फिलिप्पी 3 - केवट नया कारार

जीवनके लक्ष्य

¹ अन्तमे हे प्रिय विश्वासी भ्या-बहिनसब, प्रभुमे आनन्दित र। तोरासिके उहे बातसब घुरी-घुरी लिखना हमरा झन्झट नैलागैछै, कहिनेकी उहे बातसब तोरासिके झुट्ठा शिक्षासे सुरक्षित राख्तौ।

² ऊ आदमीसिसे होशियार र, जे कुत्ताके जुगुर व्यवहार करैछै आर जेसब खराब काम करैछै। ऊ आदमीसिसे होशियार र जे कहैछै कि उद्धार पाबैके लिए खतना हुए पडैछै।

³ कहिनेकी परमेश्वरके आत्मामे आराधना करेवाला, ख्रीष्ट येशूमे गर्व करेवाला आर आपने मानव प्रयासमे भरोसा नैराखेवाला अपनासब ही छियै, जेसब वास्तवमे ही परमेश्वरके आदमीसब छियै।

⁴ तैय्योपर हमरा आपनेसंगे आपन प्रयासमे भरोसा राखैके बढियाँ कारणसब छै। यदि कोय आदमी सोचैछै कि ओकरसंगे एरंको मानव प्रयासमे भरोसा राखैके कारण छै ते, हमरसंगे ते आरहौ बेसी कारणसब छै।

⁵ जब हमे आठ दिनके रहियै परमेश्वरके आज्ञा कैल मुताबिक हमर खतना भेलै छे। जनमसे ही हमे इस्राएलके वंश बेन्यामिन कुलके इस्राएली छियै। हमर मयाँ-बाबु हिब्रू आदमी रहै, सेल्याके हम्हुँ भी एकटा हिब्रू आदमी छियै। फरिसी समूहके आदमीसिके जुगुर हमे भी मूसाके विधि-विधानके कडाईके साथ पालन कैलियै छे।

⁶ उत्साहके विषयमे यदि कहैं ते मण्डलीके सताबेवाला, आर यहूदी विधि-विधानके पालन करैमे हमे एकटा धर्मी आदमी रहियै कहिनेकी हमे ऊसब पालन कैलियै रहे।

⁷ मगर जे-जे बात हमर लिए फैदाके रहै, ऊ सभे बातके हमे ख्रीष्टके संगे सम्बन्ध हुऐके कारण हानी सोच्लियै।

⁸ मगर येशू ख्रीष्टके हमर प्रभुके रुपमे चिन्हैके कारण, जे सभे चीजसिसे मूल्यवान छै, हमे उटा सभे चीजके हानी सोच्लियै, ओकरे कारण हमे सभे चीज त्यागी देलियै, आर ऊ सभे चीजके कचरा सोच्लियै, ताकी हमे ख्रीष्टके हुए सकियै।

⁹ ताकी हमे ओकरामे एक भ्याके जिये सकियै। हमर धर्मी घोषित होना मूसाके विधि-विधानप्रतिके हमर आज्ञाकारितामे आधारित नैछै, मगर हमर धर्मी घोषित होना इहे छै, जे परमेश्वर ख्रीष्टमे भेल हमर विश्वासके कारणसे देल्कै छे।

¹⁰ हमे ख्रीष्टके जाने चाहैछियै। ओकर मुर्दासे जिन्दा हुएवाला शक्तिके अनुभव करियै आर ओकर मौतमे ओकरे जुगुर भ्याके ओकर दुःख भोगमे सामिल हुए सकियै।

¹¹ ताकी हमे भी मुर्दासे जिन्दा हुए सकियै।

लक्ष्यके तरफ बढते जाना

¹² हमे यी दाबी नैकरैछियै कि हमे सभे कुछु पहलहैसे पाबि लेलियै छे, हमे ऊ सिद्धता पाबैके लिए कडा कोशिश कर्ते आगु बढैछियै जे इनामके लिए येशू ख्रीष्ट हमरा चुन्लकै छे।

¹³ हे प्रिय विश्वासी भ्या-बहिनसब, हमे यी सभे चीज पहलहैसे पक्डी लेलियै छे कहिके हमे नैसोचैछियै, मगर हमे एकटा काम करैछियै, कि जे बात भेलै छे उटा बातसब बिर्सीके हमे भविष्यमे हुएवाला बातके लिए कडा मेहनत करैछियै।

¹⁴ ख्रीष्ट येशूमे परमेश्वरके स्वर्गीय बुलाहटके इनाम पाबैके लिए हमे निशाना महर दौड्ते जैछियै।

¹⁵ सेल्याके अपनासिमेसे जतनें भी आदमी आत्मिक रुपमे परिपक्क छियै सभेको अहिने मनके बन, आर तुहेंसब कोनो बातमे दोसर विचारके छैं ते परमेश्वर उहो बात तोरासिके साफसे बुझ्या देतौ।

¹⁶ सेल्याके परमेश्वर जे सच्चाई पहलहैसे प्रकट कैल्कै छे अपनासब ओकर मुताबिक जिये पडैछै।

¹⁷ हे विश्वासी भ्या-बहिनसब, तुहेंसब हमर व्यवहारके अनुसरण कर। हमेसब तोरसिके संगे हुऐ बेरियाँ जे व्यवहार तुहेंसब हमरासिमे देख्लहैं ओरंको व्यवहार करेवाला आदमीसिके अनुसरण कर।

¹⁸ कहिनेकी हमे तोरासिके पहेला बहुतेबेर कही चुक्लियौ छे आर एखनिहौं कानी-कानीके कहैछियौ, कि एरंको बहुते आदमीसब छै जेसब आपन चाल-चलनके द्वारा देखाबैछै कि ऊसब सच्कोरे ख्रीष्टके क्रूसके दुश्मन छै।

¹⁹ विनाश ओकरसिके अन्त छै, ऊसब खाली आपन शारीरिक इच्छा पुरा करैले जियैछै। लाज लागेवाला बातमे ऊसब गर्व करैछै, आर ऊसब सभे दिन खाली संसारके बातके बारेमे सोचैछै।

²⁰ मगर अपनासब स्वर्गके छियै। आर अपनासब एकटा उद्धारकर्ता प्रभु येशू ख्रीष्टके स्वर्गसे वापस आबैके इन्तजारमे छियै।

²¹ ऊ आपन शक्तिके उटा प्रभावके अनुसार जकरद्वारा ऊ सभे चीजके आपन वशमे करे सकैछै, आपनसिके कमजोर मरणशील शरीरके रुपके बदलीके आपन महिमामय शरीरके जुगुर बन्या देतै।