Matayo 27 - Lango New Testament

Yecu i nyim Pilato

¹ Ka piny oru, olamdog adoŋo kede odoŋe me Ojudaya oporo kop karacel me neko Yecu;

² ote tweye, tere, ote miye baŋ Pilato aloc.

To a Juda

³ Juda ame rik oketo erupe i kome, ka oneno ni doŋ oŋolo kop oloo Yecu, oŋut oko, odwoko ciliŋ pyeradek ca baŋ olamdog adoŋo kede odoŋe,

⁴ kun kobo ni, “An abalo pi keto erupe i kom remo a mom i bal.” Ento gin te dokke iye ni, “Mannono kopwa bo? Koppi giri.”

⁵ En te bolo lim piny i ot Obaŋa, te wot deye oko.

⁶ Olamdog adoŋo te tero lim-mu kun okobo ni, “Pe myero oket i akina lim me ot Obaŋa, pien owino kede remo.”

⁷ Cite gin oporo kop karacel, ote wilo kede poto acwegulli, te bedo me yiko wele.

⁸ Pi mano ote lwoŋo poto-nu ni, Poto me Remo, anaka tin.

⁹ Kittono kop a yam adwarpiny Jeremia okobo ocobere kakare, ni, “Rik gin otero ciliŋ pyeradek, i wel a dano ame jo mogo i akina ikwae Icrael oŋolo wellere,

¹⁰ ote miyo poto acwe-gulli, acalo Rwot ocika.”

Pilato openyo Yecu

¹¹ Yecu ocuŋ i nyim aloc, aloc te penye ni, “Yin Abaka Ojudaya?” Yecu te kobo ni, “Yin ikobo giri.”

¹² Ento ka olamdog adoŋo kede odoŋe odote kede kop apol, en mom odok i kopporo.

¹³ Pilato te penye ni, “Yin mom iwinyo kop apol ame odoti kede-ni, ce?”

¹⁴ Ento kop ducu ame okelo en mom odok i moro acelloro; man omio aloc owuro meicel.

Oŋolli Yecu kop me to

¹⁵ I kare me ecuban aloc yam goŋnyi lwak abuccoro acel ame gin omito.

¹⁶ I kare-nono onwoŋo gin tye kede abucoro a ŋeye, a nyiŋe Baraba.

¹⁷ A doŋ gin ocokere karacel, Pilato te penyogi ni, “Imito ni agonnyiwu ŋa, Baraba, onyo Yecu ame olwoŋo Kricito?”

¹⁸ Pien en oŋeo ni gin omie baŋe ni nyeko.

¹⁹ Ame en doŋobedo i wi kom me ŋolo kop, dako mere ocwao kwena baŋe ni, “Kur itim ginnoro i kom dano-nu ame kite atira, pien tin i waŋ lek aneno can adwoŋ meicel pire.”

²⁰ Ento olamdog adoŋo kede odoŋe te cupo lwak oko me gin kwa ka Baraba, omi nek Yecu oko.

²¹ Aloc te dok penyogi ni, “I kom jo-ni aryo-ni imito wunu ni gonnyiwu ŋa?” Gin te dok iye ni, “Baraba.”

²² Pilato dok openyogi ni, “Kara Yecu ame olwoŋo Kricito abino timo nadi?” Gin ducu ote gamo ni, “Myero gure i kom yataria.”

²³ En te kobo ni, “Kara piŋo? Gin aŋo arac ame otimo?” Ento gin omedde i redo ni, “Myero gure i kom yataria!”

²⁴ Pilato ka oneno ni mom doŋatwerre, woo amedde ka ameda, te kwanyo pii, logo kede ciŋe i nyim lwak kun kobo ni, “Bal me remo a dano man mom i koma gira; kop mewu giwu.”

²⁵ Jo luŋ te gamo ni, “Remo mere bed i wiwa kede i wi ikwaewa.”

²⁶ Eka te doŋgonnyigi Baraba, te pwodo Yecu kede del, te miye me agura i kom yataria.

Cirikale oŋalo Yecu

²⁷ Cirikale aloc otero Yecu i Praitorion, eka ote coko eryoŋet megi ducu i nyime.

²⁸ Gin te gonyo boŋo mere oko i kome, ote ruke kede jor arema.

²⁹ Ote kado alukana me okuto, rwako i wie, ote keto ogada i ciŋe tuŋ cem. Orumo congi i nyime, oŋale kun okobo ni, “Oreme ba, Abaka Ojudaya!”

³⁰ Opato lao i kome, okwanyo ogada, ote jwato i wie.

³¹ A doŋgin otyeko ŋale, ote doŋgonyo jor i kome oko, ote ruke kede boŋŋi mere ikome, ote tere me wot gure i kom yataria.

Oguro Yecu i kom yataria

³² Ame onwoŋo gin adonyo oko, orwatte kede dano moro me Kurene nyiŋe Cimon, ote diye me ye yataria a Yecu.

³³ Ame gin otuno i kabedo a nyiŋe Golgota, ame te koppere ni, kabedo me Cogo Wic,

³⁴ ote miye kono ame orubo kede epio ni mati; ka obilo, mom oye mato.

