2 Tamuwen 13 - Ala Wone Peenok Peebi Mbanak

Aap Amonon nen kolaga Tamat nogo awuluk kagak maluk eeppereegerak wone

¹ Ti'nuk peebi, ne ambi paga at Ndawut aput Abatalom awuluk kolaga abu kigirikwe endage Tamat aret me, Ndawut aput Amonon nogo nen kolaga Tamat nogo iniki nengge nagagerak.

² Kolaga nogo aap kigin waka'lek awuluk aret wonagagerak me, at Amonon nogo nen, “Nonggop eeppunuk, eerikit,” mbarit unggwage logonet, eebe andi negen eekkolagagerak.

³ Eerak wonage me, Ndawut oweeluk Timeya aput Yonarap, Amonon oreeluk nogo, iniki ngget abok li'lak eenu me,

⁴ Amonon yoge logonet, “Noreeluk wae. Kat aap endagembogut aput aret kwe, ko'lu-kii'me ketenggen puru aago mban wonage keege ti, nonggop nduk o? An yo'niru.” Yoge mbareegi, Amonon nen at yoge logonet, “An noreeluk Abatalom awuluk kolaga Tamat ti aret niniki nenet unggwage logonet, ee'nake agaarik o.”

⁵ Yoge mbareegi, Yonarap nen Amonon yoge logonet, “Kat pilit andi negen a'nuk, nogo yege menggenom winnari nak o. Windak wonage me, kogoba pekkeya unggwage kenok, at yoge logonet, Ai, nogoba. Nawuluk Tamat ti, nenegen neegak, nake mbi worarogo wo'nege kenok, naakit nduk, lari woroorak, Ao, mbake agarik o, yinuk, yorumunggun o,” yoreegerak.

⁶ Yoge mbareegi, at Amonon nogo andi negen eekko'nok nogo yege menggim winnagagerak wonage me, at ogoba endagembogut Ndawut nogo pekka unggwage mbareegi, at yoge logonet, “Nogoba o. An nawuluk kolaga Tamat nogo nenegen neegak, eenggi paga nen mbi kuwe ombat tele worarogo wo'niruwak nduk, woroorak, Ao, mbake agarik o,” yoreegerak.

⁷ Yoge mbareegi, at Ndawut nen aap ambi yoge logonet, “Kolaga Tamat an nawi o nggwok abe wurik me wonage nogo, oweeluk Amonon ame wage logomenggerik, mbi worarogo wogoruwak nduk, yori nak o,” yinuk, nappereegerak.

⁸ Nappereegerak yori nage mbareegi, kolaga Tamat nogo oweeluk Amonon ame wage nagagerik, at Amonon windak enegen wonage kagak, at kolaga nogo gandum yigirik wappunuk, amok mbanogo worappereegerak.

⁹ Worappunuk, nggiginogo oweeluk wogoreegerak mendek, noorak eebi nen mbo pereegerak. Mbo pege nagagerik, “Aakumi abok aret wundi nanip o,” yoragagerak wundi nogo mbareegwa,

¹⁰ at Amonon nen kolaga Tamat nogo yoge, “Kat nen an wo'nege keegak, naakit nduk, nake worakendak nogo, wonok an nogo yege minggim yime unggwi mok o.” Yoge mbareegi, at Tamat nen worarak nogo wonok oweeluk nogo yege menggim wonage me unggwi nagagerak.

¹¹ Unggwi nage nagagerik, nawak nduk, wogoge kagak, at Amonon nen kolaga nogo pippunuk yoge logonet, “Nawuluk o. Kat nimbirak nogo yuwok o.”

¹² Yoge mbareegi, kolaga nogo nen, “Mage ubi, noweeluk! Nit aakumi Iterali togop eekulik me, an neebi mbake neegak, kat an noweeluk nen maluk togoti eeppaniyak mage o.

¹³ Togop eeppanege keenok, an nonggop eerigin o? Nenggali nen nggeeme kumaa'nari nagin? Ndi, kat kunduk nonggop eerumunggun? It aakumi Iterali inenggela'me aap wi wonogwe nogo pogom logomunggun o! Togop me, kat an wo'naburak mbake keenok, ninogoba endagembogut, Mage, yokkirigin lek, E, aret yokkirigin me, yori nak o.”

