फिलि 3 - Kodaku

खतनाःकू वरी सँवचेती तेपे दोहोनू

¹ कनर घयू, एगा भाईकू, परभु रे हँसी खुसी तेपे दोहोनू। अपे बिसवास वरी अलोपे भटकोः लगड, बित्ताही ते हेनेन हेनेना टेबोः लिलिखो, मेनेंञ असकट वताना।

² अपे कुतूकू घियाःकू होड़कू वरी सँवचेती तेपे दोहोनू, नेकू होड़कू खराब काम कू हवे, नेकू खतनाःकू वरी सँवचेती तेपे दोहोनू।

³ असली ते खतना केनकू दो अनाबू हवे, ताकि पवितर आत्मा राः अगुवाय ते भगवान बू मान दाना, अवुर ईसु मसीह बू सयाँड़ वआ, अवुर देंह रे भरोसा मेने बू रखोआ।

⁴ लेकिन इंञ दो देंह रेहोंञ भरोसा सकोआ, अगर कनय देंह रेहोंञ भरोसाया मेनतेय पसींदे रेदो, इंञ दो हेंय वरी हो बगरा भरोसांञ रखो सकोआ।

⁵ आठ रोज रे ईञाः खतना होया एना, इंञ इसराएली हवे, अवुर बिन्यामीन गोति रेनिय हवे; ईगंञ अपुंञ इबरानी कींञ हवे; धरम नियम मनोअय पे कहनी मेंडे रेदो, इंञ फरीसी हवे।

⁶ धरम नियम मनोकू मेंडे पे कहनिय रेदो, इंञ बढ़ियाँ तेंञ मनोवे दोहो एनु, मेनेंञ बेजय बेड़ा गडा। अवुर भगवान मान मरजाद मेंडे पे कहनिय रेदो, अखीर ओसताजिंञ दोहो एना, हेनाते कलीसिया रेनकुंञ ससीत दोहो एनु।

⁷ लेकिन जे जे टेबोः ईञाः फयदा दोहो एना, हेना दो मसीहा राः चलते ते कनर याःते मेनेंञ बुझो यडा।

⁸ नींगित दो कोवानू, परभु ईसु मसीह राः बारे ते सगोर याःते पपाड़ीः लगाडिंञ चहोः तना। इंञ हेंयिंञ पपाड़ी अते सगोर याःते नोकसान यना। अवुर सींड़ टेबोः बेकार गिआ मेनते पसींद केतेंञ बगी वडा। ईसु मसीह ञँम लगड अवुर हेंय सुदा मियाँटंगाः कींञ होयाः लगड नआँ सींड़ कचरा घयतेंञ मनो यडा।

⁹ निहों ईञाः बढ़ियाँः बुता ते चहे नियम मनो अते, भगवान राः नँजेर रे धरमी होड़ बेगारिंञ बनोआँ। लेकिन इंञ ईसु मसीह थरेंञ बिसवास केडा ते, इंञ भगवान राः नँजेर रे धरमी होड़िंञ बनो केना, अवुर नआँ भगवान हनवरी बिसवासे रे ञँमुआँ।

¹⁰ ईसु मसीह सगोर याःतेंञ पपाड़ी लगड, अवुर हेंय गोजतन वरिय जियो रिमेना हेना सक्‍ति अटकर लगड ईञाः पसींद इदाना। जेयसे ईसु मसीह दुख सहो केतेय गोजेना, हेन घयते इंञ हो दुख सहो केते, हेंय सुदा मेसाः मेनतेंञ चहोः तना।

¹¹ ताकि इंञ गोजुः रेहोंञ जियो रिमुऊ, न ईञाः असरा हवे।

ठे-टतू अँगम पे तयागे

¹² इंञ पँवना केनांञ मेनते चहे पक्‍का यनांञ मेनते मेनेंञ कहनी यडा, लेकिन जे लगड मसीह ईसु सबकेडिञाँ, हे-ना ईनाम ञँम लगड मड़ंग हनतेंञ बढ़ो चलोः तना।

¹³ एगा भाईकू, ञँमकेडाञूँ मेनते मेनेंञ कहनी यडा, लेकिन बात नआँ हवे, कि इंञ तयोम हँडाः टेबोः बगी वते, जो मड़ंग हँडे इदाना, हेना ठे-टतू अँगम तयागे राः कोसीस रे इदानिञाँ।

¹⁴ भगवान इंञ मसीह ईसु राः दोवारा ते ञँमुः हेना ईनाम, जो सरग रे दोहोन हेना हवे, हेन लगाडिय राःकेडिञाँ, हेनाते ठे-टतू हनतेंञ बढ़ो चलोः तना।

¹⁵ अबू मेंडे जेतना पक्‍का इदान कुआ, हेंकू राः सोच नेन घयते दोहोनू; अगर अपे कनर एटाः टेबोः रे अवुर कनर घियाः बिचार मेजुः रेदो, भगवान हेना हो अपे थरेय लायेआ।

¹⁶ लेकिन जे-ना अबू निहों मेनते बू चेडकेडा, हेन घयते जिनगी बू बितो।

¹⁷ एगा भाईकू, अपे सींड़कू ईञाः चाल बेहवार घयतेपे से-ने, इंञ अपे नमूनांञ तिःवड पेआ। न घयते जिनगी बितो कू तियग कू महल रेपे दोहोनू।

¹⁸ कहेकि अपे बित्ताहिंञ लाय वडपेआ, अवुर निहों हो ईयाम ईयाम तेंञ कहनी वपे तना। अखीर होड़कू मसीहा राः कुरूस रेनकू, मुदेयकू बनो केनते जिनगी बितो यड कुहो इदान कुआ।

¹⁹ नेकू घियाःकू बिलोअकू। नेकू लजतू कू राः धियान रे भर कू दोहोना। नेकू गेव्वाः घियाः टेबोः कू फुलय वआ, अवुर दुनिया राः टेबोः रे मन कू लगोआ।

²⁰ अबू राः देस सरग रेआ; अवुर हेन देस वरी अबू रेनिय उऊबराय परभु ईसु मसीह मेजुः राः तक तक रेबुआ।

²¹ हेंय सींड़ चीज अनेज राः कब्जा रेय रखो सकोआ, हेना सक्‍ति ते अबू राः गोजुः हरोः हेना देंह बदलो केते, अनेज राः लवकोआ देंह घयतेय बनो वेआ।