फिलि 2 - Kodaku

मसीह राः चाल बेहवार पे नकालू

¹ अपे मसीह रे इदान पेआ ते बहाली पे ञँमकेडा, अवुर हेंय दुख राः घड़ी रे अपे मया वडपे ते सान्तिय ओवड पेआ, अवुर पवितर आत्मा सुदा पे मेसा केना, अवुर अपे सोग ओड़ेंग तनापे, अवुर मया ओड़ेंग तनापे।

² हेनाते अपे एक मन ते, अवुर एक गूट ते, अवुर मया मिलन तेपे दोहोनू, नेन घयतेपे एचे बहालिञूँ।

³ अपे अपन आप बडे गिअंञ मेनते पसींदे केते कनर अलोपे करोवे, अवुर अलोपे फुलायू, लेकिन अपन आप होडिंञ केते अपन वरी एटाःकू बढ़ियाँ तेपे ञेंल कू।

⁴ अपे सींड़कू अनापे लगड भर अलो, एटाःकू लगड होपे धियाने।

⁵ जेयसे ईसु राः स्वभाव दोहो एना, हेन घयते अपे राः स्वभाव हो दोहोनू।

⁶ हेंय भगवान रह तेहो अनानेज भनगवान घयते दोहोन मेनते मेनेय पसींद गना।

⁷ बल्कि अनानेजिय होडींञ तेडा, अवुर हरवाह घयतेय बनो एना, अवुर मनवाँ घयतेय बनो एना।

⁸ अवुर हेंय अनानेजिय होडींञ तेडा, अवुर भगवान राः टेबोः एतनाय मनो तेडा कि कुरूस राः मिरतू, हूँ, कुरूस राः मिरतू घलिय सहो तेडा।

⁹ हेनाते भगवान हेंय सींड़कू वरी बडेय बनो केडिया, अवुर सींड़कू वरी बडे ते ञुमू केडिय ते सींड़ हाँकिय ओवाडिया।

¹⁰ हेनाते सरग रेनकू अवुर धरती रेनकू अवुर धरती राः पेंदी रे इदान कुआ, हेंकू सींड़कू ईसु राः ञुमू अँजोम केतेकू उकड़ूमुआँ।

¹¹ अवुर भगवान अपा राः मान मरजाद होयाः लगड। हर एक होड़कू ईनिसु मसीह परभु हवे मेनते कू मनोविया।

संसार रे इपिलकू घयतेपे जग मगोऊ

¹² हेनाते एगा ईञाःकू प्यारा भाईकू, इंञ अपे सुदांञ दोहोन तोलोग, अपे ईञाः सींड़ टेबोःपे मनो तेडा। निहों अपे सुदा कोवाञाँ, हेंडे रेहो अपे हेना मनानोवे पे। भगवान बंचो केडकुआ, हेंकू का घयते जियेक इदाना, हेन घयते अपे भगवान राः डर ते अवुर हेंय राः मान मरजाद होयाः घयतेपे जियोऊ।

¹³ कहेकि भनगवान अनेज राः इक्छा पूरा लगड अपे राः मन रे बढ़ियाँः मानिय डलोवेआ, अवुर हेन घयते कामे लगड बल होय एमेया।

¹⁴ सगोर बुता बेगर कुरू बुसू ते अवुर बेगर कहा कही तेपे बुतायू।

¹⁵ ताकि अपे थरे कनय अलो दोस सकोऊ अवुर सही होड़कू पे बनो बगी कोऊ। अवुर उजड़ यनकू अवुर अन टेड़हा होड़कू राः बीच रे भगवान रेनकू बेगर कसूर कू चोंडिजकू घयते बनो कोःते, न चँवदीस रे इपिलकू घयतेपे जग मगोऊ।

¹⁶ अवुर जीवन ए-मा बढ़ियाँः खभेर मनोवे महल रेपे दोहोनू। तबे इंञ मसीहा मेजुः देवह, अपे राः बीच रेंञ दवुड़ धूप एन हेना, अवुर मेहनत तेड हेना, दाः रे बेगर तुआ मेनते अपेंञ सयाँड़ वआ।

¹⁷ भगवान थरे पे बिसवास केडा हेना, अवुर हेंय पे सेवा यडिय हेना, भगवान लगड पूजा एमकेड घयगिआ। अवुर हेना पूजा पूरा लगड जीविंञ चलोः रेहो खुस इदानिञाँ, अवुर इंञ अपे सुदा बहालिंञ मनोआँ।

¹⁸ नेन घयते अपे हो बहालीः पे, अवुर इंञ सुदा बहाली पे मनो।

तीमुथियुस अवुर इपाफुरूदीतुस

¹⁹ परभु ईसु थरे ईञाः असरा इदाना, तीमुथियुस अपे थरे हनालितेंञ कुलेया, ताकि अपे वरिय मिड़ाः मेजकोःते अपे राः हाल चालिय लाय बहालिञूँ।

²⁰ नेय घयते सही मेते अपे लगड धियानेः हेंकू, इंञ सुदा कनय कोवाआ।

²¹ सगोरकू ईसु मसीह राः दो मेने, अनाकू राः भर कू चिन्ता यडा।

²² अपे दो तीमुथियुस राः बारे तेदो पे पना पड़िआ, जेयसे होपोन तू अपातिय गति वआ, हेन घयते बढ़ियाँः खभेर मिरीज लगाडिय गति वडिञाँ।

²³ हेनाते ईञाः असरा इदाना, कि ईञाः दसा ची घयुआ मेनाअंञ पपाड़ीः सी, हेंय हलिते अपे थरेंञ कुलेया।

²⁴ अवुर परभु थरे ईञाः भरोसा इदाना, इंञ हो अपे थरे हनालितेंञ मेजुआ।

²⁵ इपाफुरूदीतुस, ईञाअय बोहोंञ घयगी अयू, नेय ईसु रे पलटनकू घयते ईंञिय सेवा देंगाअय होड़ हवे। अपे नेय इंञ थरे पे कुलकेडिया, अवुर नेय सींड़े रेय सहेता वडिञाँ।

²⁶ नेय हसु तन हेना पे अँजोम केडा, हेनाते नेय अपेय उनुहयर बगी तपेआ, अवुरिय अलमलो जोमा। हेनाते नेय अपे थरे कुलेय लगाडिंञ पसींद केडा।

²⁷ नेय सही मेते गोज बंचोः मेनतेय हसु एना, लेकिन भगवान नेय थरेय दया एना; अवुर ने-नी थरे भर मेने इंञ थरे होय दया एना, ताकि ईञाः जीव दुख उपर दुख रे अलो होयाऊ।

²⁸ हेनाते इंञ हेंय अपे थरे कुलेय लगड ईञाः मन अखीर इदाना, ताकि अपे हेंय सुदा जुमो कोःते पे बहालिऊ, अवुर ईञाः सोच हो घटोऊ।

²⁹ नेय मसीहा राः काम मेनते दो जे अपे इंञ लगड सहेता करेक दोहो एना, हेना राः बदला ते हेनाय पूराय मेनते दो, अनेज राः जीव घली मेनेय मोंह गडा।

³⁰ हेनाते नेय अपे थरेय मेजुः रे नेय सुदा परभु रे हँसी खुसी तेपे जोहार भेंटुऊ, अवुर नेकू घियाः कुपे मान मरजाद कू।