फिलिप्पी 1 - केवट नया कारार

नमस्कार

¹ यी चिट्ठी हमे, पावल आर तिमोथीके तरफसे छै, जेसब येशू ख्रीष्टके दास छै। हमे यी चिट्ठी फिलिप्पी सहरके मण्डलीके देख-रेख करेवाला आर मण्डलीके सेवक सहित परमेश्वरके आदमीसिके लिखैछियै।

² हमेसब प्रार्थना करैछियौ कि परमेश्वर आपनसिके पिता आर आपनसिके प्रभु येशू ख्रीष्ट तोरासिके अनुग्रह आर शान्ति दौ!

फिलिप्पीके विश्वासीसिके लिए पावलके धन्यवाद आर प्रार्थना

^3-5 पहेला दिनसे ही एखनतक तुहेंसब येशू ख्रीष्टके विषयमे यी खुश-खबरीपर विश्वास कैल्हैं छे आर एकरा फैलाबैमे तुहेंसब हमर सहयोगी भेल्हैं छे। सेल्याके, जब भी हमे तोरसिके विषयमे सोचैछियै ते परमेश्वरके धन्यवाद दैछियै। आर हमे आनन्दके साथ तोरसिके सभैके लिए परमेश्वरके सहायताके लिए प्रार्थना करैछियौ।

⁶ हमरा यी पक्का विश्वास छै कि परमेश्वर तोरासिमे कुछु बढियाँ करैले शुरु कैल्कौ छे, परमेश्वर ही यी काम उटा दिनमे पुरा कर्तौ जब येशू ख्रीष्ट वापस ऐतौ।

⁷ तोरसिके सभैके लिए एरं सोचना हमर लिए सही छै, कहिनेकी तोरसिके लिए हमर मनमे विशेष जगह छै। चाहे हमे कैदमे छियै या खुश-खबरीके सच्चाईके साबित आर रक्षा करैछियै, हरेक समयमे तुहेंसब परमेश्वरके अनुग्रहमे हमरसंगे सामिल भेल छैं।

⁸ परमेश्वर हमर गवाह छै, कि हमर ह्रदय तोरसिके प्रति ख्रीष्ट येशूके प्रेमसे भरि गेलै छे आर हमे तोरासिके सभैके देखैके लिए तर्सैछियै।

⁹ हमर प्रार्थना इहे छै कि सचके ज्ञान आर बुद्धि-विवेकके साथ एक दोसरके लिए तोरसिके प्रेम लगातार बढ्ते रहौ।

¹⁰ ताकी तुहेंसब चुने सक्हैं, कि करना सही छै, आर जब ख्रीष्ट वापस ऐतै ते तुहेंसब शुद्ध आर निर्दोष रहे सक्हैं।

¹¹ जेरंके गाछ फल फराबैछै ओहिने करिके तुहेंसब परमेश्वरके महिमा आर स्तुतिके खातिर येशू ख्रीष्टसे आबेवाला धार्मिक काम कर।

ख्रीष्टके प्रचारके कारणसे पावलके आनन्द

¹² हे विश्वासी भ्या-बहिनसब, तोरासिके यी बात मालुम हौ कहिके हमे चाहैछियै, कि हमर उप्परमे ऐल बातसिसे वास्तवमे खुश-खबरीके फैलाबैले आरहौ सहायता मिल्लै छे।

¹³ एत्तेतक कि रोमी महाराजाके महलके सभे सिपाही आर बाँकी सभे आदमीसिके लगत यी प्रकट भेलै छे कि, हमे ख्रीष्टके सेवा करैके कारणसे जेलमे छियै।

¹⁴ आर प्रभुमे जे भ्यासब छै, ओकरासिमेसे बहुते झन हमे एखन जेलमे हुऐके कारणसे उत्साहित भ्याके, परमेश्वरके वचन बिना डर्याके प्रचार करैके लिए साहासी भेलै छे।

¹⁵ कुछु आदमीसब डाह आर झगडौवा हुऐके कारणसे ख्रीष्टके बारेमे खुश-खबरी प्रचार करैछै आर कुछु आदमीसब बढियाँ विचारके साथ ख्रीष्टके बारेमे प्रचार करैके लिए हमर सहायता करैछै।

¹⁶ बढियाँ विचारसे प्रचार करेवाला आदमीसब प्रेमके कारणसे यी करैछै कहिनेकी ओकरासिके मालुम छै कि हमरा ख्रीष्टके बारेमे खुश-खबरीके रक्षा करैके कारण जेलमे कैद कैल्कै छे।

