2 Tamuwen 14 - Ala Wone Peenok Peebi Mbanak

Yowap nen Abatalom iyokan woraawak nduk, eereegerak wone

¹ At Ndawut nen, “Naput Abatalom nenegen kaakit lak, ao,” mban mbake wonage nogo, kwe Teruya aagaluk aap Yowap nen yelok kage nagagerik,

² kwe ambi iniki ngget o Tekowa time wonage me wa nawak nduk, aap ambi nappereegerak kwe nogo wonok wage mbareegi, Yowap nen kwe nogo yoge logonet, “Kwe yi wae! Aakumi inayum abe mendek yikkologwe, ngguu'mo wappunuk amburu inagabolo paga mbenanggologwe, eeka'lek aap kanggwi iinok, inerabun ndoombunuk, netik-netak inale yogo mengga kwak, kat pilit togop aret eeppunuk,

³ aap endagembogut ka unggwage logomenggendik, wone yogop yorumunggun o,” yinuk, wone li'luk eerogo yoreegerak.

⁴ Li'luk eerogo yoge mbareegi, kwe o Tekowa mendek nogo aap endagembogut owagam nage nagagerik, etenggen nggween paga wanduk yinuk, ayuk wuppunuk yoge logonet, “Nogoba o. Kat kendagembogut aret me, an yeenggwa nirenok nduk wagi o.”

⁵ Yoge mbareegi, aap endagembogut nogo nen, “Kat nano wone yo'nenok nduk wagan o?” Yoge mbareegi, at kwe nogo nen, “An nogonggelo kambeegerak me, nanu aret agarik o.

⁶ Ndi, an kayeloman naagalogwe ti, aap mbere aret kwe, ne ambi paga imbirak yabume wuk eekkologwe me, aap ambi ogoorinaburak lek me, at ambi nen at ambi wakerak aret kanggerak o.

⁷ Ndi, yogondak at wulaga kanggerak owe-awot abok aret an kayeloman ineebi nomba'nuk yo'nogo logonet, Wulaga wakerak ti nen, ogoba eyate kolookwak awuluk ane'me warogo puwok nduk, wo'niret o, yinuk, yo'nogo agaarik o. Yo'nugwi nogo kani kunik ambiriluk kere ari wonage nogo, wogoraminggirak nogonogo pugwi iinok, nogonggelo endage inom, it ndarak inom, o nggween paga yime inendage ki logorak nogo lek ariyak me, nonggop eeriyak o?”

⁸ Yoge mbareegi, at endagembogut Ndawut nen kwe nogo yoge logonet, “Wone yagandak ti, an nen kake wone koonogo yoraagin me, kame nak o.”

⁹ Yoge mbareegi, kwe o Tekowa mendek nogo nen ambinom yoge logonet, “Nogoba o. Kat kendagembogut aret me, wone koonemenggendak irip me ninggin age kenok, kendagembogut keebe inom, kendage tiyanak menggerak inom, ti paga maluk arigin lek o. Ata, an inom, niriwi inom, ninoba aret arigin o.”

¹⁰ Yoge mbareegi, aap endagembogut nen at yoge logonet, “Aap ambi wone ti mendek yokkege kenok, yogop-ndogop ambinom yokkege logokwak, nggarurogon aret wonok nowagam wa'nu o.”

¹¹ Yoge mbareegi, kwe nogo nen ari logonet, “It aakumi nen oreeluk warak nogo amee'nggo oreeluk eenik wonage nogo waremenggaarak paga maluk nggwok wigak yukwak, non mbambiyaawak nduk, kat nowe kendagembogut at Aliku kogoba Ala endage kumbunuk yu o.” Yoge mbareegi, at Ndawut nen yoge logonet, “Kaagaluk ti, eeruwak ambiriluk ambi wiirogo nggween yi paga wuppugun lek o, yinuk, at eenik menggerak Aliku ALA endage paga yokkigi o.”

¹² Yoge mbareegi, kwe nogo nen ari logonet, “Ai, nogoba. Kat kendagembogut aret me, an kayeloman wone mbuuluk ambi yuurak mbake me, Op aret, yo'nirumunggun ilik?” Yoge mbareegi, at Ndawut nogo nen, “Yu o, niri.”

¹³ Yoge mbareegi, at kwe nogo nen, “Kapuluk mugogo nappegendak nogo wonok woroolik me, wone yagandak yi paga kenggali age ilik, lek a? Nonggop nduk nit Ala apuri yi, togop eeppinanit nage logorak, koonogo pegendak?

¹⁴ Niyo toolak kilirogo punuk, waganogo tookulik nogo kokwak, nit abok aret kambugun kwe, at Ala nen aakumi inooriyak nduk, koonggeelik o. Aakumi mbo piigaatak nogo kobak aago logokwak, wogoren piya wage menggerak o.

^15-16 Ndi, yogondak nowe kendagembogut an wone kat yokkiriyak nduk wagarak yi, it aakumi apit an nagabiti ariyak nduk eekwi iinok, an kayeloman niniki koongge logonet, an inom, naagaluk inom, Ala nen nineyate wo'niragagerak nogo, aap ambi nen ndinggolaakit nduk, ninooriyak koongge nogo, nowe endagembogut yoriminggirak aruk konengge logomenggerik, an kayeloman eenggime nen nagap ndariyak op aret, mbake nagarik, wagarak o.

¹⁷ Ala ayonggo malayikat nen maluk eeriyak obeelom eeriyak abok eenu menggerak ndak-ndak, nowe kendagembogut kat aret me, koone yagandak ti paga niniki kwippanegen o, nogoba. Togop me, at Aliku kogoba Ala kimbirak aret logogin o.”

