Matayo 16 - Lango New Testament

Oparicayo okwao anyut

¹ Oparicayo kede Ocadukayo obino, ote bito Yecu ni nyuttigi anyut ame oya i polo.

² En te gamo doggi ni, “Wun ba, ka piny oyuto, ikobo wunu ni, ‘Piny abedo aber tin, pien polo nen oremakino.’

³ Kede odiko ni, ‘Tin kot bino cwe adwoŋ, pien polo nen oremakino, dok ocido icuc.’ Wun iŋeo wunu poko gin a nen i waŋ polo, aco anyut me kare ikwia wunu poko.

⁴ Lwagi jo areco kede omit mon a jo-ni yenyo anyut, ento mom obino miyogi anyuttoro, kono ka anyut a Yona keken.” En te pokere kedgi, te wot kan ocele.

Tobi Oparicayo kede me Ocadukayo

⁵ Ka jo a lube otuno loka ca, onwoŋo wigi owil tero kwonnoro.

⁶ Yecu te kobbigi ni, “Myero inen ni igwokere wunu i tobi Oparicayo kede i me Ocadukayo.”

⁷ Gin ote penyere kengi kengi, okobo ni, “Kara mom okelo ogati.”

⁸ Ka Yecu oŋeo, te penyogi ni, “Piŋo ipenyere wunu kenwu kenwu ni ogatiwu mom tye, wun jo ame iyeewu nok?

⁹ Mom ru iniaŋ wunu, onyo mom ipo wunu pi ogati abic ca mea jo tutumia abic? Rik ce icoko wunu opoŋ aditti adi?

¹⁰ Onyo ogati abiro mea jo tutumia aŋwen, rik ce icoko wunu dwoŋ adi?

¹¹ Piŋo mom iniaŋ wunu ni an mom akobbiwu kop i kom ogati ikome? Gwokere wunu i kom tobi Oparicayo kede i me Ocadukayo.”

¹² Ka doŋ gin oniaŋ aber ni en mom okobo ni gwokere i kom tobi me ogati, ento i kom pwony Oparicayo kede me Ocadukayo.

Kop ame Petero otuco i kom Yecu

¹³ Ka Yecu otuno i loba a ceggi kede Kaicaria Pilipi, openyo jo a lube ni, “Kara jo kobo ni Wot a dano obedo ŋa?”

¹⁴ Gin te gamo ni, “Jo mogo kobo ni Lakana Abatija, jo mogo ni Icaya, jo ocele ni Jeremia, onyo ŋat acel i akina odwarpiny.”

¹⁵ Te dok penyogi ni, “Kara wun kono ikobo wunu ni an ŋa?”

¹⁶ Cimon Petero te gamo ni, “Yin i Kricito, Wot Obaŋa akwo.”

¹⁷ Yecu te dok iye ni, “Itye kede winyo Cimon wota Yona! Pien mom ginnoro a tye i kom kede remo en onyutti kop man, ento Pappa a tye i polo.

¹⁸ Doŋ an akobbi ni, yin Petero, daŋ abino gero lwak jo oye an i kom lela man, dok tek me to mom bino loye.

¹⁹ Abino miyi ayab loc me polo; ginnoro ducu ame itweo i wi lobo obino tweyo anaka i wi polo, ginnoro ducu ame igonyo i wi lobo obino gonyo anaka i wi polo.”

²⁰ Ka doŋ te ciko jo a lube atek ni, kur gin tucci ŋattoro ni en e Kricito.

Yecu otito pi to mere

²¹ Cakere i kare-nono Yecu ogeo nyutti jo a lube ni en myero ewot i Jerucalem me ekany can apol i baŋ odoŋe kede olamdog adoŋo kede opwony-cik, gin bino neke, ento i nino me adekkere obino cere oko.

²² Petero otere teŋe te ero juke kun kobo ni, “Pe amannono, Rwot, yin mom obino timi kittono gire.”

²³ En te lokere kobbi Petero ni, “Dok i ŋea yin Catan! Yin idoko iciki tuŋ baŋa, pien yin mom ilubo tam Obaŋa, ento ilubo mea dano.”

²⁴ Yecu te kobbi jo a lube ni, “Ka dano moro mito luba, myero koŋ oge kwerre kene, tiŋ yataria mere, luba.

²⁵ Pien dano ame mito laro kwo mere, bino rwenyo kwo mere arwenya, ento dano ame rwenyo kwo mere pira, bino nwoŋo.

²⁶ Kara bino konyo dano kede ŋo ka ocamo lobo luŋ kun kwo mere omao oko? Onyo ŋo ame dano bino miyo pi dwoggo kwo mere?

²⁷ Pien Wot a dano bino dwogo kede kwogo a Pappere karacel kede omalaika mere; i kare-nono bino culo dano acel acel kun lubo kit tic a yam etio.

²⁸ Ateni akobbiwu ni, tye jo mogo ame ocuŋ kan ame mom bino bilo to ka mom ru gin oneno Wot a dano a kun abino i loccere.”