Mark 9 - Kwak'wala 4 Gospels Acts and Selections 1897

¹ La nīk lāh dāḵwuk, aulin nīkiūkl, yiḵwā gāyūtlāk lāḵwā glāh‐glawīsīḵ, kīsā lasūḵ puḵ‐āklilā kluḵ wānumgīlā, kīs mī klāḵs dūḵwāklilā kluḵ gīkāsā sa Ike Gīkumī gāḵ‐kl lāḵ tlāhwāyī.

² Wa yiḵs la ī qātl k̤ukla pun hwās la‐āsī Jesus uḵ‐īduḵ Peter kā les gla wī, hīmīsī James glū John, kās les lāḵā īk̤iāla nuge hīgih dāḵw mā: la‐ās klāyū‐wīs bagwanum īnāyī kā dūqitl dāḵws.

³ Lī qītlqeles zilīkulā, aulāk̤iāl la mulā; kīyos la mulā‐kāwāyā.

⁴ Wa gāḵa‐ā sī Elijah glū Moses nītl‐īd lāh dāḵwuk, ya‐īk̤untāla glū Jesus.

⁵ La‐āsī Peter yāk̤ugātl kās nīkīḵ Jesus, Gīkumī, ekia ī kā unts kunts yū mī gāḵ lūḵ, wīga hyinūh gūqīlāḵ yūduh sumā gūqā, numā kās, hīmīs numā ka‐ūḵ Moses‐īḵ, hīmīs numā ka‐ūḵ Elijah‐ḵ.

⁶ Kīs la k̤auklila ḵīs wātldumī; kā īs lā kitlīh dāḵwā.

⁷ Gāḵa‐ā sī da unwāyī teh‐īduk: la‐āsa nīk̤iāle lāḵā unwāyī, ga mun tlāhwila Ḵwanūqik’, hūklīlāh dāḵw‐la kuk.

⁸ Lāh dāḵw muls‐īd, la kīyos numūq la dūqitl dāḵws, hīgāmī Jesus glūh dāḵwī.

⁹ Wa yiḵs gāḵ dāḵwa ī bunūtlil lāḵā nuge, la tlok̤wāl nīk kā kīyos dāḵwīs nītlā sūs yisīs lāh dāḵw dī dūqitlā, kā ātlmī klis kū lā klī da Ḵwanūqā sa bagwanum qilāgilīskl lāḵā tlilī.

¹⁰ Lāh dāḵw au‐um āḵīla ḵā wātldum, wāklāpuḵ qībātla āsā sī da ītīdī qilāgilīs lāḵā tlilī.

¹¹ Lāh dāḵw wuklāk, nīkia, māzī nīkītla sī da scribes yikīḵs hī klā gil gāḵ klī Elijah?

¹² La nīk lāh dāḵwuk, aula um hī gil gāḵī Elijah, kās nākīs‐tundī ḵā nāhwā; wetlā tī da k̤iaduqī qāqīx‐al lāḵi da Ḵwanūqa sa bagwanum, yikīḵs kīsā lasa ī kīs tlālāwotlilākl, kās wāhmūdumī‐kl.

¹³ Lamīs glin nīkiūklāḵs gāḵ mā ī Elijah, lāh dāḵw mī sī hī‐um qīh‐īd kī yiḵīs qayūh dāḵwī kās qīh‐īdaāsuk, la umḵ k̤iātilā‐klilā īnī mas qīh‐īdaāsū‐gwītluk.

¹⁴ ¶ Gilh dāḵw mīs gāḵ‐āklil lāḵā disciples, lāh dāḵw dūḵ‐wāklilā ḵā kīnum bagwanum lāk, hīmīsa kī‐k̤iātīnūḵ k̤īkayūd glūh dāḵwī.

¹⁵ Wa hīh‐īdā mī sa nāhwā bagwanum yiḵs lāh dāḵwa ī dūḵ‐wāklilāk, la ḵūnyasas, zilh‐wīd lāk kās ī‐āḵk̤iālīk.

¹⁶ La wuklāh dāḵwuk, mās dāḵwūs wotldumīḵ glūh dāḵwūḵ.

