1 Tamuwen 10 - Ala Wone Peenok Peebi Mbanak

Tamuwen nen Tawun amburu eeppereegerak wone

¹ Yoge mbareegi, ayeloman nogo nappereegerak nage kagak, aap Tamuwen nogo nen eyo tayitun amburu yiiwa'na toolak nogo wagangge nagagerik, Tawun anobak paga kilippunuk keyage wake, agandin eyak mbangge, eeke nagagerik, wone yoge logonet, “Ala apuri iniki kundugu Iterali nogo inarum logonet, inawone mbangge logonok nduk at Aliku ALA nen kat aret leenogo mippagagerak keenu a'nok nduk, amburu kilippagagi o.

² An ya neegak, yogondak aret kwe Araken nggween taambereegwam it Mbeniyamin wonogo menggam kuli o Teleta taa'nogo ari namenggendak me, aap mbere ambi kinom lambungge keenok, it nen yokkogo logonet, Keledai kwaarinabit nege nagandak nogo muk kagaarak kwe, yogondak kogoba nen, Naanggumi ngge o? yinuk, iniki lunik wonage lek o. Ata, Naput nonggop aga o, yinuk, iniki piirik wonage, yokkirugun o.

³ Yokkugwi iinok, kat time nen nok-nok, eyo teno alome o Tabot nogome nage logomenggendik, time aap ineebe kenagan nen, ambi kambin aagalogwe kenagan wagangge, ambi nen oroti kenagan wagangge, ndi, ambi nen ndomba agabolo paga anggur amburu toolak wagangge, ee'nuk, o Mbeten Ala alut eeriyak nduk nogwe me, kinom lambungge keenok,

⁴ it nen keyage wappaganuk, oroti mbere wokkugwi iinok, ti aret kolaamunggun o.

⁵ Kolage logomenggendik, o Nggibeya it aakumi Pilitin mendek inawooliya wuppunuk wonogwe me, Ala abuut nogo paga lagi namunggun o. Lagi nage logomenggendik, o kota unggwogo menggam tu paga ari namenggendak me, it aap Ala nen yorage kagak yoraga ambi eerak Ala ake warogo wogogo menggam puut paga nen luu'ngget inom, nggitat inom, togolowak oone lobale inom, nggawiwak inom, oone eekwi, Ala wone yogwe, eerit wambi wogwe me, kinom lambungge keenok,

⁶ ne ti eyom paga at Aliku ALA Aberiniki omaawi koba age mbaremenggi, Ala wone it agan wogwe nogo kinom ari, ndi, kobaabut aap alik mendek negen age, eerumunggun o.

⁷ Eeriyak yokkigirak yi apit aret a'me lik ari kenok, Ala nimbirak wonage, mba'nuk, kat eeriyak mbaremenggendak nogo ndak-ndak eeke logomunggun o.”

⁸ Yoge nagagerik, ambi yoge logonet, “At Ala ake warogo kani kungge, Ala ninom lambunik logowok nduk, at ake warogo wogoge, eerikit nduk, nogo 6 yippunuk, ko'lu o Nggilagan nagin me, kat kaa'nduk time namenggendak to'nake wonage me, keya wage logominggirik, kat eeke logorak time nen yokkirigin o,” yinuk, yoreegerak.

^9-10 Yoge mbareegi, at Tawun nogo nen Tamuwen teppunuk, woraakit nduk, ena nomo ari me, Ala nen obaabut alik mendek eeppege mbareegi, Tawun ayeloman nogo, imbirak o Nggibeya aap Ala wone yaga ambi eerak wogwe nogo, inom lambunggo mbareegwa, o ti eyom paga aret at Tamuwen nen yi eeriyak ndi eeriyak yoreegerak nogo, a'me lik ari kagak, Ala Aberiniki omaawi Tawun oba age mbareegi, it Ala nen yorage kagak yoraga nen wone agan wogwe nogo, inom aret agan wagagerak.

¹¹ It Ala wone agan wogwe nogo Tawun inom agan wage aakumi aa'nduk Tawun ineenu nogo nen inigen kogo nogogwaarik, ambi nen ambi yogak eeko logonet, “Aap Kiti aput Tawun nogo ti, nonggop aga o? At kunduk, Ala nen yorage kagak yoraga inom a'nuk ari mbakop?”

¹² Yogo mbareegwa, aap time mendek ambi nen yorage logonet, “It Ala nen yorage kagak yoraga ti, inogoba ta mbakop?” yoragagerak. Ndi, “At Tawun kunduk, aap Ala nen yorage kagak yoraga inom a'nuk ari mbakop?” yinuk, wone yoragagerak nogo aret aakumi nen agan nogo nogogwaarak.

¹³ Ti'nuk, at Tawun nogo Ala nen yoge kagak yoraga kwak ari nagagerik, Ala ake warogo wogogo menggam puut paga time lagi nagagerak.

