फिलि 4 - Kodaku

¹ हेनाते एगा ईञाःकू प्यारा भाईकू, इंञ अपेंञ मया वपेआ, अवुर अखीर ञेंल गिसन यडिञाँ, इंञ अपे राः चलते तेंञ खूसुआ, अवुर ईञाः बुता राः ईनाम अनापे हवे, अपे जेयसेंञ चेडकेड पेआ, हेन घयते परभु थरे बिसवास बगी तपे।

मसीह रे दोहोन लगड सलाह

² इंञ ओदिया अवुर संतुखे नेकींञ कोड़ी परभु रे एक मन तेकींञ दोहोन लगड समझो यड किञाञूँ।

³ ए सुजुगे, अम इंञ मी सेवा देंगाअय होड़ हवे। अम होंञ समझो यडमिआँ नेकींञ कोड़ी, कलमेस अवुर सेवा देगंञ हेंकू गतिंञ कू सुदा नेकींञ बढ़ियाँः खभेर मिरीज लगड कींञ गति वडिञाँ। नेकींञ ञुमू हो जीवन राः पोथी रे नेकू ञुमू सुदा भगवान लिखो केडा, हेनाते नेकींञ मी सहेतावा।

⁴ अपे परभु रे हरदम हँसी खुसी तेपे दोहोनू; इंञ फेरेचिंञ कहनी यडा, हँसी खुसी तेपे दोहोनू।

⁵ अपे नरम गिआ हेना सींड़ कुकू पपाड़ी, परभु हनालितेय मेजुः तना।

⁶ कनर बात लगड अलोपे फिकीर लँगाऊ, बल्कि हरेक बात लगड पे अरजी बिनतीऊ, अवुर धन्यवाद राः संगे साथ ते अपे राः सगोर घटी टुटी भगवान थरे पे असियू।

⁷ हेंडे मसीह ईसु रे अपे राः कोठी कया अवुर मन रे, भगवान सान्तिय ओवा पेआ, जोकि समझ वरी बाहर इदाना।

⁸ एगा भाईकू, हतानित रेंञ कहनी वपे तना, जे जे टेबोः सत गिआ अवुर माने लायिक गिआ, अवुर जे जे टेबोः जयेज गिआ, अवुर पवितर गिआ, अवुर जे जे टेबोः मिठास गिआ, अवुर बेसवा लायिक गिआ, चहे जे जे टेबोः एकदम बढ़ियाँ गिआ, अवुर भगवान मन्हेंवा लायिक गिआ, हेना धियाने महल रेपे दोहोनू।

⁹ जे जे टेबोः इंञ वरी पे ञेंल चेडकेडा, अवुर पे अपनो केडा, अवुर पे अँजोम केडा, हेना मनोवे पे, हेंडे सान्ति ए-माय भगवान अपे सुदाय दोहोना।

पवलुस दान लगड धन्यवादिय ओवा कुआ

¹⁰ इंञ परभु रे अखीर खुस इदानिञाँ, नीमिन दिन रे फेर पे उहयर केडिञाँ; अपे जरूर पहील ईञाः बारे तेपे पसींद तेडा, लेकिन अपे सहेता ओवंञ लगड मोका मेने पे ञँमगाडा।

¹¹ इंञ थरे कनारा घटो यनाते, न घयतेंञ कहनी यडा मेनते अलोपे अड़ींगू, जेतना न इंञ थरे अटोः जुरोआ, हेन मेनाः रे सन्तोकता लगाडिंञ चेडकेना।

¹² इंञ होडिञुँः होंञ सुजाड़ाँ अवुर गिरहातुः होंञ सुजाड़ाँ। सगोर याःते सन्तोकता लगाडिंञ चेडकेना, रँगेज सहो चहे बीऊ, अवुर गिरहातुऊ चहे गरीबुः होंञ सुजाड़ाँ।

¹³ जे इंञ बालिय ओवाञाँ, हें-नी राः सहेता ते इंञ सगोर दसा रे सीड़िंञ करो सकोआ।

¹⁴ हेंडे रेहो अपे कराः कराः ते ईञाः बिपेत रेपे गति वडिञाँ, नआँ दो बनाढ़ियाँ पे करो केडा।

¹⁵ ए फिलिप्पी रेनकू होड़कू, अपे पना पड़ी तनापे, कि भगवान राः बढ़ियाँः खभेर मड़ंग ते अपे थरेंञ लाय तेडा, हेना वरी तयोम ते मकिदुनिया वरिंञ चलो तोलोग अपे छोड़ ते कनर कलीसिया रेनकू मेने कू सहेता गडिञाँ।

¹⁶ नेन घयते इंञ थिस्सलुनी रेंञ दोहोएन तोलोग हो, अपे ईञाः घटी टुटी तन रेहो सहेतावंञ लगड घड़िन घड़ी पे भेजो तेडा।

¹⁷ सहेताय ञँम बेड़ा यडा मेनते अलोपे अड़ींगू, बल्कि इंञ पे सहेता वडा हेना राः बदला, भगवान ओवापे मेनतेंञ चहोः तना।

¹⁸ अपे इपाफुरूदीतुस थरे ईञाः जरूरत वरी हो बनागरा पे एम गोड तेडा, निहों इंञ थरे कनर घटी टुटी कोवाआ, नआँ भगवान लगड महमहोआ पूजा घयगिआ, अवुर नआँ घियाअय बेस वआ।

¹⁹ मसीह ईसु अबू लगड जे-नाय करो केडा, हेनाते इंञ जे भगवानिंञ आराधनाआ हेंय अपे राः सींड़ घटी टुटिय पुरो पेआ।

²⁰ अबू रेनिय भगवान अपा राः महिमा जुग जुग होयाः महल रे दोहोनू। आमेन।

अखरी जोहार

²¹ मसीह ईसु रे इदान कुआ हेंकू सगोर पवितर होड़कू इंञ हनवरी जोहार मेनते पे कहनी वकू। इंञ सुदा इदान कुआ हेंकू भाईकू हो अपे जोहार मेनते कू कहनी वपे तना।

²² नआँ सहर रे इदान कुआ हेंकू पवितर होड़कू जोहार मेनते कू कहनी वपे तना। ढेरेच दो कयसर राजा ओड़ाः रे बुताः हेंकू जोहार मेनते कू कहनी वपे तना।

²³ परभु ईसु मसीह राः किरपा अपे सींड़कू सुदा दोहोनू।