DANIEL 2 - KITAB MOLIYOUS BILITA MONONDOK

Nebukadnezar namonii

¹ Daano kopopook meeng, lua kotaun salataa Tomundo Nebukadnezar nabapamarentaan, yana moniimo. Dona moniidoo tealikene susa konoano, sampe aki namoola mooloa.

² Tobikon doiya yana uwangemo sasaibino koperamal, kotolosupa, dukun tukon mian modaano kona motoiyan, sulano napo tarangkanggene dona moniidoo.

³ Salataa yanila kokondong doi tomundo salaano, dotomundodoo bantile, “Yaku monii, tukon konoanggu susa sabab yaku yase motoiyo koalatino!”

⁴ Yanila timbiliyo tukon silingan Aram, “Daku tuan ikoo tubo sidutuposidutukon! Basalitakenemokai domoniidoo doi kami, sulano mai tarangkanggene koalatino.”

⁵ Tomundo timbiliyo, “Yaku alayomo nakaputusan nia: Komuyu sio popailukanaku domoniidoo doiyaku, tukon koidan koalatino. Kalu aki potoiyo, komuyu naikon pinotol-potoli tukon kopobonua linombo.

⁶ Bai kalu komuyu toiyo, yaku beenggomuyu tambo motambo-tambongan tukon pongodotii mobabasal. Jadi, diabudodoo pailukanakumokai daku moniidoo tukon koalatino!”

⁷ Yanila timbiliyo koidan, “Kona tutuuwan siokai daku Tuan napailukanggami looluk domoniidoo doi kami, salataa lapa maka mai tarangkanggene koalatino.”

⁸ Salataa dotomundodoo lengele yana timbiliyomo, “Tapaat tuuno pokokonoy daku dugaan. Komuyu tolongo tunda-tundayo kotempo, sabab komuyu toiyo baikon yaku daano daku maksuud

⁹ mohukume komuyu sasaibino tukon kokubai mopokakana kalu aki posanggup mopailukanaku domoniidoo doiyaku. Komuyu pomeenggon sulano pokala-kalaiyaku tukon pomaemaengganaku tukon komuyu moinikene baikon yaku naikon boliiyo daku kaputusan. Jadi diabudodoo pailukanakumokai domoniidoo doiyaku sulano kutoiyo baikon komuyu moola tarangkanggene koalatino.”

¹⁰ Sasaibino doahlidoo timbiliyo, “Doi posaapon kodunia akiyokai komeeng komian momoola toiyo tukon popitoikene daku Tuan naminakisuuti. Tukon akiyoon nadaano komeeng kotomundo, maukai nabulaamo konababasalan kai natongodotiiyan, bai aki natuntute kolangge mobuno doiya moluwedoi sasaibino koperamal, kotolosupa tukon komian modaano kona motoiyan doi nakamali.

¹¹ Dakutuan palaluuwo kolangge motodudul sulit kopikikanano. Akiyokai komeeng komian momoola toiyo, alaasene sasaibino kopilogot, bai aki napo dungol doi banggapi.”

¹² Salataa dotomundodoo lengele yana nggimalo tuuno tukon maparentakene sulano nainakate sasaibino komian mopandoy tuuno modaano doi Babel.

¹³ Maka inumumkanggono dotomundodoo naparenta, tukon sasaibino komian mopandoy tuuno, tongusokon Daniel maka tula-tulano yanila inunggoliimo moinakate.

Ko Mian Bisa otudoikene doolumonoo tukon alatino doi Daniel

¹⁴ Doibundu Daniel lubotiiyo Ariokh, mokatuaiyo kotomundo napangawal, molapamo batotobo lakukene dohukumanoo matean. Tukon hati-hati

¹⁵ Daniel mansadai doiyana, bulaando tomundo mosumbetenemo koparenta mobuno doiya mobuno doiya kona babalatan. Ariokh lapamo pailukene doi Daniel oila komo tealimo.

¹⁶ Daniel soisobiton momangadap doi tomundo tukon makabi tempo sulano natarangkanggene doolumonoo alatino.

¹⁷ Konakakabi dinaanokon, maka Daniel abalimo doi bonua tukon popitoikene sasaibino dokejadianoo doi Hananya, Misael tukon Azarya.

¹⁸ Yana sumboliiyo napo sambayang doi Mian Bisa doi surgaa sulano namamaasikene yanila tukon nabantile doolumnoo raasiano. Salataa buno doiya akino napo hinukum mate tukon sasaibino komo pandoy akal.

