Matayo 10 - Lango New Testament

Yecu oyero jo apar wie aryo

¹ Olwoŋo jo mere a lube apar wie aryo baŋe, te miyogi twer me ryemo cen areco, kede me caŋo kwon too ducu anaka goro-gu.

² Nyiŋ okwena apar wie aryo-nono gin ene: me agege Cimon, ame alwoŋo ni Petero, kede Anderiya ominnere; Yakobo wot a Jebedayo gin kede ominnere Lakana;

³ Pilipo kede Bartolomayo; Tomaci kede Matayo ara-ocoro; Yakobo wot a Alipayo, kede Tadayo;

⁴ Cimon me eryoŋet apyem i abumente, kede Juda me Keriot, ame cen oketo erupe i kom Yecu.

Yecu ooro jo mere apar wie aryo

⁵ Jo apar wie aryo-nu Yecu oorogi kun cikogi atek ni, “Kur iwot wunu iyo Orok, kur idony wunu i boma Ocamaria daŋ;

⁶ ento wot wunu ka baŋ rommi a yam orwenyo me doggola Icrael.

⁷ Ka iwot wunu, rabu kop kun ikobo wunu ni, ‘Loc me polo doŋ onoko ceggi.’

⁸ Caŋ wunu otwo, cer wunu jo oto, lony wunu odobo, ryem wunu cen; omiowu nono, wun daŋ mi wunu nono.

⁹ Kur iter wunu jabu, onyo ryal onyo mola me arwaka i del pyerwu,

¹⁰ kadi icao me wot, kadi boŋŋi aryo, kadi war tyen, kadi abiro; pien atic myero mi cammere.

¹¹ I boma onyo i paco ducu ame ibino donyo wunu iye, peny wunu dano a tye iye, a kite mere ber, bed wunu baŋe ituno ka ibino ya wunu i kuno.

¹² Ka idonyo i ot, mote wunu.

¹³ Ka ot-tu myero, kwaye wunu kuc; ento ka mom myero, wek kucwu dwog baŋwu.

¹⁴ Dano a mom bino jolowu, onyo a mom winyo kopwu, a doŋ iya wunu i ot-tu onyo i boma-nu, teŋ wunu apua i tyenwu oko.

¹⁵ Ateni akobbiwu ni, i nino me ŋolo kop can me Codoma kede Gomora bino bedo itikatika, kato me boma-nono.

Libo ame bino bedo i kare me anyim

¹⁶ “Nen ba, an acwaowu bala rommi i kin epet; doŋ bed wunu i ryeko bala twol, dok aboŋo bal bala amam.

¹⁷ Ento gwok wunu jo: pien obino terowu i okiko, obino pwodowu i del i kacokeregi,

¹⁸ obino terowu i nyim oloc kede i nyim obakki-gu pira, me kobo kop me caden baŋgi kede baŋ Orok.

¹⁹ Ka ce oterowu i okiko, kur ibed wunu i par apol, ni, ibino wunu dok iye i yo aŋo, onyo ibino wunu kobo niŋo? Pien caa-nono obino miyowu kop ame ibino kobo wunu;

²⁰ pien pe wun en ibino kop wunu, ento Cuny a Papawu en ame bino kop i dogwu.

²¹ Omego bino miyo omego me aneka, apap bino miyo atinnere, otino bino twarre i kom onywalgi kun miogi me aneka.

²² Jo me rok luŋ bino dagowu pi nyiŋa. Ento ŋat ame kanyakino ituno i agikki, en bino larre.

²³ Ka olibowu i boma man, riŋ wunu i boma ocele; pien ateni akobbiwu ni, pe ibino tyeko wunu boma ducu me i Icarel ame nwoŋo Wot a dano mom ru odwogo.

²⁴ “Ŋat a pwod pwonyere apwonya mom bedo adwoŋ akato ŋat a pwonye, anaka kadi opii mom bedo adwoŋ akato adwoŋŋere;

²⁵ daŋ rom kede ŋat ame opwonyo ka odoko acalo ŋat a pwonye, dok daŋ rom opii ka odoko acalo adwoŋŋere. Ka gin olwoŋo won ot ni Beeljebul, jo paco mere obino lwoŋogi kede nyiŋ arac a rom mene?

Ŋat a myero alwora

²⁶ “Pi mannono, kur ilworgi wunu; pien mom tye ginnoro ame owumo a mom obino yabo kannaler, kadi gin ame okano a mom bino ŋeye.

²⁷ Kop ame an akobbiwu i piny acol, kob wunu i ceŋ; dok gin ame amuŋŋiwu i yitwu, rab wunu koppere i wi biye.

²⁸ Kur ilwor wunu jo ame neko kom ento mom otwero neko tipo; ento twora ilwor wunu Obaŋa ame tye kede twer me neko tipo kede kom i Geena.

²⁹ “Acur aryo mom ocato cente apar? Ento mom tye moro i akinagi ame poto piny a kun Papawu mom ŋeo.

³⁰ Ento wun anaka yer wiwu okwanogi iweŋ.

³¹ Doŋ kur ilwor wunu; pirwu tek meicel akato acur apol.

Tuco nyiŋ Kricito i nyim jo

³² “Pi mannono, dano acel acel ame bino tuco nyiŋa i nyim jo, an daŋ abino tuco nyiŋe i nyim Pappa ame tye i polo;

³³ ento dano acel acel ame bino kwera i nyim jo, an daŋ abino kwere i nyim Pappa ame tye i polo.

Yecu okelo popoka i kin jo

³⁴ “Kur itam wunu ni abino me kelo kuc i lobo; mom abino me kela kuc, ento pala me romo.

³⁵ Pien an abino poko akina dano kede pappere, dok nyako kede tottere, kede ci-wod gin kede tattere.

³⁶ Dok okwor a dano bino bedo jo me paco mere.

³⁷ Dano ame maro pappere onyo tottere kata mom romo bedo danona; kede dano ame maro wode onyo nyare kata, mom daŋ romo bedo danona.

³⁸ Dano a mom yeo yataria mere, te lubo kede ŋea mom romo bedo danona.

³⁹ Dano ame onwoŋo kwo mere, bino rwenyo kwo mere arwenya; ento ŋat ame rwenyo kwo mere pira, bino nwoŋo.

Mot ame obino nwoŋo

⁴⁰ “Ŋat ame jolowu, nwoŋo ojolo an; ŋat a jolo an, ojolo ŋat ame oora.

⁴¹ Ŋat ame jolo adwarpiny pi nyiŋ adwarpiny, bino gamo mot acalo adwarpiny; ŋat ame jolo dano a kite atira pi nyiŋ dano a ki te atira, bino gamo mot acalo dano a kite atira.

⁴² Dok ŋattoro ame bino miyo ikopo me pii amata aŋic baŋ ŋat acel i akina jo-ni, pien en obedo dano a luba, atittiwu ateni ni, mot mom bino rwenyo i baŋe kadi acelloro.”