Lakana 16 - Lango New Testament

¹ “Atyeko kobbiwu kop man me kur ipot wunu.

² Gin bino ryemowu oko i kacokere; kare bino tuno, jo ame nekowu bino tamo ni gin otye otic pi Obaŋa.

³ Gin bino timo man i komwu pien gin mom oŋeo Papo, kadi an.

⁴ Ento akobbiwu kop magi, me wek ka kare magi bino tuno, ipo wunu ni rik atittiwu pirgi. “Rik mom akobbiwu kop magi i acakki, pien onwoŋo pwod atye baŋwu.

Tic a Cuny Acil

⁵ Ento amanni adok doŋ baŋ ŋat a rik oora. Mom tye ŋattoro i akinawu ame openya ni, ‘Kara iwot kwene?’

⁶ Cunywu opoŋ kede kumo pien akobbiwu kop magi.

⁷ Ento atye ka tittiwu kop me ateni, ni, bino bedo ber baŋwu ka an awoto; pien ka mom awoto, Akony mom bino tuno baŋwu, ento ka awoto, abino ore baŋwu.

⁸ Ka en otuno, bino nyutti lobo ni niaŋgi i kom bai, kite atir kede ŋolo kop mom tye kakare:

⁹ niaŋgi mom tye kakare i kom bai, pien gin mom oye an;

¹⁰ i kom kite atir, pien an adok oko baŋ Papo, mom dok ibino wunu nena;

¹¹ i kom ŋolo kop, pien aloc me lobo man doŋ otyeko ŋolle kop oko.

¹² “Pwod atye kede kop apol me akoba baŋwu, cite amanni mom itwero wunu kanyo;

¹³ ento Cuny me ateni ka bino tuno, bino telowu i ateni luŋ; pien mom bino kop pire kene, ento gin ducu ame en bino winyo, bino kobo baŋwu, bino tittiwu gin ame bino timere i nyim.

¹⁴ En bino keto kwogo i koma, pien bino kwanyo gin i tuŋ baŋa, te nyuttiwu.

¹⁵ Gin ducu ame Papo tye kede, ducu mega; en omio akobbiwu ni, en bino kwanyo gin i tuŋ baŋa, te nyuttiwu.

Wageunywu bino lokere doko me lelo

¹⁶ “Kare odoŋ anok, mon dok ibino nena wunu; dok kare odoŋ anok ibino wunu nena.”

¹⁷ Jo mogo i akina jo mere a lube te kop kengi kengi ni, “Man ŋo ame en akobbiwa, ni, ‘Kare odoŋ anok, mom ibino wunu nena, dok kare odoŋ anok ibino wunu nena’; dok ni, ‘Pien adok baŋ Papo?’ ”

¹⁸ Gin te kobo ni, “Kara man te koppere kono ŋo, ni, ‘Kare odoŋ anok?’ Wan giwa mom oniaŋ i gin ame en tye a ko bo.”

¹⁹ Yecu oŋeo ni gin amito penye, omio en te kobbigi ni, “Itye wunu ka penyere kenwu pi kop ame woki akobbiwu ni, ‘Kare odoŋ anok, mom dok ibino nena wunu; dok kare odoŋ anok, ibino wunu nena?’

²⁰ Ateteni akobbiwu ni, ibino wunu koko, ibino wunu kumo, ento lobo bino lelo; cunywu bino wan, ento wancunywu bino lokere doko me lelo.

²¹ Ka dako tye a rem, kumo pien kare mere doŋ oromo; ento ka doŋ onywal oko, mom dok po i can, pien nwoŋo cunye yom pi nywalo dano i lobo.

²² Amanni cunywu waŋ, ento abino nenowu doki, ibino wunu lelo kede yomcuny, mom tye ŋattoro ame bino kwanyo yomcuny wu i baŋwu.

²³ I nino-nono mom ibino wunu penya pi kopporo. Ateteni akobbiwu ni, ka ce ibino wunu kwayo ginnoro ibaŋ Papo i nyina, en bino miyowu.

²⁴ Tuno amanni yam mom ru ikwao wunu ginnoro i nyina; kwa wunu, ibino wunu nwoŋo, me ipoŋ wunu i yomcuny.

An doŋ aloo lobo

²⁵ “Kop man akobbiwu i carokop; kare bino tuno, mom dok abino kop kedwu i carokop, ento abino tittiwu kop i kom Papo kannaler.

²⁶ I nino-nono ibino wunu kwayo Papo i nyina; mom akobbiwu ni an abino kwayo Papo pirwu;

²⁷ pien Papo ikome marowu, pien wun imara wunu dok daŋ iye wunu ni an aya i baŋ Papo.

²⁸ An aya i baŋa Papo, abino i lobo; dok aweko lobo, adok baŋ Papo.”

²⁹ Jo me re a lube te kop ni, “Nen, aman doŋ ikobo kannaler, mom i carokop.

³⁰ Aman wan doŋ oŋeo ni yin iŋeo jami ducu, mit me penyi doŋ mom; pi man wan oye ni yin iya i baŋ Obaŋa.”

³¹ Yecu te gamo doggi ni, “Aman doŋ iye wunu?

³² Kare bino tuno, doŋ otuno oko, ame ibino wunu ket, ŋat acel acel i paco mere, ibino weka wunu kena. Ento mom atye kena, pien Pappa tye keda.

³³ Akobo man baŋwu me ibed wunu kede kuc i an, i lobo wun itye wunu kede can; ento di wunu cunywu, an doŋ aloo lobo.”