¹⁹ Doi popookoo koidan ko Mian Bisa pailukene doi Daniel dolaaiadoo doi meeng kopokita lalomo. Salataa buno doiya Daniel nggaalemo ko Mian Bisa doi surgaa,

²⁰ kona bantilano, “Do Mian Bisadoo pandoy tukon barani, tangaalokai Yana sidutu-posidutukon!

²¹ Iyanamokai komo tataapkanggene kotempo tukon loonu, Yana balakaatiyo tukon lantike kopenguasa. Iyanamokai koidan komo mebee pandoiyan, tukon komo mebee koidan pangalatian.

²² Iyanamokai komo bantile koraasia mosulit tuuno. Yana toiyo komo teali doi sasaibino kolangge mau moakiyoon natokita. Yana liniputi madialan laango.

²³ Oh, ko Mian Bisa kumbumbu namoonggolan, yaku nggaale tukon odotiiyo Ikoo. Sabab Ikoo beenggu pandoiyan tukon bukuanan. Ikoo daanekene komai kakabi. Tukon potimbili doi tomundo lapamo Mutudoikanaku.”

Doolumonoo Daniel pailukenggenemo tukon tarangkanggenemo

²⁴ Salataa lapamo doiya Daniel tauso doi Ariokh molapamo tinugaskanggon sulano naakateyo sasaibino koponipu mopandoy doi Babel. Daniel bantile doiyana, “Inai moakateyo sasaibino dopenipu mopandoydoo. Bai babayomo yaku sulano kumangadap doi tomundo, sabab yaku yase mopailukene doi tuan dona olumonoo alatino.”

²⁵ Aki namalumbit Ariokh babayomo Daniel momangadap doi Tomundo Nebukadnezar maka nabantile, “Ata lapamo malaat doi antara sasaibino ko Yahudi miano mosinakukon daano komeeng komian komo toiyo tarangkanggene daku Tuan naolumon alatino.”

²⁶ Salataa lapa doiya tomundo bantile doi Daniel tukon koidan yana sinombuikon Beltsazar, “Moolaki mupailukene doiyaku daku olumon tukon koidan koalatino?”

²⁷ Daniel timbiliyo, “Daku tuan, akiyo komian modaano kona motoiyana, motolosupa, peramal kai ahli bituwon pauno komo moola popitoikene dolanggedoo doi ku Tuan.

²⁸ Bai doi surgaa daano ko Mian Bisa momoola bukayo koraasia, tukon Yana lapamo popitoikene doi ku Tuan oila naikon komo teali doi oloyo salaando. Diabudodoo pataikanakumokai sulano kutarangkanggene daku Tuan naolumon tukon pokita Tuan motalimayo doi tempo Tuan daano momoolo.

²⁹ Salataa daku Tuan daanoon momoolo, daku Tuan olumon tentang loonu naikon molubat. Ko Mian Bisa momoola bukayo sasaibino koraasia yana tataap palatikanggene doi ku Tuan oila naikon komo teali.

³⁰ Naiya raasia nia lapamo binuktikanggon doi ata bai bolikon ata napandoiyan kai ata lobian kona pandoiyan doi indee komianokai koidan, bai sulano ikoo daku Tuan namoola ikoo toiyo koalatino doi Tuan naolumonoo tukon alatiyo koidan tentang daku Tuan noano antoko.

³¹ Naiyamokai kopokita daku Tuan mokitayo: Doi ku Tuan salaano daano komeeng kotimbalang! Dotimbalangoo babasal tuuno, tukon nggilep-nggilep bai kondondoongo minatakuton tuuno.

³² Kooluno kinubai luwedoi mosoni tulen, koeyopo tukon limano loyoso luwedoi suasa, koowako tukon popoolo luwedoi tambaga,

³³ kobanano luwedoi besi tukon koaino kosoobos luwedoi besi tukon kosoobos koidan luwedoi buta ndonduun.

³⁴ Doitempo daku Tuan daano mokitepe, daano komeeng kobatu mobabasal tosobii luwedoi lipu namotombingan, bai akiyo komian mosinggile, maka natikale dotimbalangoo aino moluwedoi besi tukon buta ndonduunoo, sampe manas.

³⁵ Doitempo koidan sasaibino dotimbalangoo tolubang tukon tealimo besi timbunano, buta ndonduun, tabaga, suasa tukon mosoni momanaso pokakana koabu doi tampat babantingan gandum doi tempo pital. Dotimbunanoo tebengakon mbombuul mopuule, sampe mau soisik akiyo komo totinggal. Bai dobatudoo molubange dotimbalangoo teali mobabasal pokakana kobunggo tukon tombukiyomo posaapon kodunia.

