Matayo 9 - Lango New Testament

Yecu ocaŋo dano ame two too me akwea kom

¹ En odonyo i yee, oŋolo loka ca, obino i paco turgi

² Ote kelo baŋe dano ame two too me akwea kom, kun opyelo i wi tanda. Yecu ka oneno iyeegi, te kop kede atwo ni, “Di cunyi, awobi; balli doŋ oweko oko.”

³ Nen, jo mogo ame gin opwony-cik, te kop i yigi ni, “Dano man oyeto Obaŋa.”

⁴ Yecu daŋ te ŋeyo tamgi oko, te penyogi ni, “Piŋo itamo wunu tam arac i cunywu?

⁵ Kara ayottere mene, ka akobo ni, ‘Balli doŋ oweko oko,’ onyo ni, ‘Ya, iwoti?’

⁶ Ento man me miyowu ŋeyo ni, Wot a dano tye kede twer i lobo me weko bal”, te doŋ kobbi atwo ni, “Ya, itiŋ itandani, iwot giri paco.”

⁷ En te ya dok paco.

⁸ Ka lwak oneno, lworo omakogi, opako Obaŋa ame omio twer a rom mano baŋ jo.

Yecu olwoŋo Matayo

⁹ Ame Yecu doŋ oya oko i kuno, oneno lo moro a nyiŋe Matayo obedo piny i ka rayo ocoro; okobbe ni, “Luba.” En oya, olube.

¹⁰ Ame Yecu obedo i dog cem i ot, nen, ora-ocoro apol kede obalo obino, obedo piny karacel i Yecu kede jo mere a lube.

¹¹ Oparicayo tekki neno man, ote penyo jo mere a lube ni, “Kara piŋo apwonywu cemo karacel kede oraoco-ro anaka obalo-gu?”

¹² Ka Yecu owinyo, te kobo ni, “Jo a komgi yot mom mito dakatal, kono ka jo a komgi lit.

¹³ Wot ipwonyere wunu te kop me, ‘Amito kica, mom gin oŋolo.’ An mom abino me cwano jo a kitegi atira, ento obalo.”

Peny i kom kanyo kec

¹⁴ I kare ca jo a lubo Lakana obino baŋ Yecu, te penye ni, “Kara piŋo wan kede Oparicayo okanyo kec, aco jo a lubi mom kanyo kec?”

¹⁵ Yecu te gamo doggi ni, “Owote a ŋat a nyom kumo a kun en anyom tye baŋgi? Kare bino tuno ame obino kwanyo anyom oko i baŋgi, eka gin te kanyo kec.

¹⁶ Mom tye dano moro ame dapo dul boŋo anyen, ame pe ru olwoko, i kom en ame doŋ oti, pien dul boŋo ame odapo kede-ni lunyo telo boŋe-nu, waŋe te yec medde ameda.

¹⁷ Dok mom opiko koŋo anyen i ocoe acon; ocoe yec oko, koŋo te ony, ocoe te balle oko; ento jo piko koŋo anyen i ocoe anyen, en a mio gin aryo ducu ote bedo aber.”

Nyaka adwoŋ kede dako ame ogudo dog ruk a Yecu

¹⁸ Ame Yecu tye ka kobo kop man baŋgi, adwoŋoro te tuno baŋe, te ryebere i nyime kwaye ni, “Nyara pwod oto atoa amanni; ento biye iket ciŋi i kome, cite kwo mere bino dwogo.”

¹⁹ Yecu te ya lube, kede jo a lube.

²⁰ Dako moro a nwaŋ otwo too me kwer remo mwakki apar wie aryo, te bino i tuŋ ŋee, te gudo ayayak me boŋo mere;

²¹ pien en otamo kene i yie ni, “Ka agudo ayayak me boŋo mere keken, abino caŋ gire.”

²² Yecu olokere, te nene, te kobo ni, “Di cunyi, nyara, iyee meri ocaŋi oko,” Cite dano-nu te caŋ oko cakere i caa-nono.

²³ Yecu odonyo i ot adwoŋ-ŋu, te neno jo a kuto nyamulere kede lwak ame awo, te kobo ni,

²⁴ “Dony wunu oko; pien nya-ni mom oto ento onino anina.” Gin onyere meicel.

²⁵ A doŋ oryemo lwak, odonyo oko, en te mako ciŋ nyan-nu, te ya oko.

²⁶ Kop man rwoŋe te winyere i lobonaca luŋ.

Yecu ocaŋo otowaŋ aryo

²⁷ Ame Yecu doŋ oya i kuno, jo aryo ame otowaŋ te lube, kun oredo ni, “Timwa ber, Akwar Daudi.”

²⁸ Ka en doŋ odonyo i ot, otowaŋ-ŋu te bino baŋe, Yecu te penyogi ni, “Wun iye wunu ni an atwero timo man?” Gin odok iye ni, “Ee ta, adwoŋ.”

²⁹ En te mumulo waŋgi kun kobo ni, “Myero timere baŋwu i kite acalo iyeewu tye.”

³⁰ Waŋgi daŋ te yabere oko. Yecu te cikogi atek ni, “Myero inen wunu ni dano moro kur oŋeo.”

³¹ Ento ka gin okato oko, olalo rwoŋe i lobonaca luŋ aluŋa.

Dano a lebe oto oloko

³² Ame gin doŋ aya, awot oko, jo te kela baŋe lo moro a lebe oto, won cen arac.

³³ A doŋ Yecu oryemo cen oko, alebeoto-nu te cako kop, omio lwak owuro, kun okobo ni, “Anaka cene gin acalo man pe ru onen i Icrael.”

³⁴ Ento Oparicayo te kobo ni, “En oryemo cen pi twer adwoŋ me cen.”

Lwak ocono Yecu

³⁵ Yecu owoto omano boma apapat kede akina myere luŋ, kun pwonyo i kacokere megi, kede rabo amut aber me loc Obaŋa, kede caŋo too anaka goro ducu.

³⁶ Ka en oneno lwak, ocone meicel, pien otye ka wunogi, olal ata acalo rommi ame akwatgi mom.

³⁷ Eka en te kobbi jo a lube ni, “Kac bup, ento jo a kao nok

³⁸ Pi mano, kwa wunu Won poto atek me cwa otic i ka kaccere.”