2 Korinti 9 - Lango New Testament

Kony ame orao pi jo Obaŋa

¹ Iyi ateni, pe mitte an icoyiwu kop i kom konyo jo Obaŋa,

² pien aŋeo mitwu iye. Atye ka wakere pirwu baŋ jo me Makedonia ni mano, “Jo Akaya oyikere oko i mwaka ca twal.” Pi cukerewu omio polgi daŋ oketo cunygi.

³ Ento enno acwalo omegowa baŋwu me wakerewa pirwu i kop man mom gik ka i kop keken, cite ibed ame iyikere wunu i kite ame akobbigi.

⁴ Naka mio ka jo mogo me Makedonia obino keda kuno te nwoŋo mom iyikere wunu, mio twoo doga oko pi gen ame onwoŋo wan oketo i komwu; aco wun kono?

⁵ En omio atamo ni myero acuk cuny omegowa ge tella yo me bino baŋwu, me gin koŋ nen ni mot man ame rik icikere wunu me miyo doŋ oyikere oko; me bed a doŋ oyikere oko acalo mot ame imio wunu pi mitwu, mom acalo mot ame odiowu iye adia.

⁶ Tye ni, ŋat ocoo koti anok, depo daŋ anok, ŋat ocoo abup kao daŋ abup.

⁷ Ŋat acel acel oti acalo en mito i cunye, aboŋo wanyiccoro onyo diccoro. Pien Obaŋa maro ŋat a mio kede yomcuny.

⁸ Dok Obaŋa twero miyowu jami abeco apol ata, wek i kare luŋ ibed wunu kede jami a romowu aber, ame mio wun daŋ itwero miyo wunu abup pi konyo tic ducu abeco,

⁹ acalo yam ocoo ni, “Opoko jami mere apol, omio baŋ ocan, berrere perakino nakanaka.”

¹⁰ Ŋat a mio koti baŋ acoc kede cem me acama bino miyowu koti, dok bino nyayo, te miyo gin oya i kom berwu bedo adwoŋ meicel.

¹¹ I bino bedo wunu olonyo i yore luŋ, ame romo miyo ibedo wunu i cuny aber me miyo mot i kare luŋ, ame ka wan otero, bino miyo jo pwoo Obaŋa.

¹² Pien tic man me kony a wun itio wunu bino kelli jo Obaŋa gin a mitte baŋgi, cite mom mano keken, bino daŋ kelo pwoc adwoŋ meicel baŋ Obaŋa.

¹³ Tic man bino miyo ikelli wunu Obaŋa kwogo, pien nyuto winy megwu iyi amut aber a Kricito ame ituco wunu, kede cuny aber ame ipoko wunu kede limwu baŋ jo-nono kede baŋ jo ocele luŋ.

¹⁴ Gin daŋ bino kwayo Obaŋa pirwu kun cunygi paro pirwu, pi kica Obaŋa adwoŋ ame okato kare ame onen i komwu.

¹⁵ Ber opwo wunu Obaŋa pi mottere aber a mom kober