1 Tamuwen 23 - Ala Wone Peenok Peebi Mbanak

Ndawut nen aakumi Kekila mendek inagap ndareegerak wone

¹ Ne ambi paga aap ambi nen Ndawut yoge, “Aakumi Pilitin mendek o Kekila nogome wim nambuko logonet, gandum menenggo menggam anggen mbanak nogo abok aret kugun waganggwi iinok, yokkiri wagi o.”

² Yoge mbareegi, at Ndawut nen at Aliku ALA yoge logonet, “An aap Pilitin mendek ninom wim namburi noorak op ilik, lek a?” Yoge mbareegi, at Aliku ALA nen wone onggo yoge, “E o. Aakumi Kekila mendek inagap nda'nok nduk, it Pilitin mendek ti, kinom namburi nak o,” yoreegerak.

³ Yoreegerak kwe, it Ndawut awuri nen at yogo logonet, “Nit o Yekura yime logonet, ninookwi iyo, ninagabiti ambik mbakwi me, it aap wim nambuka Pilitin mendek ninom o Kekila wim namburi nogwe niinok ti, abunuk ninagabiti ambik ariyak me, noorak meek o,” yoreegwaarak.

⁴ Yogo mbareegwa, at Ndawut nogo Aliku ALA ambinom nggino yoge mbareegi, at Aliku ALA nen onggo yoge logonet, “Aap Pilitin mendek ti, an nen waganogo kineenggime pinagagin me, o Kekila time nanip o.”

⁵ Yoge mbareegi, at Ndawut awuri inom o Kekila unggwi nogo nogogwaarik, inom nambuko logonet, aap Pilitin mendek mondok iya lombok inoorogo piinok, inaanggumi kugun ko'nok wogwe, ndi, aakumi o Kekila mendek nogo inagap ndake, eereegerak.

⁶ Aap Akimelek aput Abiyatat nogo mbaganit at Ndawut o Kekila wonage me ka nage logonet, yum agale warak epod nogo eenggime wonok nagagerak.

⁷ Ndi, “At Ndawut nogo o Kekila wonage o,” yinuk, aap Tawun yogo mbareegwa, at Tawun nen ari logonet, “Ndawut o kota tungga pak narak me unggwi nagaarak ti, at alik en keele maarogo negen pakerak me, at Aliku ALA nen nanonggwan aret neenggime panegerak o.”

⁸ Ari nagagerik, Tawun nogo nen at Ndawut awuri inom o Kekila wonogwe me, inoori nawok nduk, awuri wim eeka nogo, “Woraanip o,” yinuk, kuwak eeppiyareegerak.

⁹ Awuri kuwak eeppiinok, Ndawut wariyak koongge nogo, at Ndawut eenu age nagagerik, aap Ala unde Abiyatat nogo yoge logonet, “Yum agale warak epod nogo wonok omok o.”

¹⁰ Yoreegerak wonok wage mbareegi, at Ndawut nogo nen ari logonet, “Kaliku Iterali inogoba Ala wae. An kayeloman yime wonage neebe paga at Tawun awuri inom nen, o Kekila yime wogo logomenggaarik, o kota yi lek eerogo puurak yegerak abet aret konenggirak me,

¹¹ At Tawun woraagin, an kayeloman konenggirak nogo ti, abet aret wage, ndi, it aakumi Kekila mendek nen an neebe waganogo at Tawun eenggime pugwi, eerugun ilik, lek a? yinuk, Kaliku Iterali inogoba Ala kat nen an kayeloman yi, yo'nenok nduk, kin wokkeegi o.” Yoge mbareegi, at Aliku ALA nen, “Tawun nogo woraagin aret o.”

¹² Yoge mbareegi, at Ndawut nen Aliku ALA ambinom yoge logonet, “It aakumi Kekila mendek nen an neebe inom, an nawuri inom, Tawun eenggime pugun ilik, lek a?” Yoge mbareegi, ne ambinom Aliku ALA nen wone onggo yoge logonet, “Kineebe eenggime pugun aret o,” yinuk, yoreegerak.

¹³ Yoge mbareegi, at Ndawut nogo awuri ineebe enam ratus negen inom o Kekila nogo mbo punuk, ambime nen ambime agak eerit nugu nogogwaarak. Ndi, Ndawut nogo o Kekila nen muk kole mbaganggerak, Tawun yogo mbareegwa, Tawun time wim eeri noolik puk agagerak.

