1 Tamuwen 12 - Ala Wone Peenok Peebi Mbanak

Tamuwen nogo puk arikit nduk it Iterali inaruk wareegerak wone

¹ Ti'nuk, at Tamuwen nen it aakumi Iterali mendek abok aret yorage logonet, “Kit nen, Ninowe endagembogut ninarum logowak nduk, mippatuwok o, yinuk, nggino yo'nogotak nogo, naruk konengge nagarik, ndak-ndak aret kinake mippinagagirak me,

² at nen aret kinowe endagembogut logonet, kinarum logogin o. Ndi, an nogo, wulaga mbuuluk paga nen nok-nok, yogondak kuli, kinarum neegak, neebe aakelo age, neeruwak kenen wungge, ndi, napurilogwe kunduk, kit kinenggela'me ndarogo piige, eekirak yi, neyaanip o.

³ Ndi, yogondak at Aliku ALA inom, aap leenogo amburu kilippogotak inom, inenggaanom paga an mi'ndak wonage me, an maluk eeppinagage logonet, aap ambi aanggo lembu wagangge, aap ambi aanggo keledai wagangge, aap ambi wi-wi eeppege, aap ambi tebenogo pege logonet, noone omaawi yoge, aap ambi eekerak kagaarogo pikit nduk, wu wo'niri wage kenok wagangge, ti mendek ambi eeke neegotak nogo yo'nugwi kiinok, an nen obaane'me pikit nduk, yo'ninip o.”

⁴ Yorage mbareegi, it aakumi nogo nen wone onggo at yogo logonet, “Abu lek o, ninogoba. Kat nen wi-wi eeppinanege, tebenogo pinanege logonet, koone omaawi yo'nirage, ninamendek ugun wagangge, togop abu eeke logolik o.”

⁵ Yogo mbareegwa, at Tamuwen nen yorage logonet, “Kat maluk ambi eeppinanege logulik o, yinuk, at Aliku ALA enggaanom paga inom, aap leenogo amburu kilippogotak enggaanom paga inom, yo'nogotak ineenu me, it imbirak nen kinenggali wappinagago logonet yokkirogo logogun o.” Yorage mbareegi, it nen yogo logonet, “E o. Yogoorak nogo at Aliku ALA nen liippinanegerak me, at nen mban yo'nirage logowak o,” yinuk, yoreegwaarak.

⁶ Yogo mbareegwa, at Tamuwen nen wone ambinom it abok aret yorage logonet, “It Muta Karun imbirak at Aliku ALA nen aret leenogo mippiige nagagerik, kinombomini o Metit nen wogoren wundi wagagerak.

⁷ Togop aret me, kit inom, kinombomini inom, at Aliku ALA nen yokkiragagerak nogo a'me nggelok obeelom eeppinagage nagagerak nogo, lik togon yokkiraakit nduk, kit Aliku ALA enggaanom paga yime mi'nari woraanip o.”

⁸ Yoragagerak wogo mbareegwa, at nen it nogo yorage logonet, “Aap Yakup apuri inom o Metit nogogwaarak wonogwe me, aakumi Metit mendek nen it tebembiinok, wonogo mbareegwa, at Aliku ALA yeenggwaaraawak nduk, nggino yogo mbareegwa, Aliku ALA nen Muta Karun imbirak nappiyareegerak nogo nogogwaarik, kinombomini o Metit nen wogoren, o yime aret ye mbambatinuk logowak nduk, piya wogogwaarak.

⁹ Piya wogogwaarak kwe, it nogo nen at Aliku inogoba Ala nogo, kobak eerogo mbo pogo mbareegwa, Aliku ALA nen aap o Katot mendek ineegin warak inowe endage Titera aap Pilitin mendek nogo inom, aap Mowap mendek inowe endagembogut nogo inom, nen inooruwak nduk, ineenggime piige mbareegi,

¹⁰ it nen inoone nggwok paga Aliku ALA yogo logonet, Nit kat mbo paganuk, kobaane'me kugi Mba'an inom, Atitoret inom, mippunuk, mugurok nogo nogoorak ti, maluk lombok aret eekoorak me, yogondak it aap ninawim ineenggime nen ninagap ndarogo pinangge kenok, kat mban mukkeren wogo logogun o, yinuk,

¹¹ Aliku ALA yogo mbareegwa, at Aliku ALA nen aap Yeru-Mba'an inom, aap Mbarak inom, aap Yepata inom, an Tamuwen inom, nappinaneegerak ninawim ninaagan-ambokan wonogwe nogo, ineenggime nen ndinogo pinagareegurak paga kiniki ugun tayenak obeelom aret ogotik o.

