1 Tamuwen 18 - Ala Wone Peenok Peebi Mbanak

Ndawut Yonatan imbirak eereegwaarak wone

¹ At Ndawut nogo Tawun imbirak wone abu aret mbanggo mbareegwa, Yonatan nen at iniki kunik eekkolage menggi kwak, Ndawut nogo togop aret iniki kunik eeke nagagerik, imbirak iniki ambit aret eekkologogwaarak.

² Ne ti eyom paga aret Tawun nogo nen Ndawut ogoba wonage me, nawak nduk, nappuulik imbirak logokit nduk, teppereegerak.

³ Teppereegerak imbirak wonage me, at Yonatan nogo nen at iniki kunik eekkolage menggi kwak, Ndawut nogo togop aret iniki kunik eeke logonet, “Kat an nimbirak niniki-kiniki kunik logowok o,” yinuk, wone mondok abuk nggaruk togon kumbuk mbanogo pereegwaarak.

⁴ Kumbuk mbambunuk, at Yonatan nen ayum nggorek nogo nggoorogo at Ndawut wogoge nagagerik, ayum wim nambuke logonet yirike menggerak nogo inom, awooluwak inom, eegin-omaale inom, agabee'le inom, apit aret at mban wogoreegerak.

⁵ Ndi, at Tawun nen Ndawut, “Yogop eeri nak o,” yinuk, nappegetak nogo nage nagaatik, op mban ee'nuk wagak eeke kenok, at Tawun nen at ineegin warak inowe logowak nduk, mippereegerak. Mippege mbareegi, it aakumi Iterali mendek inom, at Tawun inom yabu eeko menggaarak inom, abok aret, “Op aret kogo o,” mbareegwaarak.

At Tawun nen Ndawut eebi mbareegerak wone

⁶ At Ndawut nen aap Pilitin mendek Nggoliyat nogo, wappunuk, it aap ineegin warak nogo iniyokan iname wogwe me, it kumi Iterali mendek o kota-kota Iterali wonogo menggam nogome nen abok aret Tawun inom lambuniyak nduk, wundi wogo nogogwaarik, inale'nggen nen ndawi wakwi, oone lobale eekwi, nggitat mendek kecapi oone eekwi, eeko logonet, kwirabik-kwirabok yogo nogogwaarak.

⁷ Yogo logonet, “Tawun nen ninawim apit negen inookerak kwe, At Ndawut nen inookerak nogo perak, ineenggi lingginiyak abu meek aret o,” yinuk, ndawi paga wako nogogwaarak.

⁸ Wakwi nogo at Tawun konengge nagagerik, anini nen iniki mi'nage logonet, “An nen inookirak kenok, mbereeluk yogwe, ndi, at Ndawut nen inookerak kenok, apit togon yogwe, eeko logonet, at endage tiyappugwi me, nendagembogut wonage yi, at aret oba age kagi,” mbake nagagerik,

⁹ ne ti eyom paga at Tawun nen Ndawut paga eebi lombok ombareegerak.

¹⁰ Ko'lu at Tawun nogo awooluwak eenggime ame wonage me, kugi maluk Ala nen nappi wagagerak nogo inikime lik yi unggwage mbareegi, aap kumili kunik yogo mengga kwak ari kagak, at Ndawut nogo nggitat negen eeke menggerak togo'nogo aret eeke me,

¹¹ at Tawun nen, “Ndawut kobat inom polok togon aret warikit o,” mbake nagagerik, awooluwak paga Ndawut wariyak nduk eereegerak mendek, Ndawut ne mbere paga molok togon woppateegerak.

¹² Ti eeke mbareegi, Tawun iniki mbake logonet, “At Aliku ALA nen an mbo paninuk, at Ndawut mban imbirak wonage kagi,” yinuk, agabiti mbareegerak.

¹³ Mbake nagagerik, Ndawut nogo aap ineegin warak ineebe seribu kuli inowe logowak nduk, mippege nagagerik, wim nggoguk ari kenok, awuri wogoret wim eeri nagak eeke logowak nduk, o ambime nappereegerak.

¹⁴ Nappege mbareegi, at Aliku ALA nen imbirak wonage me, yiru-ndiru nege logonet, eeriyak mbake nogo a'me nggelok mban eerit nage nagagerak.

¹⁵ At Ndawut a'me nggelok mban eerit nage nogo at Tawun enegen kage nagagerik, agabiti ambik mbake nagagerak kwe,

¹⁶ it aakumi Iterali mendek inom, Yekura mendek inom, nogo perak, abok aret at Ndawut nen wim nggoguk ari kenok, wogoren nege nagagerak me, Ndawut iniki kunik eeko nogogwaarak.