¹⁷ Lī da numūqī gāyūtl lāḵā kīnum bagwanumā nīk yuk, Ade, gāḵ din wāh sgin ḵwanūqik lūkl, kāḵs umḵo weg uḵnūgwād sa yaksamī spirit;

¹⁸ K̤īlāh‐ālīsā nāhwā kuk lāḵīs wāhyī la‐āsa, kās ekī āhwukstal, k̤ink̤ia‐taulāḵ tawīḵ gās gīgīk, lāh zimā‐nāqila; lin wāh uḵk̤iāla ḵūs disciplesā ḵūs kā lāwūdih dāḵwī sū ḵwā kuk; wiyūkl dāḵw tūḵwā kuk.

¹⁹ La nīk lāh dāḵwuk, ā yūkl kīyos ūqizālazī līlqilāklī, wīzin wāwāsdum kla kupetlā‐kl glūs; wīzin wāwāsdum kla hītlāzaul lūkl, kīlaga tsū gāḵun.

²⁰ Wa gāḵ dāḵwīs lāk, wa gil mīs dūḵ‐wāklilāk, hīh‐īdā mīsī da spirit yāwīh‐īd lāk, la yāḵ‐wātīsa, līhyilīsil āhwukstālā gilīsā.

²¹ La wuklāḵ ūmpas, lamā‐ūḵ ketla hī gāḵ qīx ī? la mīs nīkia qātlila mūtlū hwāḵs gāla ūtlīḵ ginānumā.

²² Lamī sūḵ k̤winal lāhklānū sūḵ lāḵā laqītl, glūḵs lastānau‐āḵ sūḵ lāḵā wāpī, kās tlātlālūsū‐wīq: wa kā glā sū qayūglas nūq lāḵuq, wīga wāḵ wos‐īdunūh, kās wāḵ‐īda ūs gāḵunūh.

²³ La‐āsī Jesus nīk yuk, kāsū ūqis lāḵū, kā īḵs kīyosa ī wāh sū sī da ūqisī.

²⁴ Hīh‐īdā mīsī ūmpā sī da ginānum hāsil nīkia, ūqis mun, wāḵātlāla ḵun wiyūqizālazī.

²⁵ Wa gil mīsī Jesus dūḵ‐wāklilā ḵā kīnum bagwānum gāḵ zilhwil k̤āpīkū nāqila, la‐ās yāk̤igātl ḵā yāksamī spirit, nīkia, la mun nīkiūkl kīlaga lāwe laq, qālā ītīdilāḵ lālākā lāḵ lāq.

²⁶ Lī da spirit qākli‐gātla yāwīh‐īd lāk, gāḵa‐ās lāwe: lī da ginānum hī qīx la tlilī; nīk sū mī sī sa kīnumāḵs lamā ī tlilā.

²⁷ Au mīsī Jesus dābātl‐zānunduk, kās nīḵūstau‐līsīk; la mīs glāḵwilīsa.

²⁸ Wa gil mīs gāḵ la‐īkl lāḵā gūqī, lī disciplesas awāsīd wuklāk nīkia, māzaunūh kīsītla lāwe masuk.

²⁹ La nīk lāh dāḵwuk, yiḵ qīxdumas kīyos qīh‐īda āts lāwe, hīga um kā ī da hawāḵ‐ulā glū k̤īkulā.

³⁰ Wa lāh dāḵw kās‐īda gemākā lāḵ Galilee; kīs tā nīk kā kauklilīs ungwe bagwānumk.

³¹ Yiḵs la ī nītlā ḵīs disciples, nīk lāh dāḵwuk, yiḵī da Ḵwanūqas bagwānum la um zawe lāḵ āyasaus bagwānum, lāh dāḵw klī k̤īlāh‐īd kluk kā tlilīs; wa gil umkl wīs lākl tlil‐kl, lā klī qilāh‐īd‐kl ītīd‐kl, kū lākl yūdūh pun hwāzīs klū.

³² Kīs dāḵw tā āyūsilāḵ wātldumas, lāh dāḵw um ḵa ā wīs halāla wuklāk.

³³ Wa gāḵ dāḵw lāḵ Capernaum: wa gil mīs gāḵ‐īkl lāḵā gūqī la wuklā ḵīs disciples, mās dāḵwīs wotldumā lāḵā tihyilā?