¹⁴ Lagi nage nagagerik, ayeloman imbirak iname wogwe at Tawun ogobaluk nen enegen iige nagagerik, it yorage, “Kit ngga nen wogop?” Yorage mbareegi, Tawun nen ari logonet, “Keledai kobak agaarak nogo kwaarinabit nogoorak mendek, lek iinok, at Tamuwen eegwa'me wa nogo nogoorik, wogo o.”

¹⁵ Yogo mbareegwa, at ogobaluk nen yorage logonet, “At Tamuwen nen yokkiragaarak nogo yo'ninip o.”

¹⁶ Yorage mbareegi, at Tawun nen ari logonet, “Keledai nogo muk kwaaginakaarak wonogwe o,” Tamuwen nen yoreegerak wone nogo mban yoreegerak kwe, Tawun aap inowe endagembogut logorak wone yoreegerak nogo perak, yorulik.

Tawun aap endagembogut logorak leenogo mippereegwaarak wone

¹⁷ Ti'nuk, at Tamuwen nen aakumi Iterali mendek nogo at Aliku ALA enggaanom paga o Mitapa kuwak ari woraawak nduk wiiragagerak.

¹⁸ Wiiragagerak kuwak ari wogo mbareegwa, it yorage logonet, “At Aliku kit Iterali kinogoba Ala nen, Aakumi Iterali nogo it Metit mendek ineenggime nen ndiniren wundi wage, yi aakumi ndi aakumi tebembiirogo wonogwe me, wondet agago piige, eereegirak nogo ti, inogoba Ala an aret o, yinuk, yereegerak kwe,

¹⁹ abera'lek me, aaninggin kinoba ngginnage, andi-pandi kinoba age, eeke kenok, kinagap ndake menggerak kinogoba Ala nogo mbo pogo nogotik, Ninowe endagembogut ambi mippinanu o, yo'nogotak me, kinanebunu loguk lombok kinogoba Aliku ALA enggaanom paga ya'i wa'nip o,” yoragagerak.

²⁰ Yorage nagagerik, at Tamuwen nogo nen aap Iterali inanebunu lombok abok aret owagam woraawak nduk, yoragagerak wogo mbareegwa, “Ta oba age kaamun?” yinuk, iri'ngga wakkogo nogogwaarik, anebunu Mbeniyamin mendek aret inoba agagerak.

²¹ Inoba age mbareegi, inanebunu Mbeniyamin mendek nogo ndarak logok wogoren owagam piya wa'nuk, it aap Materi mendek ndarak logok nogo inoba age mbareegi, Kiti aput Tawun nogo aret oba agagerak me, kwaareegwaarak kwe, eebe lek kogogwaarak.

²² Lek kenok, it aakumi nogo nen at Aliku ALA yogo logonet, “Ai, ninogoba. Aap ti nogo, yime wagaarak wonage ilik?” Yogo mbareegwa, Aliku ALA nen ari logonet, “Eebe wagaarak wonage aret kwe, yi mendek ndi mendek enggela'me kumaarak wonage o,” yoragagerak.

²³ Yorage mbareegi, mbe agan aap Tawun wa nogo nogogwaarik, wonok wogo mbareegwa, it aakumi nogo at uum abu'me kuli iigak, at alik anggup nggorek tiyarogon mi'ndak inenggela'me wonage kogogwaarak.

²⁴ Kogwe iigak, at Tamuwen nen it aakumi nogo yorage logonet, “At Aliku ALA nen aap leenogo mippegerak yi kogop a? At pogom ambi nit ninenggela'me wonogwe abu lek o.” Yorage mbareegi, it nogo nen, “Ninowe endagembogut mondok-mondok logorak nogo yi aret o!” yinuk, keekok piyanggogogwaarak.

²⁵ Yogo mbareegwa, Tamuwen nen aap inowe endagembogut logonet, awuri eeppiige logorak nogo kenom paga yorage nagagerik, mbuku pirik-perek aago nogo paga liiru mbanogo Ala awooliya wurik me at enggaanom paga time aret pereegerak. Pege nagagerik, it aakumi nogo iname inalitik-inalitak nawak nduk, nappiyareegerak.

²⁶ Nappiige mbareegi, at Tawun kunduk, ame o Nggibeya nogome nage me, it aap wakaa'ngget inom nawak nduk Ala nen inikime eeppiyareegerak nogo, inom aret nogogwaarak.

²⁷ Nogwe iigak kwe, it ndugwi iyak wuka nogo mendek nen yogo logonet, “Aap ninake leenogo mippegaarak yi, ninarum op aret logogin mbakop? Ha!” yinuk, miyuk-meya eerogo pogo logonet, yi mendek ndi mendek ambi abu wogorulik mbo pereegwaarak. Togop eekwi iigak kwe, at Tawun nogo aruk logu mbakak oone lek puk agagerak.