³⁶ Doiyamokai daku Tuan naolumon, tukon diabudodoo ata iyasemo motarangkanggene koalatino.

³⁷ Daku Tuan yaku moodotiiyo tomundo moluwedoi sasaibino kotomundo: Ikoomokai kotomundo mobalakuasa tuuno. Ko Mian Bisa doi surgaa lapamo beekene doi ku Tuan naiya batomundoan, kakuasaan, kobukuanan tukon konakinabasalan.

³⁸ Daku Tuan tinealikono ponguasa luwe taalikon doi dunia modaano kotumbuno tukon luwedoi modaano kotomisi tukon iyayon bailonggon. Daku Tuan susuungokai doiyamokai dotimbalangoo oluno moluwedoi mosonidoo.

³⁹ Bai kalu daku Tuan nabatomundoan pupuso, naikon sumbot kobatomundoan bailonggon moaki napokakana konakabasal daku Tuan nabatomundoan. Doibundu koidan sumbot kobatomundoan kotoluno mo pinopialunggon tambaga moluwedoi timbalangoo, naikon mokuasaiyo posaapon kodunia.

⁴⁰ Boobus koidan naikon sumbot kobatomundoan kosanggapo, mopokakana kobesi kona moonggolan. Tukon pokakana kobesi momoola pipise tukon manase oilamo tolong, bunomo doiya koidan nabatomundoan nia kosanggapo naikon pipise tukon manase dobatomundoan-batomundoanoo bailonggon.

⁴¹ Koaino tukon lunggu-lungguno dotimbalangoo aino kosoobos moluwedoi buta ndoduun tukon kosoobos moluwedoi besidoo, doiya komaanano baikon doioloyo salaando dobatomundoanoo naikon tongobos obos. Dobatomundoanoo daano kona kakuatan koidan sabab butadoo ndonduunoo daano kopasambulo besi.

⁴² Koaino lunggu-lungguno kosoobos moluwedoi besi tukon kosoobos moluwedoi buta ndonduun doiya koalatino daano kosoobos kobatomundoan mobukuan tukon daano koidan komo aki nabukuan.

⁴³ Dobesi tukon butadoo ndonduunoo moposombuli doiya kotandano koidan baikon dobatomundoanoo naikon kakaate mokubaiyo kodilino namoonggol doiyamo yana lakukanggene konapo mian osowaan tukon bangsa bailonggon miano, bai donapo usahadoo sia-sia, pokakanakai kobesi aki namoola polomboti moonggol tukon kobuta ndonduun.

⁴⁴ Doitempodoo kotomundo-tomundo nabapamarentaan, ko Mian Bisa doi surgaa naikon mabangun meeng kobatomundoan naikon momoonggol sidutu-posidutukon tukon akiyo kobangsa naikon momanase molutak kobangsa bailonggon.

⁴⁵ Baanggokai ikoo daku Tuan aki nalapamo kitayo baikon akiyo komian mosinggile, dobatudoo tonggoling luwedoi buta motombing maka natikale tukon manase dotimbalangoo moluwedoi besi, tambaga, buta ndonduun, suasa tukon domosonidoo? Ko Mian Bisa mobabasal buktikanggene doi ku Tuan oila naikon komo teali. Doolumonoo moola inangga tukon ata nakatarangan tapaat.”

Daniel matalima tambo moluwedoi tomundo

⁴⁶ Doibundu Tomundo Nebukadnezar somba doi Daniel salaano tukon mebee parenta sulano Daniel nainodotii tukon doiyana sinosubakon kososuba mo sinua tukon sosubakon-sosubakon bailonggon.

⁴⁷ Tomundo Nebukadnezar bantile, “Tutuu, Daniel, domu Mian Bisadoo yanamo komo babasal tuuno doi antara sasaibino ko Mian Bisa. Iyanamokai koponguasa luwedoi sasaibino kotomundo, tukon momoola bukayo sasaibino koraasia. Yaku toiyo dolanggedoo sabab ikoo moola tarangkanggene koalatino naiya raasia nia.”

⁴⁸ Doibundu Daniel binee kadudukan motatandak, yana inodotii tukon tambo momonondok, tukon iyana inangkato teali gubernur doi Babel, tukon koidan yana tinealikono katua motatandak luwedoi sasaibino kopongotunggul doi kamali.

⁴⁹ Bai luwedoi Daniel nakakabi, Tomundo Nebukadnezar salakanggene kobapamarentaan doi propinsi Babeloo doi Sadrakh, Mesakh tukon Abednego, bai Daniel koona ndoongan doi tomundo nakamali.