2 Temoteo 1 - Lango New Testament

Amot

¹ Waraga man oya i baŋ Paulo ame akwena a Kricito Yecu pi mit Obaŋa, ame lubo cikere mere me miyowa kwo a tye i Kricito Yecu.

² Baŋ atinna Temoteo ame amaro: Obaŋa Papo kede Kricito Yecu Rwotwa mii winyo, kica kede kuc.

Lewic kur maki

³ An apwoo Obaŋa ame atiye tic i yic aler, bala kwarina yam tiye, kun atuco nyiŋi i kwacca me kare luŋ.

⁴ Ka apo pig waŋi, mio iwor kede iceŋ aparo neni, me apoŋ kede lelo.

⁵ Apoyo iyeeni a goba mom iye, a rik koŋ ogeo bedo baŋ tatti Loi, kede totti Yuneki, ame aŋeo aboŋo kalo akala ni tye baŋi yin daŋ.

⁶ Man omio apoyo wii me iyik mot a rik Obaŋa omii pi keto ciŋa i komi, ame doŋ odoko acalo mac a mito to.

⁷ Pien Obaŋa rik mom omiowa cuny me lworo, ento omiowa cuny me teko kede mar kede me gwokere ken.

⁸ Pi mano lewic kur maki me miyo caden i kom Rwotwa, lewic daŋ kur maki i koma an ame abedo abuccere, ento notte kedwa i kanyo can pi amut aber, i teko Obaŋa.

⁹ En olarowa dok te lwoŋowa me bedo jo acil, mom pi ticcogo a wan otio, cite pi lubo yik a en ikome oyiko, kede pi winyo mere a rik en omio baŋwa i Kricito Yecu iyi ageyi piny.

¹⁰ Aman doŋ onyuto oko baŋwa i bino Alarwa Kricito Yecu ame doŋ oweo to oko, te miyo kwo kede perakino atwal onen oko kannaler pi amut aber.

¹¹ Pi amut aber-ri, an rik oketa me bedo arab-kop kede akwena kede apwony.

¹² Man en omio aneno can kit-ti. Cite lewic mom maka gira, pien aŋeo ŋat ame aye, dok daŋ aniaŋ atira ni, en twero gwoko gin ojalo i ciŋa ituno i Nino-naca.

¹³ Anenni me aluba bed kop ateni a rik iwinyo i baŋa, kun iwapo kede iyee kede mar a tye i Kricito Yecu.

¹⁴ Gwok gin aber ame ojalo i ciŋi pi teko a Cuny Acil a bedo i yiwa.

¹⁵ Yin iŋeo ni, jo luŋ a tye i Acia doŋ olokka ŋegi. Pugelo gin kede Kermogen tye i akinagi.

¹⁶ Rwot myero tim paco Oneciporo kica, pien rik odwoggo cunya tyen apol. Lewic mom omake pi jegerena,

¹⁷ cite en ka otuno i Roma, oyenya atek ituno ka onwoŋa.

¹⁸ Rwot mie enwoŋ kica a ya i baŋe i Nino-naca. Dok yin daŋ iŋeo kit kony a en obedo miyo i Epeco.