¹⁴ Yoreegerak kwe, aruk konengga'lek at omaawi ambik me, kolaga nogo eebi mbake kagak, maluk aret eeppereegerak.

¹⁵ Wulaga nogo nen kolaga maluk eeppege nagagerik, eebi lombok mbareegerak. Maluk eeppega'lek kagak inikilom nggwok mbareegerak nogo lek age logonet, eebi mbake nogo abu nggwok lombok age nagagerik, anini nen at yoge logonet, “Ya logogun! Mbet-mbet aret wundi nak o.”

¹⁶ Yoge mbareegi, at kolaga Tamat nen ari logonet, “Lek o, noweeluk. Kat an maluk eeppanggendak nogo ti, we mbuuluk negen kwe, yogondak, Wundi nak, yo'nege ti, maluk nggwok aret yo'nege me, togop yo'niriyak mage o, noweeluk.” Yoreegerak kwe, at Amonon nogo kolaga Tamat ari nogo aruk koneniyak eebi mbake logonet,

¹⁷ wulaga eyabu eeke menggerak nogo wiige nagagerik, yoge logonet, “Kolaga yi, wumbege logomenggendik, tu omaawi eeru o.”

¹⁸ Yoge mbareegi, wulaga nogo nen kolaga Tamat nogo wumbege nagagerik, tu omaawi nggelenogo pereegerak. Ti eyom paga it komologwe aap yo'nggok inapurilogwe aap kigin waka'lek kenok inayum nggorek abu kigirikwe yiriko nogogwaarak me, at Tamat nogo ayum togop aret yirik kagak wumbege mbareegi,

¹⁹ ayum kigirikwe nogo nibinogo pege nagagerik, wun anobak paga yumbunogo patinuk, eenggi anobak paga tebenggo'nok, oone nggwok paga le agan nagagerak.

²⁰ Le agan nage nogo oweeluk Abatalom kage nagagerik, at yoge logonet, “Koweeluk Amonon nen kat maluk eeppagagerak kenok, agan wage a? At koweeluk nen aret maluk eeppagagerak kenok, kat nawuluk kiniki ambi koonggak yuurak mage o. Ata, koone lek puk aru o.” Yoge mbareegi, at Tamat nogo oweeluk Abatalom ame time nage nagagerik, iniki puru aago alik aret wonagagerak.

²¹ At Amonon eereegerak nogo, ogoba endagembogut Ndawut aruk konengge nagagerik, anini ambik agagerak.

²² Ndi, at Abatalom perak, awuluk Tamat at Amonon nen maluk eeppereegerak paga, “Maluk eekendak, obeelom eekendak,” wone ambi Amonon yoga'lek we anini mban mbake nagagerak.

Abatalom anini teyok togon Amonon wappunuk mbaganeegerak wone

²³ Ti'nuk, tahun mbere eeppunuk, it aap Abatalom aanggumi ineeruwak mbanggo menggaarak nogo aanggumi ineeruwak mbanuwak nduk, o Eparayim koorok o Mba'an-Katat time kuwak eeri nogogwaarak wonogwe iigak, at Abatalom nen at ogoba endagembogut apuri abok aret nawak nduk,

²⁴ aap endagembogut owagam woraanuk, yoge logonet, “Nogoba wae. Naanggumi ndomba ineeruwak mbanuwak nduk, kuwak eeri nagaarak wonogwe me, kat inom, kinom eeke menggendak inom, namunggup nduk, kinayonggo wagio.”

²⁵ Yoge mbareegi, at ogoba endagembogut nogo nen Abatalom yoge logonet, “Ti yagandak kwe, meek o, naput. Nit abok aret noorak kenok, aaninggin eerogo pagukwak, nit abok aret noorak lek o.” Yoreegerak kwe, at Abatalom nogo oone nabenak mban yoreegerak mendek at ogoba nen noorak eebi mba'nuk, “Kit mban ee'nu o,” yinuk, ale'nggen oba pereegerak.

