Matayo 28 - Lango New Testament

Yecu ocer

¹ Ame cabit doŋ otum, ka ibayi i nino ame lubo cabit Ojudaya. Maliam me Magdala kede Maliam ocele ca owoto me neno lyel.

² Oyeŋo te yeŋo piny meicel, pien omalaika a Rwot oyitto piny ame oya i polo, obino ocoro kidi teŋe, te bedo i wie.

³ Nennere nen bala lutkot, rukkere tar bala pee.

⁴ Omyelo kom okur meicel pi lworo, ote doko bala jo oto.

⁵ Amalaika te juko mon, ni, “Kur ilwor wunu; pien aŋeo ni iyenyo wunu Yecu a yam oguro i kom yat.

⁶ En mom tye kan, pien ocer oko acalo rik okobo. Biye inen wunu ka buto mere.

⁷ Wot wunu oyotoyot, ikobbi wunu jo a lube ni, en otyeko cer oko i akina jo oto. En doŋ atelliwu yo me wot i Galilaya, ibino nene wunu kuno. Nen, atyeko tittiwu.”

⁸ Gin te ya oko oyotoyot i lyel kun otye i lworo kede yomcuny adwoŋ meicel, ote riŋo tito kop man baŋ jo a lube.

⁹ Cite nen, Yecu te rwatte kedgi, te motogi ni, “Oreme wunu ba,” Gin obino baŋe, ote mako tyene, ryebere piny i nyime.

¹⁰ Yecu te kobbigi ni, “Kur ilwor wunu; wot wunu, ititti wunu omegona ni gin owot i Galilaya, gin bino nena kuno.”

Okur odwoko ripot

¹¹ Ame gin awot oko, jo mogo i akina okur te wot paco me dwoko kop pi gin otimere baŋ olamdog adoŋo.

¹² Eka gin te cokere karacel kede odoŋe, oporo kop, ote miyo lim abup baŋ ocirikale,

¹³ ote cikogi ni, “Kobbi wunu jo ni, ‘Jo mere a lube obino dyewor, ote kwale oko ame wan onino.’

¹⁴ Ka kop-pi bino winyere baŋ aloc, wan obino bibito en, me cannoro kur pot i komwu.”

¹⁵ Gin te gamo gigi lim, ote timo kite acalo opwonyogi kede; omio kop man olal i akina Ojudaya, winyere naka tin.

Yecu ociko jo apar wie acel

¹⁶ Olub Yecu apar wie acel te wot i Galilaya, i wi kidi a rik en ocikogi.

¹⁷ Ka gin onene, oryebere piny i nyime, ento jo mogo okalo akala.

¹⁸ Yecu te bino baŋgi, te kop kedgi kun kobo ni, “Twer luŋ aluŋa i wi podo kede i lobo doŋ omio baŋa oko.

¹⁹ Doŋ ba, wot ilok wunu jo ducu odok jo a luba; ibatijagi wunu i nyiŋ Apap, kede Wod, kede Cuny Acil,

²⁰ kun ipwonyogi wunu mako gin ducu a rik acikowu. Nen ba, atye kedwu kare luŋ, ituno i agikki piny.”