2 Temoteo 4 - Lango New Testament

¹ Aciki i nyim Obaŋa kede i nyim Kricito Yecu ame bino ŋolo kop a jo akwo kede jo oto, dok pi dwogo mere kede pi loccere ni mano,

² rab kop Obaŋa, cuŋ iye atek i kare aber kede i kare arac, mi jo niaŋ aber, jukgi, kun idio cunyi i pwony i kare luŋ.

³ Pien kare tye abino ame jo mom dok bino kanyo pwony me ateni, cite obino lubo mitgi kengi, kun ocoko opwony ame twero pwonyogi gin a gin mito winyo.

⁴ Gin bino loko ŋegi i winyo kop me ateni, ote gak oko wirre i kop me icina.

⁵ Cite yin ba, bed ame igwokere i kare luŋ; kanyakino ka can opoto, ti tic me rabo amut aber, cob ticci ducu kakare.

⁶ An doŋ jo ceggi onyo remona acalo gin ame oonyo i wi keno lam; karena doŋ oromo me ya oko i kwo man.

⁷ Aromo romo aber i lweny, acobo doŋ ŋwecca, agwoko daŋ iyee.

⁸ Aman doŋ okano pira mot me kite atir, ame Rwot a ŋolo atir, bino miya i Nino-naca; mom baŋa keken, cite daŋ baŋ jo luŋ ame doŋ cunygi tye aparo dwogo mere.

Cik a Paulo pi jami mere mogo

⁹ Diye atek, iru bino baŋa.

¹⁰ Pien Dema doŋ oweka oko pi maro jami me wi lobo-ni, owoto gire oko i Tecalonika, Kurecen owoto i Galatia kede Tito i Dalmatia.

¹¹ Luka kene en a doŋ tye baŋa kan. Bin wun i Marako, pien en ber meicel i konya.

¹² Tukiko an aoro oko i Epeco.

¹³ Ka ibino, kella boŋo apek a rik aweko i Teroa tuŋ a Karpo. Kwokka daŋ bukena, akato mere maca me lao ca.

¹⁴ Alegejanda atet mola otima cucu; Rwot bino cule pi timmere-nono.

¹⁵ Yin daŋ myero igwokere i kom lonnono, pien en rik opyem i kopwa atek ateka.

¹⁶ I pidona me agege, dano moro ocuŋŋa obedo mom. Jo luŋ oriŋo oweka oko. Obaŋa myero mom kwan man i wigi.

¹⁷ Cite Rwot Ocuŋ i laŋeta, eka te miya teko me tuco kop kakare, me Orok luŋ winy; olara amannono i dog eŋato.

¹⁸ Rwot bino konya iya oko i gin luŋ arac, kun lara me atun i loccere me polo. Kwogo bed baŋe nakanaka. Amen.

Amot me agikki

¹⁹ Motta Puricika gin kede Akwila, kede jo me ot Oneciporo.

²⁰ Lacito rik odoŋ i Korinti; Turopimo aweko two i Mileto.

²¹ Diye atek me itun ame kare me koyo mom ru ocakere. Yubulo omoti, anaka atot Pudente kede Lino, kede Kulaudio, karacel kede omegiwa luŋ.

²² Rwot bed kedi i cunyi. Winyo mere bed kedwu.