2 Korinti 6 - Lango New Testament

¹ I ticwa karacel kede Obaŋa daŋ okwao ni, kit a doŋ inwoŋo wunu kede winyo Obaŋa, kur iweku balle nono.

² Pien en rik okobo ni, “Rik awinyi i kare me timo jo ber, rik akonyi i nino me larre.” Nenu ba, man en kare ame otimmi iye jo ber. Tin en nino me larre.

³ Wan giwa mom orio iciki moro i yo ŋattoro, me kur jo kob ni ticwa rac;

⁴ cite i kare ducu wan onyuto berwa kenwa acalo wan otic Obaŋa kun okanyakino atek meicel, i aroma kede can kede peko ame oridowa.

⁵ Opwodowa, otweowa i buc, otugo Iwak i komwa; tic odiowa, nino kede cam oremowa.

⁶ Onyuto ni wan otic Obaŋa pi kitewa acil, pi ŋecwa, pi diyo cunywa kede pi kicawa; pi Cuny Acil, kede pi marwa ame goba mom iye,

⁷ pi rabo kop me ateni, kede pi teko Obaŋa. Wan omako jami romo me kite atira i ciŋwa tuŋ cem kede tuŋ cam.

⁸ Oketo kwogo i komwa, daŋ oketo lewic i komwa; oyetowa, daŋ opakowa. Oterowa acalo ogoba, aco kara wan jo me ateni.

⁹ Oterowa acalo jo a mom ŋeye, ento oŋeye meicel. Olokowa obedo acalo jo oto, kara wan giwa jo akwo. Kadi timwa cucu, mom onekowa;

¹⁰ kadi miwa kumo, yiwa giwa bedo yom i nino luŋ; onen acalo ocan, cite wan omio jo apol odoko olonyo; wan onen bala mom otye i ginnoro, kara bo otye kede jami luŋ.

¹¹ Wun jo me Korinti ba, wan doŋ okobo kedwu kannaler, doŋ oyabbiwu cunywa alac.

¹² Wan mom oceggiwu cunywa, ento wun aye iceggiwa cunywu oko.

¹³ An akobo kedwu acalo itinona; kite a wan otimowu kede, wun daŋ itimo wunu amannono; yabbiwa wunu cunywu alac.

Wun ot Obaŋa akwo

¹⁴ Kur inotte wunu karacel ŋo a mom oye Yecu, pien pe irom wunu. Kara kite atir kede tim areco twero bedo owot iŋo? Lero kede colpiny twero notte bedo karacel iŋo?

¹⁵ Kricito kede Belial tamgi twero rwatte? Gin aŋo ame dano ame oye Yecu twero nywako gin kede dano a mom ye?

¹⁶ Kara ot Obaŋa twero notte niŋo i cal jogi? Pien wan obedo ot Obaŋa akwo; acalo en Obaŋa doŋ okobo ni, “An abino bedo i yigi, abino wowota i akinagi, abino bedo Obaŋagi, gin daŋ obino bedo jona.

¹⁷ Doŋ ber iya wunu oko i akinagi, pokere wunu kedgi oko, man kop, a Rwot, kur igud wunu ginnoro me kwer; mio an abino jolowu,

¹⁸ abino bedo papawu, wun daŋ ibino bedo wunu awobena kede anyirana; man kop a Rwot Won Twer Ducu.”