1 Tamuwen 29 - Ala Wone Peenok Peebi Mbanak

It Pilitin mendek nen Ndawut ame nappi wogogwaarak wone

¹ It Pilitin mendek wim eeka nogo apit aret o Apek time kuwak eekwi, ndi, aakumi Iterali mendek nogo o Yiteren niyo eneerime koorok time inawooliya wukkologwe, eereegwaarak.

² Eeppunuk, wonogwe iigak, it aap Pilitin mendek inawuri ineegin warak nogo, ambi awuri ineebe 100, at ambi awuri ineebe seribu, inoweewi inendagembogut inom ndegen-ndegen inaa'nduk wogwe iigak, at Ndawut awuri inom aap endagembogut Akit nogo inom a'nuk, inambo'me wogogwaarak.

³ Wogo logonet, aap Pilitin mendek ineegin warak inoweewi nogo nen Akit yogwi, “Aakumi Iberani mendek yi, nonggop nduk kinom wogwe?” Yogo mbareegwa, aap Akit nen it yorage logonet, “Aap Iterali inowe endagembogut Tawun imbirak eeke nagagerak aap Ndawut nogo yi lek a? Aap Ndawut aret kwe, Tawun mbo punuk, neya wagagerak nimbirak wonage kagak, tahun ambi eereegerak kwe, at Tawun mbo punuk, neya wagagerak nen yogondak kuli yi, at maluk ambi eekerak an koolik aret o.”

^4-5 Yoragagerak kwe, it aap Pilitin ineegin warak inoweewi nogo nen at Akit nogo mberugo logonet, “It kumi Iterali mendek nogo nen kwirabik-kwirabok yogo logonet, Tawun nen ninawim apit negen inookerak kwe, At Ndawut nen inookerak nogo perak, ineenggi lingginiyak abu meek aret o, yinuk, Ndawut anep pereegwaarak eebe nogo yi aret lek a? At nogo yi aret me, at ninom a'nuk, wim namburiyak nineebi o. At ninom a'nuk wim namburi nogwe kenok, at Ndawut nen, Nogoba mbo panegerak nogo wo'naburak nanonggwan aga o, mba'nuk, melak togon nit ninawuri inooppunuk, inanobak mbanak wonok ogoba iri nookwak, at anggween wogoreeginom nogome iyokan nage logowak nduk nappet o.”

⁶ Yogo mbareegwa, aap Akit nen Ndawut wiireegerak wage mbareegi, yoge logonet, “Kat o maan an neya wagagindak nen yogondak kuli, maluk ambi eeka'lek logonet, kiniki abu koonak, aap abu obeelom lombok nawuri wim eeka kinom a'nuk, wim namburiyak op aret keegirak nogo, abet aret mbake logonok nduk, at eenik menggerak Aliku ALA endage paga yokkege kwe, it aap Pilitin mendek inendagembogut eegu nen perak, ineebi kombakwi me,

⁷ it aap Pilitin mendek inendagembogut yi nogo, abunuk inanini kombarukwak, ambi mbaaniiga'lek kiniki ugun kame aret namunggun o.”

⁸ Yoge mbareegi, at Ndawut nen, “An nano eekirak? Ndi, an kayeloman keya wagagirak nen nok, yogondak kuli, nano eekirak kwaa'neege nagandik, kat nogoba kendagembogut nen, An nawim ninom namburi noorak lek, yo'nege agandik?”

⁹ Yoge mbareegi, at Akit nen onggo yoge logonet, “It Ala yonggo malayikat mendek ninikilom mbake minggi kwak kat togop aret kombake minggirak ti, neenu aret kwe, it aap Pilitin ineegin warak inoweewi nogo nen, At ninom wim namburi noorak lek o, yagaarak me,

¹⁰ kit aa'nduk Tawun mbo punuk an neya wogotak nogo kineebe apit aret ko'lu o awo wigangge kagak, kineenik ogo logomonggotik, kiname aret namunggup o,” yinuk, yoreegerak.

¹¹ Yoge mbareegi, o ko'lu kuubondendok ineenik a'nuk, at Ndawut awuri inom iniyokan iname aakumi Pilitin menggam nogome nogwe iigak, it aap Pilitin mendek nogo o Yiteren wogogwaarak.