³⁵ A doŋotyeko gure i kom yataria, ote poko boŋŋi me re oko i akinagi kun obolo iye kwir;

³⁶ gin te bedo piny kuno kure.

³⁷ Kop ame opide pire oguro malo i wie; ocoo ni, “Man Yecu, Abaka Ojudaya.”

³⁸ Ogure karacel kede oyakkogo aryo, dano acel i laŋete tuŋ cem, acel tun cam.

³⁹ Jo a nwaŋ abeo akato oyete kun oyeŋo wigi,

⁴⁰ ame okobo ni, “Yin ame iketo ot Obaŋa ite gero i nino adek, larre keni koŋ. Ka yin i Wot Obaŋa, yitto piny, iya i kom yat oko!”

⁴¹ Anaka olamdog adoŋo kede opwonycik kede odoŋe daŋ oŋale amannono kun okobo ni,

⁴² “Yam laro jo ocele, mom twero larre kene. En Abaka Icrael do; koŋ yitto piny, ya i kom yataria amanni, cite obino ye en.

⁴³ En geno Obaŋa, koŋ larre amanni, ka en mito; pien yam okobo ni, ‘An a Wot Obaŋa.’ ”

⁴⁴ Anaka oyak ame oguro karacel kede daŋ acoc amannono.

Yecu oto

⁴⁵ Cakere i caa abicel piny te doko col i wi lobo luŋ, tuno anaka caa aboŋwen.

⁴⁶ I akina me caa aboŋwen Yecu oredo kede dwon aloŋo ni, “Eli, Eli, lama cabaktani?” ame te koppere ni, “Obaŋana, Obaŋana, iweka piŋo?”

⁴⁷ Jo mogo ame ocuŋ kuno, ka gin owinyo, ote kobo ni, “Lo-ni alwoŋo Elia.”

⁴⁸ Cucuttono dano acel i akinagi oriŋo, te kwanyo abwaŋarot, te luto i kono awac, orwako i wi tir, te miye ni jwi.

⁴⁹ Jo okene okobo ni, “Weku koŋ onen ka Elia abino me larre.”

⁵⁰ Yecu te dok redo i dwon aloŋo, te doŋ jalo kwo mere oko.

⁵¹ Nen, boŋo icika me ot Obaŋa te yec oko i dul aryo, ocakere i malo, odwogo kede naka piny. Piny oyeŋere, lela-gu obarre oko;

⁵² dog lyele daŋ te yabere oko, kom jo acil apol a yam oto te cer oko.

⁵³ Gin odonyo oko i lyelegi; ame Yecu doŋ ocer, gin te wot i boma acil, jo apol onenogi.

⁵⁴ Adwoŋ me cirikale karacel kede jo a rik tye kede kun okuro Yecu, ka oneno piny oyeŋere kede gin ducu ame otimere, lworo omakogi atek, ote kobo ni, “Ateni, man kara onwoŋo atin Obaŋa!”

⁵⁵ Onwoŋo daŋ tye monnogo apol kuno ame obedo ka neno i teŋe; gin yam onwoŋo lubo Yecu cakere i Galilaya kun okonye.

⁵⁶ I akinagi onwoŋo tye Maliam me Magdala. Maliam tota a Yakobo kede Yucepu, kede toto otino a Jebedayo.

Oyiko kom Yecu i lyel

⁵⁷ Otyeno te bino dano moro ame alonyo, me Arimataya, nyiŋe Yucepu; en ikome daŋ onwoŋo alub Yecu.

⁵⁸ En owoto baŋ Pilato, okwao kom Yecu. Pilato te ciko ni mie.

⁵⁹ Yucepu otero kome, te boye kede cuka camanini acil,

⁶⁰ te pyele i lyellere ikome a pwod nyen ame oboro abora i lela, oloro kidi adwoŋ, ogacakino i doge, te wot oko.

⁶¹ Maliam me Magdala kede Maliam ocele-nu onwoŋo tye kuno, obedo gigi piny i nyim lyel.

Okur ame oguro lyel

⁶² Odiko mere, ame en nino a lubo ceŋ me Yikere, olamdog adoŋo kede Oparicayo te cokere karacel baŋ Pilato,

⁶³ ote kobbe ni, “Adwoŋ, doŋ opo ni dano ame agoba ca, ame rik pwod kwo okobo ni, ‘A doŋ nino adek okato abino cer oko.’

⁶⁴ Pi mannono, cik me gwok lyel ituno i nino me adekkere, me jo a lube kur bin dyewor ote bino kwalo oko, eka ote kobbi jo ni, ‘En doŋ ocer oko i akina jo oto’; mano mio bwol man me agikki bino doŋ bedo arac akato me agege.”

⁶⁵ Pilato te kobbigi ni, “Wun itye wunu kede okur; wotu, igwoke acalo itwero wunu.”

⁶⁶ Gin ote wot cego lyel aber a kun omwono anen iye i kom kidi, ote keto iye okur me gwoko.