Ndawut nogo o Tip karume wonagagerak wone

¹⁴ Ndi, at Ndawut nogo karume yugum ambe nggaganak me inom, puut nggelok-nggobok yugum pak wurogo pit nagagim o Tip karume inom, nogome kumaa'narit nege me, at Tawun nen netik-netak Ndawut kwaarit-mberaarit nege nagagerak kwe, Ala nen Ndawut eebe waganogo Tawun eenggime puulik.

¹⁵ Ti eyom paga at Ndawut karume Tip o Korep nogome wonage me, “At Tawun nen kat kooriyak nduk kwaakkake agaarik o,” yogwi nogo konembunuk, wonage me,

¹⁶ at Tawun apuluk Yonatan nogo nen, “Ndawut iniki Ala oba panggombunuk logowak nduk, iniki eyak wappi na o,” yinuk, at Ndawut o Korep time wonage me ka nagagerak.

¹⁷ Ka nage nagagerik, Yonatan nen at Ndawut yoge logonet, “An nogoba Tawun nen pikkabi woraagin abu lek o. Kat nimbirak Iterali inarum logonet, kat kendagembogut keegak, an kat kabu'me logorak nogo neenu aret o. Ndi, nogoba Tawun kunduk, eenu aret me, kagabiti mbarugun o,” yinuk, yoreegerak.

¹⁸ Yoge nagagerik, at Ndawut imbirak at Aliku ALA enggaanom paga wone abuk nggaruk togon kumbuk mbanggo nogogwaarik, at Ndawut o Korep time wonage kagak, Yonatan nogo ame aret wagagerak.

¹⁹ Ti'nuk, it aap Tip mendek ambi nen at Tawun o Nggibeya wonage me pekka wogo nogogwaarik, at yogo logonet, “At Ndawut nogo o karume o ame pa'nggwe puut Akila yugum pak wurogo pereegim o Koret nit wonogwe me time kiraarak wonage me,

²⁰ ninowe wae. Ne ndiyom paga piga noorak, mbake keenok, pigogo wokkiriyak nogo ti, nit ninobaalombok aret me, kat ninowe kendagembogut namunggun aret o.”

²¹ Yogo mbareegwa, at Tawun nen it yorage logonet, “Kit nabuwa nombakotak me, at Aliku ALA ale'nggen kinoba pinagage logowak o.

²² At aap ti, obaabut abu penenak lombok menggerak yo'nugwi me, at eebe nggeeme wonage? ndi, taamini nen inigen kogwe? eeko menggaarak nogo liippunuk, an yo'niri woraamunggup nduk, nanip o.

²³ At kumaa'narit nege menggim abok aret abu liippogo logomonggotik, wone lik togon wonok an yo'niri wogwe kiinok, an kit ninom nogo logomonggoorik, eebe wonage kenok, it aakumi Yekura ineebe ambik togon wonogwe inenggela'me iyok mugurok-magarok eerit pigaakit o,” yinuk, yoragagerak.

²⁴ Yorage mbareegi, at Tawun nogo peebi punuk, it iniyokan o Tip nogogwaarak. Ndi, at Ndawut awuri inom o karume nggwok nenaarogo pereegim o ame pa'nggwe o Mawon karume aap Yekura iname time wonogwe iigak,

²⁵ at Tawun awuri inom Ndawut kwaarit nugwi nogo Ndawut yogo mbareegwa, at Ndawut nogo yugum kole lunik karume o Mawon time puk ari nagagerak wonage me, at Tawun nogo konengge nagagerik, Ndawut mugurok o Mawon karume time aret nagagerak.

²⁶ Ndawut awuri inom puut abeenok time nggwe eraanu mbaganggwi, Tawun awuri inom puut ena peenok yime nggwe eraanu piginabuwok nduk panggo yi nogwe, eekwi iigak,

²⁷ aap ambi nen yonggo Tawun wonage me wage nagagerik, yoge logonet, “Aakumi Pilitin mendek nen ninawinda mbanggwi me, nit mbet-mbet togon aret nawi o.”

²⁸ Yoge mbareegi, at Tawun nen Ndawut mugurok nege nagagerak nogo mbo punuk, it aap Pilitin mendek inom wim namburuwok nduk, wagagerak me, ti eereegerak paga puut ti endage, Kole Mbaganggo Menggam o, yinuk, yogo nogogwaarak.

²⁹ Ndi, at Tawun nogo awuri inom wogwe iigak, aap Ndawut o time nen mbaganit o En-Nggeri nage nagagerik, yugum pak wurogo pit nagagim ndo nogome kumaa'narit nege nagagerak.