Luka 21 - Lango New Testament

Mot ame dako a cware oto omio

¹ Yecu ka otiŋo waŋe malo, oneno olonyo tye abolo motgi i canduk me coko lim.

² Te neno daŋ dako moro ame cware oto, ame acan, obolo ka cente aryo keken.

³ Okobo ni, “Akobbiwu ateni ni mano, dako man a cware oto, ame acan, obolo ame okato jo luŋ.

⁴ Pien gin ducu obolo mot ame gin ogito agita i kom limgi adwoŋ, cite en i kom cannere obolo gin luŋ ame tye baŋe, ame konyo kwo mere.”

Yecu otito pi keto ot Obaŋa

⁵ Jo mogo obedo ka kobo kop i kom ot Obaŋa, ni kiddi abeco, kede mot ame jo omio, omio doŋ nen aber meicel. Yecu okobo ni,

⁶ “Jami magi ducu ame ineno wunu-ni, kare bino romo ame mom obino weko kidi moro acel ame ododde i wi wadgi, a mom ocoro piny.”

Anyuttogo kede awuna

⁷ Gin ote penye ni, “Apwony, kara man bino bedo awene ba? Dok gin aŋo ame bino nyuto ni ginnono doŋ ceggi timere?”

⁸ En ogamo ni, “Gwokere wunu ba, ŋattoro kur rwenywu be; pien jo apol bino bino i nyiŋa ame obino kobo ni, ‘An ennono,’ dok ni, ‘Kare doŋ onoko ceggi!’ Kur ilubugi.

⁹ Dok ka ibino winyo wunu pi mony kede arubaruba, kur ibed wunu kede lworo, pien mano myero tek timere, ento agikki mom abino piopio.”

¹⁰ Icennere te dok kobbigi ni, “Rok bino romo kede rok, loc bino romo kede loc ocele.

¹¹ Oyeŋo apopol bino yeŋo piny atek meicel, kec kede two areco bino poto i kabedo apol. Gin a mio lworo mako jo, kede anyuttogo adoŋo, bino nen kun ya i polo.

¹² Cite a mom ru ginnono ducu otimere, koŋ obino makowu, obino wunowu, obino terowu i kacokere, obino tweyowu i buc, obino kelowu i nyim rwode kede i nyim oloc pi nyiŋa.

¹³ Man bino bedo kare baŋwu me rabo kop me caden.

¹⁴ Pi mano, mok wunu i tamwu ni, kur iru tamo wunu con kite ame ibino wunu dok kede iye,

¹⁵ pien abino miyowu twer me kop, kede ryeko daŋ, ame ŋattoro i akina okworwu mom bino bedo i twer me cuŋ i nyime onyo pyem kede.

¹⁶ Anaka onywalwu kede omegowu kede oturwu kede owotewu daŋ obino keto erupe i komwu, jo mogo i akinawu daŋ obino nekogi.

¹⁷ Jo luŋ bino dagowu pi nyiŋa.

¹⁸ Ento yer wiwu acelloro mom bino rwenyo.

¹⁹ Ka ikanyakino wunu, ibino wunu nwoŋo kwowu.

Yecu otito pi keto Jerucalem

²⁰ “Ento ka ineno wunu mony omano Jerucalem, ŋe wunu ni mano, kare me kete doŋ onoko ceggi.

²¹ I karenono, jo a tye i Judaya myero riŋ oko i wi kiddi, jo ame tye paco myero riŋ oko, kede jo ame tye i akina pacci kur dok dony i Jerucalem;

²² pien kare-nono bino bedo kare me culo kwor, kede me cobo kop ducu ame nwaŋ ocoo.

²³ Mon a yac bino neno can i kare-nono, kede gin ame doto itino! Pien can adwoŋ bino poto i lobo, kede akemo adwoŋ bino poto i kom rok man.

²⁴ Obino nekogi kede pala, obino terogi me bedo opii i akina rok ducu, Orok bino nyono Jerucalem piny, ituno ka kare Orok ocobere kakare.

Dwogo a Wot a dano

²⁵ “Anyuttogo bino nen i kom cen kede i kom dwe kede i kom acer, rok apol me wi lobo bino kumo kun cunygi tye i oguro, pi mor me nam kede tagere mere.

²⁶ Jo bino wille pi lworo, ka gin otamo pi gin ame abino i kom lobo; pien teko ame i polo bino yeŋere.

²⁷ Eka jo bino neno Wot a dano kun bino iyi pol, kun tye kede teko kede kwogo adwoŋ.

²⁸ Ka gin-ni oero timere, nen wunu malo, tiŋ wiwu malo, pien kare me lakorowu nwoŋo doŋ onoko ceggi.”

Pwony ame oya i kom oduro

²⁹ Dok okobo carokop baŋgi ni, “Koŋ inen wunu oduro, kede yen ocele luŋ.

³⁰ Ka doŋ pote olot, ame ineno wunu, iŋeo wunu kenwu ni oro doŋ ceggi.

³¹ Amannono wun daŋ, ka ineno ginnono atimere, ber iŋe wunu ni, loc Obaŋa doŋ onoko ceggi.

³² Ateni akobbiwu ni mano, lwagi jo man mom bino tum, ituno ka koŋ mannono otimere.

³³ Polo kede lobo bino tum oko, ento kop ame an apwonyo mom bino tum.

Bed ame ineno wunu!

³⁴ “Cite ber igwokere wunu kenwu ba, cunywu kur dok anwaŋ pi woro me cem kede mero koŋo, kede pi tamo pi kwo man, me nino-nono kur bin tuwu atua, te rette bala kumma;

³⁵ pien bino tuno i kom jo ducu ame bedo i wi podo.

³⁶ Bed ame ineno wunu kare luŋ, kun ikwao wunu Obaŋa atek me inwoŋu teko me bwot i kom ginnono ducu ame bino timere, kede me cuŋ i nyim Wot a dano.”

³⁷ Nino ducu en obedo ka pwony i ot Obaŋa dyeceŋ, ento dyewor en woto buta i wi kidi ame olwoŋo kidi me Jeituni.

³⁸ Odiko jo luŋ dilo, bino baŋe i ot Obaŋa ka winyo koppere.