³⁴ Auh dāḵw mīs k̤wīklātla: kāh dāḵwīs kātāpa īnāyī lāḵīs gāḵ‐īnīh dāḵw‐dī kenāqil lāḵā tihyilā ungwī da awīlāḵīh dāḵwas.

³⁵ La k̤wāgā‐lītla kās klīlālī ḵā mālūgwigiyū; la nīk yuk, kū nīk lāḵī ungwe bagwanum kās gālākumāyī, mākstūḵglī klī sa nāhwā, glū hīlūbātl‐zānī klisa nāhwā.

³⁶ La uḵ‐īd ḵā ginānum bīdawī kās k̤wākulītlīs lāḵ nuk̤ukī‐lītl dāḵwas, la kutl‐īduk, kās nīkī lāh dāḵwuk.

³⁷ Yiḵ ungwā kla dādālā klāḵ gā kla qīx‐kl ginginānum‐inīḵw klik lāḵun glīkumī, hī‐um dādāla gāḵun; wa yiḵī da ungwe dādāla gāḵun, kīs nūgwa dādāla sūs, hī um glī yālākum nūqa un.

³⁸ Lī John nīk yuk, Gīkumī, dūqilā nūhwā ḵā numūqī lāwūdāla ḵā devils lāḵīs glīkum ūs, lā tānūh bulāk kā kīzīnāyas lāskumī gāḵunts.

³⁹ Aumīsī Jesus nīkia, qālā bulāk; kā īḵs kīyosa ī bagwānum īāḵulā ḵā tloqīmas qaīnī lāḵun glīkumī, qīh‐īdaās nūq nuhwestā yākpāḵstā gāḵun.

⁴⁰ Kā īḵs hī ma ī qīwe gāḵuntsī da kīsa hāyūta gāḵunts.

⁴¹ Yiḵī da ungwā kla zaw klū‐klas numīḵklā kla k̤wāstā‐kl wāp‐kl kās nāḵ‐īd tsū wūs kā īs huzīnīh dāḵwūsāḵ Christ, aulā tm nīkiūklā kīḵs lau‐kl mī klā ḵīs qenum kla lāk.

⁴² Wa yiḵ ungwā kla qih‐īdā mas kluḵ numūqā lāḵ gada ginginanumk ūqis gāḵun, hī tā ekiākāwī kā ī, kū lā lāḵ k̤ulīḵūdāyiwī wālasa tīsum lāḵ k̤ūk̤ūnes, kās le zuḵstānū lāḵā klāsāq.

⁴³ Glū kāsū qih‐īdā matsū lāḵ sīs āyasū wūs, tūsū dāk: he ākūs egāsī lāzau lāḵ qilā aāpsūtl zānāma, lā glāḵ mātlīs āyasū wūs lā lāḵ Gehenna, lāh‐klāla lāḵā kīsa k̤ilk̤ilḵ‐īm hyīhyīkula.

⁴⁴ Glū kāsū qih‐īdā matsū lāḵ sīs gūgwayū wūs, tūsū dāk; he ākūs egāsī aūzagīla lazau lāḵ qilā, lā glāḵ uḵnūgwādes mātlī gūgwayau lā zuḵklānū lāḵ Gehenna.

⁴⁵ Glū kū qih‐īdā mas lāḵīs kayākus ūs lūkl, qilpūdāk: he ākūs egāsī lazau lāḵ gīkāsa sī da Ike Gīkumī numskum staula ma, lā glāḵ uḵnūgwādes mātl‐tsumī kayākusā, lā zuḵ‐klānū lāḵ Gehenna.

⁴⁶ Yiḵā kīs kla tlilā īnūḵwās klis ābānīh dāḵwas, glū kīsa k̤ilḵ‐īnūḵs hyīhyīkula.

⁴⁷ Kā ī da nāhwā bagwanumḵs dums‐hyaāqī klis hyīhyīkula, gla wa nāhwa yāqum dums‐hya‐āq klis dums‐hye.

⁴⁸ Ek īda dums‐hyī: wa kā glū kīyohwīdilāḵī dumpā īnāyas, wīzisā tā klas kā dumpih īdāyūs? dums‐hyi‐āq lā, glū kās numh dāḵwila ūs.