²⁶ Ale'nggen oba pereegerak kwe, kagak at Abatalom nen ogoba yoge, “Kat noorak meek kenok, noweeluk Amonon ninom nawok nduk, E, yo'niru o.” Yoge mbareegi, at ogoba nen, “At nano eeriyak nduk kinom noorak?”

²⁷ Yoreegerak kwe, at Abatalom nogo oone nabenak mban yoge mbareegi, at Ndawut apuri nogwe me, Amonon nogo inom nawak nduk, “E o,” yoreegerak.

²⁸ “E o,” yoge mbareegi, inom nogo nogogwaarik, at Abatalom nen ayeloman mini yorage logonet, “Wologwe wae! Kinaruk logonip o. At Amonon nogo anggur amburu nengge logomenggerik, iniki lek aremenggerak paga an nen, Warinip o, yokkirage neenok, At nen aret wariyak, yo'nirage me, waruwi o, yinuk, kinagabiti mbaka'lek kinogogumbuk eeppunuk, warumunggup o,” yinuk, yoragagerak.

²⁹ Ndi, yoragagerak nogo ndak-ndak aret warogo pogo mbareegwa, at Ndawut apuri eegu nogo abok aret inalitak lombok inaguda paga laganggo nogogwaarik, kole mbaganeegwaarak.

³⁰ Mbaganit wogwe iigak, aap ambi nen Ndawut yoge, “Kapuri nogo, at Abatalom nen abu tigitogon inookerak me, ineenik ambi wonogwe lek o, nogoba.”

³¹ Yoge mbareegi, aap endagembogut nogo mi'nage nagagerik, ayum nibinogo patinuk, nggween paga ngginnage mbareegi, at awuri eyabu eeko menggaarak inom taati wonogwe nogo kunduk, togop aret inayum nibinggologogwaarak.

³² Inayum nibinogo patinuk wonogwe me, at Ndawut oweeluk Timeya aput Yonarap nogo nen yoge logonet, “Nogoba wae. Kapuri nogo abok aret inookaarak mbarugun o. Ata, at Amonon nen kolaga Tamat Abatalom awuluk nogo, eebi mbake kagak maluk eeppereegerak paga at Abatalom nen, Warikit o, agan nege nagaarak me, at mban aret warogo pegerak o.

³³ Togop aret me, nogoba o. At Amonon alik mban kanggerak kagak, Kapuri abok aret kanggaarak o, yinuk, wone yokkiri wagaarak paga kinikime ndoguk yi unggwage mage o,” yoreegerak.

³⁴ Ti yori wogwe iigak, Abatalom nogo mbaganeegerak. Mbagangge kagak, at aap Ndawut arum menggaarak mendek ambi nogo nen enegen pila yinuk, aakumi apit aret puut Koronayim enggage paga nen wambit wogwe enegen iige nagagerik, at Ndawut nogo yori nage logonet, “Puut Koronayim paga nen aakumi ambik wambi wogwe iigi o.”

³⁵ Yoge mbareegi, at Yonarap nogo nen aap endagembogut nogo yoge logonet, “An kayeloman yokkigirak nogo kapuri abet aret wambi wogwe ti o,” yoreegerak.

³⁶ Wone awo yoge nagagerik, wonage me, aap endagembogut apuri nogo, le agan ka wogo mbareegwa, aap endagembogut inom, at inom yabu eeka inom, iniki puru yogo logonet, leenggu maareegwaarak.

³⁷ Ndi, at Abatalom nogo kole mbaganit o Nggetut aap endagembogut Amikut aput Talamayi wonage me nage kagak, at Ndawut nogo aput Amonon erabun ndoombunuk, aleenggu maake nagagerak.

³⁸ Ndi, at Abatalom nogo o Nggetut wonage kagak, tahun kenagan aret eereegerak.

³⁹ Aap endagembogut nogo Amonon kambeegerak paga iniki puru ari nagagerak nogo lek age mbareegi, “Naput Abatalom nenegen kaakit lak, ao,” mban mbake nagagerak.