¹⁷ मगर खराब विचारसे प्रचार करेवाला आदमीसब ख्रीष्टके बारेमे स्वार्थी कारणसे प्रचार करैछै, यी सोचिके कि हमे जेलमे भेल बखत हमरा आरहौ बेसी कष्ट दियै।

¹⁸ एकरासे कि फरक पड्लै ते? खाली यी, कि हर किसिमसे चाहे खराब विचारसे, चाहे बढियाँ विचारसे, ख्रीष्टके खुश-खबरी प्रचार कैल जैछै आर हमे एक्रहैमे आनन्दित छियै, आर सभे दिन आनन्दित रहबै।

¹⁹ कहिनेकी हमे जानैछियै कि तोरसिके प्रार्थना आर येशू ख्रीष्टके आत्माके सहायताद्वारा हमे बचैल जैबै।

ख्रीष्टके लिए जिना

²⁰ हमर उत्कट इच्छा आर आशा यी छै कि हमे कहियो लज्जित नैहैबै, मगर पहेला कैल जुगुर ख्रीष्टके बारेमे बोलैके हमरा साहास हैतै। चाहे हमे जियै या मरियै हमे हमर सारा जीवनसे ख्रीष्टके लगातार आदर देबै।

²¹ हमे जिबै ते, यी ख्रीष्टके आदरके लिए हैतै। जब हमे मरैछियै, ऊ हमर लिए उत्तम हैतै कहिनेकी तब हमे ख्रीष्टके संगे हैबै।

²² यदि शरीरहैमे जिना छै ते हमे ख्रीष्टके लिए उपयोगी काम करैले सक्षम हैबै। तैय्योपर हमरा जिना या मरना ककरा चुने पड्तै, ऊ हमे नैकहे सकैछियै।

²³ हमे नैजानैछियै कि यी दीटामे ककरा चुने पड्तै। मगर मरिके ख्रीष्टके संगमे हुऐके इच्छा छै, कहिनेकी यी बहुते बढियाँ छै,

²⁴ मगर हमर जिन्दा रहना तोरसिके सहायताके लिए आरहौ जरुरी छै।

²⁵ यी बातमे हमे निश्चित छियै। सेल्याके हमे जानैछियै कि हमे जिन्दा रहबै आर तोरसिके सभैके संगे रहबै, आर विश्वासमे मजगुत हुऐले आर एकरामे आनन्दित हुऐले हमे तोरसिके सहायता कर्बौ।

²⁶ ताकी जब हमे फेर तोरसिकेलगत ऐबौ, तब जे काम येशू हमरद्वारा करैछै, उटा कारणसे तोरसिकेलगत ख्रीष्ट येशूमे गर्व करैके आरहौ बहुते कारणसब हैतौ।

खुश-खबरीपर विश्वासमे स्थिर रहैके उपदेश

²⁷ मगर जे भी हुए, तुहेंसब एकटा बातके ध्यान राख कि तोरसिके जीवनके आचरण-व्यवहार ख्रीष्टके खुश-खबरीके योग्य होना चाही। अहिने करिके चाहे हमे आबिके तोरसिके भेट करियौ या दूर रहिके हमे तोरसिके बारेमे सुनियौ, मगर हमरा इहे बात पता चलै कि तुहेंसब एक आत्मामे स्थिर छैं आर एक मनके भ्याके एक साथ मिलिके उटा विश्वासके लिए संघर्ष करैछैं, जे कि खुश-खबरीपर आधारित छै।

²⁸ आर तुहेंसब कोनो बातमे विरोधीसिसे नैडराबैछैं। तोरसिके साहास ओकरसिके लिए यी विनाशके लक्षण छै, मगर तोरसिके लिए सिधे उद्धारके लक्षण छौ, जे उद्धार परमेश्वरके तरफसे छै।

²⁹ कहिनेकी परमेश्वर तोरासिके खाली ख्रीष्टमे विश्वास करैके ही नै मगर ओकरामे विश्वास करैके कारणसे दुःख भोगैके अवसर भी देल्कौ छे।

³⁰ आर उहे संघर्ष जे तुहेंसब हमरामे पहेला देख्लहैं जब हमे तोरसिके संगे फिलिप्पी सहरमे रहियै आर जेरं दुःखके विषयमे तुहेंसब एखन सुनैछैं, ओरंको दुःख हमरा एखन आरहौ भी एत्ते जेलमे छै।