2 Korinti 3 - Lango New Testament

Otic me cikere anyen

¹ Wan dok ocako dworre kenwa? Onyo ca omito waraga me dworo wa baŋwu, on yo balo ame icoo wunu?

² Wun ikomwu ibedo wunu waraga me dworowa, ame ocoo i cunywa, ame jo ducu twero ŋeyo kede kwano.

³ Wun daŋ doŋ inyuto wunu oko ni ibedo wunu waraga ame oya i baŋ Kricito, ame wan okelo. Pe ocoo kede bwino, pe ocoo i kom kidi; cite ma ka kidi, Kricito ocoo i yi dano kun coo kede Cuny Obaŋa akwo.

⁴ Gin omio akobo amannono, pien ojeŋere atek i kom Obaŋa pi Kricito.

⁵ Wan ikomwa mom oromo kobo ni ginnoro oya i baŋwa; tekowa luŋ oya ibaŋ Obaŋa.

⁶ En daŋ ame omiowa oromo bedo otic me cikere mere anyen, pe me cik ame ocoo acoa, cite me Cuny; pien gin ocoo acoa kelo to, ento Cuny Acil kelo kwo.

⁷ Cik a rik ogoro kede nukuta i kom kidi apaa ame ticcere kelo to, rik obino kede kwogo, omio neno waŋ Muca te loyo jo Icrael oko pi acara me nyim Muca, ame en acara-nono te rwenyo oko.

⁸ Eyo, tic a Cuny Obaŋa, kwogo mere mom bino kato maca atek ateka?

⁹ Pien ka tic a mio kop loo jo tye kede kwogo, kara tic a kela kwano jo ni kitegi atira kwogo mere mom doŋ kato maca oko?

¹⁰ Aman gin a yam tye kede kwogo doŋ odoko gin a mom tye kede kwogo kadi acelloro, pi kwogo ocele a doŋ kate atek ate ka.

¹¹ Pien ka gin ame obin orwenyo oko obino kede kwogo, gin a ri myero doŋ bed i kwogo akato.

¹² Pien wan otye kede kodi gen man, en omio okobo kede tekcuny.

¹³ Mom dok ocal i Muca a rik owumo waŋe i boŋo, me jo Icrael kur nen kite ame acara arwenyo kede i waŋe, te tum oko.

¹⁴ Cite onwoŋo tamgi rik owumere oko; anaka tin tamgi pwod owumere i kite acellaca ka akwannigi cikere acon, pien awummaca twero kwanyere ka pi Kricito keken.

¹⁵ Naka i kare a tin-ni ka okwannigi cik a Muca, awum pwod bedo kakare, wumo tamgi oko.

¹⁶ Cite ka dano moro-ni olokere baŋ Rwot, awummaca walakino oko.

¹⁷ Rwot ame okobo kan-ni en Cuny Acil; kan a Cuny Rwot tye iye, kuno kuc daŋ tye iye.

¹⁸ Kede wan luŋ ame awum doŋ okwanyo oko i waŋwa otye acalo araŋ ame mio kwogo a Rwot nen acalo acara cen, omio otye ka lokere doko calo en, kun kwogo mere medde ameda i komwa; mannono tic a Rwot, ame en Cuny Acil.