¹⁸ Yoge mbareegi, aap endagembogut nogo nen kwe nogo yoge logonet, “An ambi yokkiriyak mbakirak me, yokkege neenok, kumaariyak mage kinom paga aret yo'niru o.” Yoge mbareegi, kwe nogo nen, “Kat nowe kendagembogut aret me, yo'niru o.”

¹⁹ Yoge mbareegi, aap endagembogut nen at yoge logonet, “Wone yo'negendak abok aret at Yowap nen yokkege kenok, yo'niri wagandak nogo lek a?” Yoge mbareegi, at kwe nogo nen, “Kat nowe kendagembogut wone ari keenok, eegu melak yuurak meek me, wone yokkigirak yi abok aret at kayeloman Yowap nen, Ndogop yu o, yinuk, an kayeloman ninikime manake mbaki, yokkiri wagarak me, kat nowe kendagembogut wonage keegak pilit lek abet aret yokkigi o.

²⁰ Ala ayonggo malayikat ambi yi wone ndi wone abok eenu menggi kwak, kat nogoba kiniki warak lombok logonet, yi o ndi o arit wage menggerak abok aret keenu me, at kayeloman Yowap eekerak nogo ti, kaput kimbirak ogoorak wonogwe nogo kinawone koonogo pinagarak, mba'nuk, yo'negerak o,” yinuk, yoreegwaarak.

²¹ Yogo nogogwaarik, aap endagembogut nen Yowap yoge logonet, “Kat kiniki koonggendak ti op aret me, an eerikit nen aap Abatalom wa nage logomenggendik, kimbirak wa'nu o.”

²² Yoge mbareegi, at Yowap nen etenggen nggween paga wanduk yinuk, ayuk wuke logonet, ale'nggen aap endagembogut nogo oba pereegerak. Ale'nggen oba punuk, yoge logonet, “An kayeloman yokkigirak nogo kat nowe kendagembogut eerikit mbakendak ti paga o yogondak an kayeloman kiniki kunik ee'nake nogo neenu aga o,” yoreegerak.

²³ Yo'nuk, at Yowap nogo o Nggetut nage nagagerik, Abatalom nogo wonok o Yerutalem wagagerak.

²⁴ Wonok wage mbareegi, aap endagembogut Ndawut nen ari logonet, “Abatalom ti, an nenggaawak paga ya'i unggwi woraagurik o. Ame nugwa aret nayok o.” Yoge mbareegi, aap endagembogut wonage me ungguulik nugwa ame aret nagagerak.

Abatalom Ndawut imbirak lambuneegwaarak wone

²⁵ Aap Abatalom nogo ti, iyok ogut kuli nen nok-nok anobak kuli awinde-obaande aago lek abu kigirikwe lombok kenok, it aakumi nen pi wako nogogwaarak nogo kokwak, aakumi Iterali inenggela'me togop ambi logolik aret.

²⁶ At Abatalom nogo eeruwak nggorek me aaninggin age kenok, tahun ambit eeppunuk mbanggak eeke nagagerak. Ndi, eeruwak mbanggetak aaninggin ti, aap endagembogut aaninggin wakkogo menggaarak nogo paga wakkage logonet, aaninggin mbere eeppunuk, ambi oolo paga age nagagerak.

²⁷ At Abatalom nogo obaane'me apurilogwe wologwe ineebe kenagan ndaganake, ndi, kolaga ambit endage Tamat aret ndake, eereegerak. Kolaga nogo ti, tawe age nagagerik, abu kigirikwe lombok aret wonagagerak.

²⁸ Aap Abatalom nogo o Yerutalem wonage logonet kwe, at Ndawut imbirak lambungga'lek kagak, tahun mbere eereegerak.

²⁹ Tahun mbere eeppunuk, ne ambi eyom paga at Abatalom nen aap Yowap nogo aap endagembogut yori nawak nduk, wiireegerak kwe, eebi nen woroolik puk agagerak. Ti'nuk, peebi ambinom mban wiireegerak kwe, eebi nen woroolik puk age mbareegi,

³⁰ Abatalom nogo nen ayeloman mini yorage logonet, “Wologwe, kinaruk logonip o. An neyabume abeenok time aap Yowap eyabu aret me, waabuk negen jelai yarak ti, kani pi nanip o.” Yorage mbareegi, ayeloman mini nogo nen kani pi nogogwaarak.

³¹ Pi nogo mbareegwa, at Yowap nogo Abatalom ame nage nagagerik, yoge logonet, “Nonggop nduk kat kayeloman mini nen an neyabu yarak me kani mbelanogo pegaarak?”

³² Yoge mbareegi, at Abatalom nen Yowap yoge, “An wone yokkege me, karuk logot. An o Nggetut time op aret wonage me, yime nano eeriyak nduk, wo'neren wagandak? Aap endagembogut yori nanok nduk, Woraayok o, yinuk, eerogo nappigirak kwe, kat nonggop nduk woroolik? An nen aap endagembogut Ndawut pekka naakit o. Pekka nage neenok, an maluk ambi eekirak paga nooriyak mbake kenok, nooriyak op aret o,” yinuk, yoreegerak.

³³ Yoreegerak nogo at Yowap nen aap endagembogut nogo yori nage mbareegi, aap endagembogut nen at Abatalom wiireegerak owagam wage nagagerik, endobanggun yindumbunuk, etenggen nggween paga wandinik wonage me, aap endagembogut nogo nen keyage wake logonet agandin eyak mbaneegerak.