndawut nen Abitayi yoge logonet, “At Abatalom nen maluk eeppinanegerak kwe, at Mbikiri aput Teba yi perak, maluk nggwok lombok eeppinaniyak, mbake logomenggerik, o kota yugum pak tiyarogon wurik me, kwaappunuk, nit nen pigookwak, mbaganit unggwi nage kero, kinogoba an nawuri wogoren kinom at mugurok nanip o,” yoreegerak.

⁷ Yoge mbareegi, aap Abitayi nogo nen aap Yowap awuri inom, it aap Kereti mendek inom, Peleti mendek inom, aap wakaa'ngget inom, abok aret o Yerutalem nen wogoren wundi nanuk, aap Mbikiri aput Teba nogo mugurok nogogwaarak.

⁸ Mugurok nogo nogogwaarik, yugum nggwok o Nggibeyon paga taati ari nogogwaarak me, at Amata nogo iniya wagagerak. Iniya wage mbareegi, at Yowap nogo ayum wim eeke menggerak yirippunuk, agabee'le paga mbuti ndut awina yonggolak obate paga yirik Amata keyage wappikit nduk nage me, mbuti ndut nogo nggigik togon wangge mbareegi, eenggi pigaganeegerak.

^9-10 At Amata nogo, “Yowap mbuti ndut eenggim wonage nogo paga noorigin,” mbarulik we ugun wonage kagak, Yowap nen at yoge logonet, “Noreeluk, kat obeelom wonage ilik?” yinuk, agandin eyak mbanikit nduk, amboro eenggi abe paga pippunuk, mbuti ndut eenggim wonage nogo paga Amata aanogum paga ndanuk togon mambereegerak aanagale kiluk togon nggween paga wambeegerak aret kangge mbareegi, ambinom warulik mbo punuk, awuluk Abitayi imbirak aap Mbikiri aput Teba nogo mugurok nogogwaarak.

¹¹ Mugurok nogwe iigak, at Yowap awot wim nambuka ambi nen Amata eebe warak me taati mi'ndak logonet, it inom nogwe nogo yorage, “Kit nen Yowap inom, Ndawut inom, kinom ariyak mbakwi kenok, at Yowap mugurok nanip o.”

^12-13 Yorage nagagerik, at Amata warak amiya nogo paga ndenen warak tu nggwok paga taati wonage me, it Yowap awuri inigen loogo mbareegwa, at Yowap awot nogo nen, “Amata eebe warak nogo abok aret inigen loogwi yi, tayorogon pi na,” yinuk, eebe waganogo tu ambet paga nen tayorogon yabume pi nanuk, yum lenggembereegerak. Yum obaga lenggembege mbareegi, it Yowap awuri abok aret at Yowap nen aap Mbikiri aput Teba mugurok nage me, inom mugurok nogogwaarak.

¹⁴ Ndi, at Teba nogo nen it aakumi inanebunu Iterali mendek wonogo menggam inom, it aakumi Mbikiri mendek wonogo menggam inom, abok aret kuwak eegiren o kota Aben-Mbet-Maaka nogome unggwi nagagerak wonage me,

¹⁵ eebe pigaawok nduk, at Yowap awuri abok aret inom nogo nogogwaarik, o Aben-Mbet-Maaka oonda mbanuwok nduk, eeko logonet, nggween kabunogo yugum yagat pak wurik eraanu pit laganggo nogogwaarik, yugum pak wurik langguk yuwak nduk, punggagak eeko mbareegwa,

¹⁶ kwe ambi iniki warak o kota time mendek nen ari logonet, “Wologwe yi wae. Kinaruk o. At Yowap ti, an nimbirak wone mbanikit nduk panggo yi woraayok o.”

¹⁷ Ari mbareegi, Yowap nogo owagam nage mbareegi, at kwe nogo nen Yowap yoge, “Kat Yowap aret ilik?” Yoge mbareegi, Yowap nen, “E o! An Yowap aret o.” Yoge mbareegi, at kwe nogo nen, “An kayeloman wone yokkege yi, karuk konenu o.” Yoge mbareegi, Yowap nen, “Naruk konengge me, yo'niru o.”

¹⁸ Yoge mbareegi, at kwe nogo nen ari logonet, “It aap aa'nduk nen eeriyak ambi ineenggo'lek kenok, O Aben yokkiraawak nduk, nanip o, yorogwe iinok, koneni wogo nagaatik, Wone ti abu aret konenggo o, yinuk, yogo nogogwaarak o.

¹⁹ It kota-kota Iterali inalom nit niname o kota Aben yi, nit aakumi niniki ugun tayenak wone yugu li'lak aret eeko monggom at Aliku ALA eyate kwak nggween wo'niragagerak yi, nonggop nduk lek eerogo kambe me yonggoliyak nduk, eeke agandik?”

²⁰ Yoge mbareegi, at Yowap nen onggo yoge logonet, “An o yi, lek eerogo nambe me yonggoliyak nduk, niniki koombunuk woroolik o.

²¹ Ata, an mugurok wagarak nogo ti, aap ambi puut nggelok-nggobok o Eparayim mendek Mbikiri aput Teba Ndawut imbirak wim agaarak nogo, o kota yime wagaarak kenok, mugurok wogoorak me, kat nen wo'nege kenok, an o yime nen aret name naakit o.” Ari mbareegi, at kwe nogo nen ari logonet, “At anobak mbanak yugum pak wurik yi paga nen mbo wunggiri woraakit o.”

²² Yoge nagagerik, at kwe iniki warak nen wone kooneegerak nogo, aakumi yora nage mbareegi, aap Mbikiri aput Teba nogo enggaanok mbanogo anobak at Yowap owagam mbo wunnogo mbareegwa, at Yowap nen oone nggwok eeka trompet oone pu eeke mbareegi, at awuri nogo o kota ti, mbo punuk, iname inalitak lombok nogwe iigak, at Yowap nogo aap endagembogut o Yerutalem wonage me ka wagagerak.

At Ndawut inom yabu eeko nogogwaarak wone

²³ Aap Yowap nogo ti, aap Iterali ineegin warak abok aret inowe wonage, aap Yoyara aput Mbenaya ti, it aakumi Kereti mendek inom, Peleti mendek inom, inowe inarum wonage,

²⁴ aap Aroram ti, aap yabu eeriyak oone omaawi paga lengganogo yorage, aap Akilut aput Yotapat ti, Ndawut ame nogome wone ambi age kenok liiru mbangge,

²⁵ aap Teya ti, o apit lambunik ake liiru mbangge, aap Tarok Abiyatat imbirak Ala unde wonogwe,

²⁶ ndi, aap Yayit mendek endage Ira ti, Ala unde logonet, Ndawut ake koongge, eeko nogogwaarak.