Matayo 6 - Lango New Testament

Kop ame Yecu opwonyo i kom konyo ocan

¹ “Gwokere wunu, kur iti wunu ticwu me kite atir i nyim jo me gin nen. Ka itimo wunu amannono, mom doŋ ibino nwoŋo wunu mottoro i baŋ Papawu a tye i palo.

² “Doŋ ba, ka ikonyo ocan, kur ikut bilo apel i nyimi oko con, acalo ogoba timo i kacokere kede i waŋa yo, me jo pakgi. Ateni akobbiwu ni, gin doŋ otyeko gamo motgi oko.

³ Ento yin ka ikonyo ocan, kur imi ciŋi tuŋ cam ŋe gin a ciŋi tuŋ cem atimo,

⁴ wek ikony ocan i muŋ; cite Pappi a neni i muŋ bino miyi mot.

Kop ame Yecu opwonyo i kom kwayo Obaŋa

⁵ “Dok ka itye wunu ka kwayo Obaŋa, kur ibed wunu acalo ogoba, pien gin omaro kwayo Obaŋa kun ocuŋ acuŋa i kacokere kede i akara yo, me jo nengi. Ateni akobbiwu ni, gin doŋ otyeko gamo motgi oko.

⁶ Ento yin ka ikwao Obaŋa, dony i tyelo, eka ite cego doggolani oko, ite kwayo Pappi a tye i muŋ; cite Pappi a neni i muŋ bino miyi mot.

⁷ “Ka itye wunu ka kwayo Obaŋa, kur ibed wunu duro kop acalo Orok a pe ŋeo Obaŋa; pien gin tamo ni Obaŋa bino winyogi pi lwak kopgi apol.

⁸ Kur itimu bala gin, pien Papawu ŋeo gin a mitte baŋwu a mom ru ikwae wunu.

⁹ Doŋ ba, kwa wunu Obaŋa kit man, ni, ‘Papawa a tye i polo, nyiŋi bed me awora.

¹⁰ Myero locci doŋ bin, gin ame imito myero tiye, i lobo bala i polo.

¹¹ Miwa tin cam mewa me tin;

¹² timwa kica pi bannyi i baŋwa, acalo wan daŋ otimo kica baŋ jo a tye kede bannyiwa.

¹³ Kur imi bitwa, ento ilarwa i baŋ Arac. [Pien loc kede teko kede kwogo obedo meri atwal. Amen.’]

¹⁴ Pien ka wun itimo wunu jo kica i bal megi, Papawu a tye i polo daŋ bino timowu kica;

¹⁵ ento ka wun mom itimo wunu jo kica, Papawu mom daŋ bino timowu kica i balwu.

Kop ame Yecu opwonyo i kom kanyo kec

¹⁶ “Ka ikanyo wunu kec, kur ibed wunu bala ogoba a waŋgi nen myemye, pien gin balo waŋgi ni jo nen ni gin otye okanyo kec. Ateni akobbiwu ni, gin doŋ otyeko gamo motgi oko.

¹⁷ Ento yin ka ikanyo kec, wir wii kede moo ilog waŋi daŋ,

¹⁸ me kur inen baŋ jo ni ikanyo kec, kono ka baŋ Pappi me i muŋ; cite Pappi a neni i muŋ bino miyi mot.

Lonyo ame akano i polo

¹⁹ “Kur ikan wunu lonyo pirwu kenwu i wi lobo, kan ame nyenye kede nyalli balo oko ni, anaka okwo turo ot te kwalo oko.

²⁰ Ento kan wunu lonyowu i polo, kan ame nyenye kede nyalli mom balo, anaka okwo mom turo ot, te kwalo.

²¹ Pien kan ame lonyowu bedo iye, cunywu daŋ bedo kuno.

Tara me kom

²² “Tara me kom en waŋ; ka waŋi tye boŋo balloro, mio komi luŋ bedo aler.

²³ Ento ka waŋi rac, komi luŋ bedo i colpiny. Doŋ ka lero iyii odoko col, collere doŋ rom mene!

Tiyi Obaŋa kede tiyi lim

²⁴ “Mom tye dano moro a twero tiyi odoŋe aryo; pien bino dago ŋat acel, eka te maro en ocele, onyo bino moko i kom moro acel, eka te cayo en ocele. Pe itwero wunu tic pi Obaŋa kede pi lim.

Bedo kede tam apol

²⁵ “En omio akobbiwu ni, kur ibed wunu kede par apol pi kwowu, ni ibino camo wunu ŋo, onyo ibino mato wunu ŋo, onyo pi komwu ni ibino ruko wunu ŋo. Kwo pire mom tek kato cam? Kede kom mom pire tek kato ruk?

²⁶ Koŋ inen wunu winy a twarre; gin mom ocoo koti, daŋ mom okao, mom ocoko i dero, ento Papawu a tye i polo pitogi. Wun mom pirwu tek kato gin?

²⁷ Kara ŋa i akinawu ame twero medo bat acel i kom kwo mere pi bedo kede par apol?

²⁸ Doŋ piŋo ibedo wunu kede par apol pi ruk? Tam wunu koŋ pi kalanweka me tim, kite ame gin doŋo kede. Mom owio uci, mom acweo boŋo;

²⁹ ento akobbiwu ni, kadi bed Culeman orukere kede kwogo mere ducu, en mom orukere acalo moro acel i akinagi.

³⁰ Ka Obaŋa ruko lum ame tye i tim, ame bedo ka tin keken, dik i ote bolo oko i keno, en mom bino rukowu akato, wun jo ame iyeewu nok?

³¹ Pi mannono kur ibed wunu i par apol, ni, ‘Obino camo ŋo?’ onyo ‘Obino mato ŋo?’ onyo ‘Obino ruko ŋo?’

³² Pien jami magu ducu Orok a pe ŋeo Obaŋa yenyogi; Papawu a tye i polo ŋeo ni ginnogo luŋ mitte baŋwu.

³³ Ge wunu koŋ yenyo yo me donyo i loccere kede me nwoŋo kite atira mere, jami magu ducu obino medo baŋwu.

³⁴ Kur ibed wunu kede par apol pi diki, pien ceŋ a diki bino paro pire kene. Nino acel acel cannere rome.