Matayo 15 - Lango New Testament

Kite a jo adoŋo

¹ Oparicayo kede opwony-cik obino baŋ Yecu a kun gin oya i Jerucalem, ote penye ni,

² “Piŋo joni a lubi mom omako kite a jo adoŋo? Pien ka gin ocem, mom ologo ciŋgi?”

³ En te dok iye ni, “Kara piŋo wun daŋ kitewu omonowu mako cik Obaŋa?

⁴ Pien Obaŋa rik okobo ni, ‘Wor pappi kede totti’, dok ni, ‘Dano a yeto pappere onyo tottere myero nek oko,’

⁵ Ento wun ikobo wunu ni, ‘Ka ŋattoro okobbi pappere onyo tottere ni, Gin a kono akonyi kede doŋ amio oko baŋ Obaŋa, en mom myero wor pappere.’

⁶ Pi kitewu imio wunu kop Obaŋa oto nono.

⁷ Wun ogoba! Adwarpiny Icaya rik okobo aber i komwu ni,

⁸ ‘Rok-ki wora i doggi nono, cunygi kara bor keda;

⁹ ento owora nono, pwony ame gin opwonyo obedo kite a dano.’ ”

Gin abalo jo

¹⁰ En te cwano lwak baŋe, okobbigi ni, “Winy wunu, daŋ iniaŋ wunu iye.

¹¹ Gin a donyo i dog mom balo jo, kono gin a ya i dog en abalo jo.”

¹² Eka jo a lube te bino baŋe kobbe ni, “Mom iŋeo ni Oparicayo yigi owaŋ ka gin owinyo kop ame yin ikobo?”

¹³ Yecu odok iye ni, “Gin ducu ame opito, ka Pappa i polo mom opito, obino puto oko.

¹⁴ Wekgi obedi. Gin otowaŋ ame peo otowaŋ wadgi. Ka atowaŋ peo atowaŋ wadgi, gin aryo ducu obino rette i bur.”

¹⁵ Ento Petero te kobbe ni, “Gonnyiwa carokoppono koŋ.”

¹⁶ En te kobo ni, “Wun daŋ kara pwod pe iniaŋ wunu?

¹⁷ Mom iŋeo wunu ni, jami ducu ame donyo i dog kato i cin-yic, te kato oko?

¹⁸ Ento gin ame ya i dog, nwoŋo oya i cuny, mannono balo dano.

¹⁹ Pien gin ame oya i cuny, en tam areco, nek, mito mon a jo ocele, coco kwo, bedo caden me goba, ayet.

²⁰ Magu gin gin abalo dano; ento camo cem a mom ologo ciŋ mom balo ŋattoro.”

Iyee a dako jo Kanaan

²¹ Yecu oya i kuno, owoto i lobo me Turo kede Cidon.

²² Dannoro me Kanaan ame oya i tuŋ kuno obino ame aredo areda ni, “Ama Rwot, akwar Daudi, tima kica ba; nyara tye kede cen, wune meicel.”

²³ En mom ogamo dog dan-nu kadi acelloro, omio jo a alube obino baŋe ote kwaye ni, “Ryem dakonu teŋe, pien tye a redo i ŋewa.”

²⁴ Yecu te gamo ni, “An rik oora ka baŋ rommi a rik orwenyo me doggola Icrael.”

²⁵ Dan-nu te bino rumo i nyime kun kobo ni, “Ama Rwot, konya.”

²⁶ Yecu dok te kobbe ni, “Mom ber wok ikwanyo cem itino, ote yuyi gwogi.”

²⁷ Dako te gamo ni, “Mannono ikobo kakare, Rwot; ento otino gwogi me te meja daŋ camo ŋid cem a poto i te meja a wegigi do.”

²⁸ Yecu te kobe ni, “Yin dako, iyeeni dwoŋ. Myero bed baŋi kite acalo imito.” Nyare te can oko i caa-nono.

Yecu ocaŋo otwo apol

²⁹ Ka man otum, Yecu oya i kuno, odupo dog nam me Galilaya, te yito i wi kidi, te bedo piny kuno.

³⁰ Lwak ecipan te bino baŋe kun okelo jo a tyengi kede ciŋgi oŋwalo, kede otowaŋ, jo alebgi oto, kede otwo acele apol, ote pyelogi piny i ŋet tyen Yecu, en ocaŋogi.

³¹ Omio lwak owuro meicel ka oneno jo a lebgi oto oko bo, jo a ciŋgi oŋwalo ocaŋ, jo a tyengi oŋwalo owoto, anaka otowaŋ oneno piny; gin ote pako Obaŋa a jo Icrael.

Yecu opito lwak tutumia aŋwen

³² Yecu te lwoŋo jo a lube baŋe, te kobbigi ni, “Lwak ocona meicel, pien gin orio baŋa odoko nino adek twal, cite mom otye kede cammoro. Pe amito ni acwagi paco kun yigi nono, kec owek bwoyogi iyo.”

³³ Jo a lube te dok iye ni, “Kara obino nwoŋo ogati kwene ame romo pito lwak apol rom man a kun kan tim?”

³⁴ Yecu te penyogi ni, “Itye wunu ogati adi?” Gin ote gamo ni, “Abiro, kede rece anok atitino.”

³⁵ Ociko lwak ni bed piny,

³⁶ omako ogati abiro kede rece, ka doŋ opwoo, onyinyilo, omio baŋ jo a lube, eka jo a lube te miyo baŋ lwak.

³⁷ Gin ducu ocamo, oyeŋ, ote coko ŋid cam ame oloogi, oromo dwoŋ abiro opoŋ.

³⁸ Jo ocamo onwoŋo romo co tutumia aŋwen, a kun mom okwano iye mon kede itino.

³⁹ Icennere en ociko lwak, te donyo i yee, owoto i loba me Magadan.