¹² Togop aret kwe, it Amon mendek inowe endagembogut Nakat nogo nen kinooriyak nduk mukkeren wage kinigen kogo nogotik, at Aliku kinogoba Ala nogo ti, kinowe endagembogut aret kagak, mbo punuk, an yo'nogo logonet, Aap ambi endagembogut ninarum logowak nduk, ambi mippatuwok o,

¹³ yinuk, nggino yo'nogo nogotik, kinowe endagembogut miikkologotak nogo, at Aliku ALA nen mippinagagerak yi aret me, kinigen kaanip o.

¹⁴ At Aliku ALA nen, Yogop ee'nu ndogop ee'nu, yokkirage nogo, Nineebi o, yinuk, mbo pega'lek ayuk wuko logonet, at oone mban konembunuk eekwi, at mban mugurok nogwe, eeko logonet, at kinarum logowak nduk, kinowe endagembogut mippogotak nogo, kinom aret at Aliku kinogoba Ala mban mugurok nogwe kiinok, op aret logomunggup o.

¹⁵ Ndi, Yogop ee'nu ndogop ee'nu, yokkirage nogo konembunuk, eeka'lek mbo pugwi kiinok perak, kinombomini eeppiige nagagerak ndak-ndak, at Aliku ALA nen kit inom, kinowe endagembogut inom, maluk eeppinagage logogin o.

¹⁶ Yogondak at Aliku ALA nen kit kinenggaanom paga eerubok mendek iya tit ambi eerigin me, kinabolok lek kinigen mi'ndak logonip o.

¹⁷ O yogondak gandum anggen mbanggwi eyom nogo lek a? Mbanggwi eyom o kibi aret kwe, kit nen Aliku ALA mbo punuk, Aap ninowe endagembogut ambi mippinanu o, yogotak nogo ti, Aliku ALA enggaanom paga maluk nggwok eekotak kineenu arumunggup nduk, o ngguurubu eeke, mayu wuppi wage, eeruwak nduk, an nen at Aliku ALA yori o,” yinuk, yoragagerak.

¹⁸ Yorage nagagerik, at Tamuwen nogo nen Aliku ALA yoge mbareegi, ne ti eyom paga aret o ngguurubu eeke, mayu wuppi wage, eeke mbareegi, it aakumi abok aret Aliku ALA inom, Tamuwen inom, it paga inagabiti nen, “Ia!” mbareegwaarak.

¹⁹ Mbako nogogwaarik, it aakumi abok nen Tamuwen yogo logonet, “Nit ninomaluk aa'nduk eeko nogoorak wonage kagak, Aap ambi ninowe endagembogut logowak o, yinuk, nggino yokkogoorak nogo ti, maluk ambinom aret eekoorak me, nit kambukwak, kayeloman mini ninake at Aliku kogoba Ala yoru o.”

²⁰ Yogo mbareegwa, at Tamuwen nen wone onggo yorage logonet, “Kit maluk eekotak nogo ti, abet aret kwe, kinagabiti nen Aliku ALA oone ari nogo mbo pugup o. Ata, kiniki-kineebe abok aret Aliku ALA mban wogo'nuk, mugurok nogo logonip o.

²¹ Ala mbo punuk, obaane'me kugiwak inayuk wuko logonet, mugurok nogwe nogo inomaawi lek aret me, yeenggwa kirogwe, kinagap ndakwi, eekkinabugun lek kagak we aanom warogo mugurok nogwe me, mugurok nogo logorak mage o.

²² At Aliku ALA endage abu tiyanak lombok logowak nduk at Aliku ALA nen inikilom kinombake logonet, apuri iniki kundugu lombok eekkinabeegerak me, mbo pinagagin mondok lek o.

²³ Ndi, an nen perak, kit kinake Aliku ALA yoge lek neenok ti, Aliku ALA maluk eeppuurak aret me, kinake tamban eeke, ndi, obeelom eekkoloorak wone inom, tu koonak paga nogo logorak wone inom, mamungginake, eeke logogin aret kwe,

²⁴ kit nen Aliku ALA kinagabiti mbako logonet, kiniki-kineebe abok aret Aliku ALA wogo'nuk, at mban kulinik-kalinik liirogon mugurok nogwe, ndi, at nen yi eekak ndi eekak kit kinake iya tit eeppinagage nagagerak nogo abekwi, eeko logonip o.

²⁵ Ndi, kit maluk mban eerit nogwe kiinok perak, kit inom, kinowe endagembogut inom, Ala nen mondok lek agago pinagagin o,” yinuk, yoragagerak.