Matayo 3 - Lango New Testament

Kop ame Lakana Abatija orabo

¹ I kare-nono Lakana Abatija obino kun rabo kop i tim me Judaya,

² kun kobo ni, “Ŋut wunu, pien loc me polo doŋ onoko ceggi.”

³ Pien man en baŋ o ame adwarpiny Icaya yam orabo pire ni, “Dwon baŋ o a redo i tim ni, Ger wunu yo pi Rwot, yik wunu gudo mere cuŋ atira.”

⁴ En Lakana rik ruko boŋo yer inaga, tweo pyere kede del, camere onwoŋo bonyo kede moo kic me tim.

⁵ Jo nwaŋ ya i Jerucalem, kede Judaya luŋ, kede lobo ducu ame tye i ŋet Jor baŋ, ciro, obino baŋe.

⁶ Gin tuco balgi, en batijagi i kulo Jordan.

⁷ Ka en oneno Oparicayo kede Ocadukayo apol bino ni batijagi, en okobbigi ni, “Wun itino ororo, ŋa ame okwenyorowu ni mano ber iriŋ wunu akemo Obaŋa ame bino tuno?

⁸ Nyak wunu doŋ nyig a myero me ŋut,

⁹ kur dok icak tamo wunu ni, ‘Otye kede kwarowa en Iburaim’; pien akobbiwu ni, Obaŋa tye kede teko me miyo gweŋe magi doko ikwae Iburaim.

¹⁰ Aman doŋ otyeko keto lee oko me toŋo lwit yen; yat acel acel a mom nyako nyige abeco, otoŋo, obolo i mac.

¹¹ “An abatijawu kede pii me iŋut wunu, ento tye ŋattoro ame alubo ŋea, en tek kata oko: an mom aromo mako warrere. En bino batijawu kede Cuny Acil, dok kede mac.

¹² Odero mere tye i ciŋe, en bino yiko laro mere aber, bino nyono kallere i dero, ento cuŋe, en bino waŋo oko kede mac a mom to.”

Yecu obatija

¹³ Yecu ocako ya oko i Galilaya, obino baŋ Lakana i dog Jordan, me Lakana batija en.

¹⁴ Lakana omito kwero oko, te kobo ni, “Yin a myero ibatija an, yin dok ibino baŋa?”

¹⁵ Yecu te dokke iye ni, “Kur ikwer amanni, pien myero ocob gin atye atir luŋ”; eka Lakana te ye.

¹⁶ A doŋ Yecu obatija, te ya i pii oyotoyot, polo te barre. Oneno Cuny Obaŋa obino calo amam, olyao piny, opoto i kome.

¹⁷ Dwonnoro te ya i polo kun kobo ni, “Man en Woda ame amaro, a yia yom i kome.”