Tawun nen apuluk kolaga Ndawut wogoreegerak wone

¹⁷ Togop eeko mbareegwa, at Tawun iniki mbake logonet, “Ndawut ti, an neenggi paga nen warigin lek o. Ata, it aap Pilitin mendek nen aret waruwak,” mbake nagagerik, ne ambi paga at Tawun nen Ndawut yoge, “An napuluk kolaga manggu ndarak Merap nogo, kat kakwe kolaanok nduk, wokkirigin me, an nake wim wakaa'ngget a'nuk Aliku ALA awim ti mban nambuke logomunggun o.”

¹⁸ Yoreegerak kwe, at Ndawut nen Tawun yoge logonet, “An yi ta o? Ndi, nowe-nawot ti taani o? Aakumi Iterali inenggela'me nen an nogobamini kunduk ngge o? An aap abu meek aret me, nonggop togon aap kendagembogut karugelo ariyak nduk yo'negen o?”

¹⁹ Yoreegerak kwe, Tawun apuluk kolaga Merap nogo Ndawut wogoriyak eyom panggoni wage kagak, kolaga nogo aap alik ambi awi Mekola mendek endage Andiriyen kolaawak nduk, wogoreegerak.

²⁰ Wogoge mbareegi, Tawun apuluk kolaga Mikan nogo, Ndawut iniki pereneegerak me, Tawun yogo mbareegwa, at Tawun nen, “Koloorak op aret o,” mbareegerak.

²¹ Mbake nagagerik, at Tawun nen iniki koongge logonet, “An napuluk Mikan nogo, pagi keele pugu kwak Ndawut yilinogo kolamenggerak paga it aap Pilitin mendek nen waruwak nduk, wogorikit aret,” mbake nagagerik, at Tawun nen Ndawut yoge logonet, “Aa'nduk naru ariyak yokkigirak nogo lek agaarak me, ne yogondak yi paga kat naru ariyak op aret o,” yinuk, yoreegerak.

²² Yoreegerak kwe, “E,” yaga'lek kenok, awuri inom yabu eeko menggaarak wone yori nawak nduk, nappiige logonet, “Kit Ndawut wonage me nogo logomonggotik, alik me yogo logonet, Kat kowe endagembogut Tawun inom, awuri inom yabu eekwi nit inom, kat eerit nage paga ninikilom kombakoorak me, kat ninaru ariyak op aret, yorumunggup o,” yinuk, wone eerogo nappiyareegerak.

²³ Nappiyareegerak at Ndawut yori nogo mbareegwa, at Ndawut nen wone onggo yorage logonet, “Wone yi, aaninggin lek teeluk aret mba'nuk at endagembogut aru ariyak nombako logonet, yo'nogo ogotik? An aap neenggi lek nendage abu tebenak aret me, meek o.”

^24-25 Yorage mbareegi, at Tawun awuri inom yabu eeko menggaarak nogo nen Ndawut yereegerak nogo Tawun yori wogo mbareegwa, at Tawun nen Ndawut yori nawak nduk, wone ambinom yorage logonet, “Kat kowe endagembogut nen kolaga nogo awu puurak mbarulik o. Ata, at inom wim mbanak anini mbake nogo tayok yuwak nduk, it aap Pilitin mendek inayo ambiragap 100 kuli mbanogo niri woroorak kombakerak o,” yinuk, yori nawak nduk, nappiyareegerak.

²⁶ At Tawun wone yereegerak nogo, at awuri inom yabu eeko menggaarak nen Ndawut yori nogo mbareegwa, at Ndawut nen, “An nowe endagembogut aru ariyak op aret,” mbareegerak. Mbake nagagerik, kwe koloorak Tawun yereegerak nogo, eyom abu panggoni wage kagak,

²⁷ at Ndawut nogo owe endagembogut aru arikit nduk, awuri inom o Pilitin iname unggwi nogo nogogwaarik, aap Pilitin mendek ineebe dua ratus kuli inooppunuk, inayo ambiragap mbanogo aap endagembogut Tawun nggino yereegerak nogo ndak-ndak wogori wogo mbareegwa, at apuluk Mikan nogo akwe kolaawak nduk, Ndawut aret wogoreegerak.

²⁸ Wogoge nagagerik, at Tawun nen at Aliku ALA Ndawut imbirak wonage, ndi, apuluk Mikan nogo nen Ndawut iniki kunik lombok mbake, eekwi kage nagagerik,

²⁹ at Tawun nogo Ndawut paga abunuk agabiti mbake logonet, imbirak ogoorak mban kagak, kambuurak kuli aret ari nagagerak.

³⁰ Ndi, it Pilitin mendek ineegin warak inoweewi nen wim namburiyak nduk, wundi wogo nagaatik, Iterali inom wim eekwi iigak, at Tawun awuri inom nen we ambitak mban inookwi, ndi, at Ndawut awuri inom perak, ambik lombok inookwi, eeko nogogwaarak paga at Ndawut endage tiyak yereegerak.