Jo Roma 5 - Lango New Testament

Gin ame oya i kwano dano ni kite atir

¹ Pi mannono, acalo rik doŋ okwanowa ni kitewa atir pi iyee, otye wunu doŋ i kuc i nyim Obaŋa, pi Rwotwa Yecu Kricito.

² Pire oyabbiwa yo me tuno i kom winyo man ame ocuŋ iye-ni, kun oŋatte i gen a wan otye kede me bedo i kwogo baŋ Obaŋa.

³ Mom mano keken, wan oŋatte anaka i cannogo apapat ame oneno, kun oŋeo ni, neno can kelo kanyakino,

⁴ kanyakino mio opwoo kitewa, eka pwoyo kitewa-ni, te miyo obedo kede gen.

⁵ Genwa-nono mom bino ke nono, pien Cuny Acil doŋomio oonyo mar Obaŋa i cunywa.

⁶ Pien a rik wan pwod ogoro, a doŋkare oromo, Kricito te to pi jo a mom lworo Obaŋa.

⁷ Kadi pi dano a kite atir, bedo tek meicel dano ito pire. Gwok onyo ka dano moro aber, ŋattoro twero diyo cunye me to pire.

⁸ Ento Kricito oto pirwa a nwaŋ wan obalo; mannono nyuto kite mar ame Obaŋa tye kede baŋwa.

⁹ Acalo bala wan onyoni doŋ okwanowa ni kitewa atir pi remo mere, akato wok wan obino larre pire i kom akemo Obaŋa.

¹⁰ A pwod wan okwor Obaŋa, en rik odwoggowa baŋe, pi to a Wode; ka amannono, a doŋodwoggowa baŋe, obino larre wunu akato wok pi kwo a Wode.

¹¹ Mom ennu keken, ento daŋ otye ka ŋatte i Obaŋa pi Rwotwa Yecu Kricito, pien en ame omio doŋ odwoggowa baŋ Obaŋa.

Adam kede Kricito

¹² Pi mannono, acalo bal nwaŋ obino i lobo pi dano acel, eka to te bino pi bal, amannono daŋ to te lal i akina a jo luŋ, pien jo luŋ obalo.

¹³ Onwoŋo bal doŋtye i lobo con a mom ru omio cik, ento kan a cik mom iye, bal daŋ mom okwano i wi ŋattoro.

¹⁴ Cite to obedo i locere geye i kom Adam ituno kede i kom Muca, te loyo anaka jo a nwaŋ mom otimo bal a rom i mea Adam, a rik oturo cik ame omie. Adam en anyut me cimo ŋat a mito bino.

¹⁵ Ento tic Obaŋa me kica pe rom aroma i bal a Adam; pien kadi bed jo apol rik oto pi bal a dano acel ca, akato wok kica Obaŋa, kede mot me nono ame obino pi kica a dano acel-li, en Yecu Kricito, onya oromo lwak jo apipim.

¹⁶ Doki mot me nono pe rom kede bal a dano acel ca; pien pi bal a dano acel ca omio oŋolo kop oloo jo, cite tic me kica ame olubo bal apol okelo loyo kop.

¹⁷ Pi bal a dano acel omio to obedo kede loc, pi dano acel ca; akato wok jo ame onwoŋo kica apipim, kede mot me nono ame omio okwanogi ni kitegi atir, obino bedo kede kwo kede loc, pi dano acel-li, en Yecu Kricito.

¹⁸ Doŋ kite acalo bal a dano acel omio kop oloo jo luŋ, amannono daŋ, tic me kite atir a dano acel okelo loyo kop kede kwo pi jo luŋ.

¹⁹ Pien acalo pi dano acel a mom obedo kede winy omio jo apipim odoko obalo, amannono daŋ pi winy a dano acel jo apipim obino kwanogi ni kitegi atir.

²⁰ Cik rik odonyo iye me nyayo bal; ento kan a bal onya iye, en ame kica daŋ te nya iye adwoŋ akato.

²¹ Amannono, kite acalo bal rik oloo loc i to, kica daŋ myero lo loc pi kwano jo ni kitegi atir, me gin onwoŋ kwo a perakino nakanaka, pi Yecu Kricto Rwotwa.