Marako 3 - Lango New Testament

Dano ame bade omito

¹ Yecu dok odonyo i kacokere, ame onwoŋo tye iye dano ame bade omito.

² Gin okie ka ce bino caŋe i ceŋ cabit, me ote pide.

³ En okobbi dano ame bade omito ni, “Ya icuŋ i dyere.”

⁴ Te penyogi ni, “I ceŋ cabit cik ye ni tim iye gin aber onyo gin arac, lar kwo onyo nek aneka?” Gin oliŋ aliŋa.

⁵ Yecu oŋoloro waŋe i akinagi kede akemo, kun yie waŋ pi nwaŋcunygi; okobbi dano a bade omito ni, “Rye badi oŋ.” En oryeo bade, te caŋ oko.

⁶ Oparicayo te ya oko i ot, ote poro kop pio pio kede jo a Kerode kite a myero neke kede.

Lwak jo ecipan i dog nam

⁷ Yecu te wot oko karacel kede jo a lube, obino i dog nam. Lwak jo ecipan ame oya i Galilaya olube, anaka jo ame oya i Judaya,

⁸ kede i Jerucalem, kede ldumaya, kede loka Jordan, kede i lobo ame omano Turo kede Cidon. Lwak magi luŋ cen obino baŋ Yecu pien gin owinyo gin ame en bedo ka tiyo.

⁹ En okobbi jo a lube ni myero yik yee atidi pire, me lwak kur dic;

¹⁰ pien onwoŋo en ocaŋo jo apol, en omio jo ducu a komgi lit odiye i kome me omule.

¹¹ Ka cen areco onene, gin oryebere i nyime, okok kun okobo ni, “Yin giri i Wot Obaŋa.”

¹² Ojukogi ni kur lal rwoŋe baŋ jo.

Yecu oyero jo mere apar wie aryo

¹³ Yecu oyito malo i wi kidi, ocwano jo ame emito baŋe; gin obino baŋe.

¹⁴ Oyero jo apar wie aryo me bed karacel kede, dok me orgi pi rabo kop Obaŋa,

¹⁵ kede me bedo kede twer me ryemo cen.

¹⁶ Jonono ene: Cimon ame ocako nyiŋe Petero;

¹⁷ Yakobo wot a Jebedayo, kede Lakana omin a Yakobo; ocako nyiŋgi ni Boanergi, te koppere ni, itino me mor a kot;

¹⁸ kede Anderiya kede Pilipo, kede Bartolomayo, kede Matayo, kede Tomaci, kede Yakobo wot a Alipayo, kede Tadayo, kede Cimon me eryoŋet a jo a pyem i abumente,

¹⁹ kede Juda me Keriot ame cen oketo erupe i kome. En odok paco.

Yecu gin kede Beeljebul

²⁰ Lwak dok te cokere, ame Yecu kede jo a lube mom onwoŋo ka re me camo cem.

²¹ Ka jo turgi owinyo, gin te bino me make, pien okobo ni, “En ajarapoa.”

²² Opwonycik ame oya i Jerucalem te kobo ni, “En tye kede Beeljebul,” dok ni, “En ryemo cen pi twer a Beeljebul, adwoŋ me cen.”

²³ En ocwanogi baŋe, te kop kedgi i carokop, ni, “Catan twero ryemo Catan niŋo?

²⁴ Ka loc opokere yie aryo, loccono mom twero cuŋ.

²⁵ Dok ot ka opokere yie aryo, ot-tu mom twero cuŋ.

²⁶ Ka Catan oero romo i kome kene kene, daŋ opokere kene, pe twero cuŋ, gik oko.

²⁷ Ento mom tye dano moro a twero donyo i ot atekkommoro, te yako jami mere, a mom koŋ ogeo tweyo atekkom eka ete yako ode.

²⁸ “Ateni akobbiwu ni, bal luŋ a jo tiyo, kede koppogo ame jo yeto kede Obaŋa, obino timogi iye kica;

²⁹ ento ŋat a yeto Cuny Acil mom obino timo kica, en nwoŋo otimo bal a bedo i kome nakanaka

³⁰ Pien gin okobo ni, En tye i cen arac.”

Tota a Yecu kede omego mere

³¹ Tota a Yecu kede omego mere obino, ocuŋ oko, ote cwayo kwena baŋe, olwoŋe.

³² Onwoŋo lwak obedo kun ogure dyere; ote kobbe ni, “Neno, totti kede omegoni tye oko, gin a yenyi.”

³³ En te dokkigi iye ni, “Kara totta kede omegona gin ŋa?”

³⁴ Oŋoloro waŋe i kom jo ame obedo piny ogure, te kobo ni, “Nenu ba totta kede omegona.

³⁵ Dano a tio gin ame Obanga mito en ominna, en aminna kede totta”