Matayo 7 - Lango New Testament

Ŋolo kop i kom jo ocele

¹ “Kur iŋol wunu kop, me wun daŋ kur ŋolliwu kop;

² pien kodi kop ame iŋolo wunu obino ŋolliwu kede, dok kit gin ame ipimo wunu kede, en ame daŋ obino pimmiwu kede.

³ Piŋo ineno cuŋ kal ame tye i waŋ ominni, aco kono ikoŋ a tye i waŋi ikomi neno loi oko?

⁴ Onyo itwero kobo ominni niŋo ni, ‘Wek akwany cuŋ kal a tye i waŋi oko’, a kun yin twon ikoŋ tye oyimere i waŋi?

⁵ Yin agoba, koŋ ige kwanyo ikoŋ a tye i waŋi, eka ite doŋ neno aber me kwanyo cuŋ kal a tye i waŋ ominni.

⁶ “Kur imi wunu gin acil baŋ gwogi, daŋ pe ibolu tiggiwu me wel i nyim punni, me gin kur nyon piny i tyengi, te dok lokere, tojowu.

Kwa wunu, obino miyowu

⁷ “Kwa wunu, obino miyowu; yeny wunu, ibino wunu nwoŋo; twom wunu kika, obino yabbiwu.

⁸ Pien dano acel acel ame kwao, omie, ŋat a yenyo, nwoŋo; ŋat a goo doggola oyabbe kika.

⁹ Kara ŋa i akinawu, ka atin okwae ogati, lunyo miye gweŋ?

¹⁰ Onyo ka okwae rec lunyo miye twol?

¹¹ Ka wun jo areco iŋeo miyo itinowu mot abeco, Papawu a tye i polo mom doŋ bino kato meicel imiyo jami abeco baŋ jo a kwae?

¹² Doŋ ba, gin luŋ ame imito wunu ni jo timwu kede, wun daŋ tim wunugi amannono, pien man en cik a Muca kede pwony odwarpiny.

Doggola adiŋ

¹³ “Dony wunu i doggola adiŋ, pien yo a woto i to lac, dok ber, jo ame lubo pol.

¹⁴ Pien doggola me kwo diŋ, yo a woto iye daŋ rac, jo a bea iye nok.

Yat ŋeye pi nyige

¹⁵ “Gwokere wunu i kom odwarpiny ame ogoba, ame gin bino baŋwu kun orukere bala rommi, ento oger i yigi bala epet.

¹⁶ Ibino wunu ŋeyogi i kom nyiggi. Olok opwono i kom oryaŋ? Ibuu opwono i kom ocokocok?

¹⁷ Amannono yat acel acel aber nyako nyige abeco, ento yat arac nyako nyige areco.

¹⁸ Yat aber mom twero nyako nyige areco, dok yat arac mom twero nyako nyige abeco.

¹⁹ Yat acel acel a mom nyako nyige abeco, otoŋo, obolo i mac.

²⁰ Pi mannono ibino wunu ŋeyogi i kom nyiggi.

Anaka cene an mom aŋeowu

²¹ “Mom ni dano acel acel ame lwoŋa ni, ‘Rwot, Rwot,’ en a bino donyo i loc me polo, ento kono dano ame tio gin a Pappa a tye i polo mito.

²² I nino-nono jo apol bino kobba ni, ‘Rwot, Rwot, wan yam mom orabo kop Obaŋa i nyiŋi? Wan yam mom oryemo cen i nyiŋi? Mom wan otio tic atek adoŋo apol kede nyiŋi?’

²³ Cite i kare-nu abino kobbigi ni, ‘Anaka cene an mom aŋeowu gira. Wot wunu teŋe i nyima, wun otim tim areco!’

Udi aryo ame ogero

²⁴ “Pi mannono, dano acel acel ame winyo koppa, daŋ te tiyo, bino rom aroma kede dano ame aryeko, ame agero ode i kom lela.

²⁵ Doŋ ka kot ocwe, alele omol, yamo okuto, obukoro i ot-tu kede teko, naka ot mom orette, pien acakki tere onwoŋo ocibo i kom lela.

²⁶ Ento dano acel acel a winyo koppa, mom te tiyo, en rom aroma kede dano ame amiŋo, a rik ogero ode i kwoo.

²⁷ Doŋ ka kot ocwe, alele omol, yamo okuto, obukoro i ot-tu kede teko, ot orette, orette orwop.”

Twer ame Yecu obedo kede

²⁸ Ame Yecu doŋ otyeko kobo kop magu luŋ, lwak owuro pwonnyere atek,

²⁹ pien opwonyogi acalo ŋat a tye kede twer, mom acalo opwony-cikgi.