इफिसिकू लगड पवलुस परेरित लिखो केडा चिट्ठी 2 - Kodaku

मिरतू वरी जीवन हनते

¹ पहील अपे अनापे राः कसूर अवुर पाप राः चलते तेपे गोजतन दोहो एनु;

² नआँ पाप रे अपे पहील नआँ दुनिया राः रीति बिधी, अवुर सयतान तयोम तेपे से-ने दोहो एनु, नेय अगस रे भूतकू थरेय राजेआ, अवुर नेय आत्मा हवे, अवुर नेय अबोह ले हुकूम मेने मनोकू थरेय कामेआँ।

³ नेंदोरा ते अबू हो सींड़कू पहील अपन देंह राः ललसा रे जिनगी बू बितो दोहो एनु, अवुर देंह अवुर मन राः ललसा बू पूरा दोहो एनु, अवुर एटाःकू घयते चले चलन ते भगवान वरी सजा ञँम लायिक बू दोहो एना।

⁴ लेकिन भगवान जो दया रेनिय धनी हवे, अबू अखीरिय परेम वडबुआ ते,

⁵ हेंय अबू मसीहा सुदाय जियो केडबुआ, कहेकि अबू कसूर केडा तेबू गोजतन दोहो एनु, हें-नी राः दनायते पे उबर केना।

बढ़ियाँः खभेर मिनियेंटंग गिआ

⁶ अवुर मसीह ईसु सुदा बू एक यनाते, हेंय सुदाय जियो केडबुआ, अवुर सरग राः जघा रे हेंय सुदाय दुड़ूब केडबुआ।

⁷ ताकि मेजुः तना जुग रे हेंय अनेज राः मया तीमिन बडे गिआ, हेनाय तिःवा बू, हेना अनेज राः किरपा ते मसीह ईसु सुदा बू एक यनाते अबू थरेय देखर केडा।

⁸ हे-नी थरे पे बिसवास केडा ते, दनायाकेन तेय उबर केडपेआ; अवुर नआँ अपे हनवरी कोवाआ, नआँ दो भगवान राः दान हवे,

⁹ अवुर ना अबू राः करम ते मेने, कनय अलोपे फुलायुः जहानू।

¹⁰ कहेकि अबू उबर केना, हेना भनगवान काम केडा, अवुर मसीह ईसु सुदा बू एक यना। अवुर भगवान पनाहिल ते अबू कामे लगाडिय तयार केडा, हे-ना भला काम लगाडिय सिरजो केडबुआ।

मसीह रे मिनियेंटंगाः कू

¹¹ हेनाते अपे उहयारे पे, अपे जनम वरी गयेर एहूदिकू हवे, अवुर एहूदिकू देंह तकू रेकू एर खतना केना, अवुर हेंकू अनाकू खतनाःकू मेनते कू कहनिआ। हेंकू रे अपे बेगर खतनाकू मेनते पे एर कहनिआ।

¹² हेना तोलोग अपे मसीहा अवुर भगवान रेनकू होड़कू, इसराएलिकू समाज वरी अलग रेपे दोहो एना। भगवान इसराएलिकुय जबान वड दोहो एनु, हेनारे अपे राः बंटा मेने दोहो गना, अवुर नआँ दुनिया रे बेअसरा, अवुर बेगर भगवान तेपे दोहो एना।

¹³ लेकिन अपे पहील सगींञ रेपे दोहो एना, अब ईसु मसीह सुदा पे एक यनाते, अवुर मसीहा राः लोहू राः चलते ते भगवान अनेज बँदे रेय अगकेड पेआ।

¹⁴ कहेकि एहूदिकू अवुर अनजात कुय मिलो गोत्तेड कुआ, हें-नी अबू रेनिय मिमीलोवय हवे। अवुर अबू मझँर रे बेघ बेघर बुआ हेना देवल दोहो एना, हेनाय धसगों गोत्तेडा, मतलोब मेरंग ओड़ेंग हेनाय अड़ी गोत्तेडा।

¹⁵ अवुर एहूदिकू अवुर अनजातकू अनेज सुदा मियाँटंगाः देंह घयतेय बनोबू लगड नेय अनानेज राः जीवितिय एमतेडा, हेनाते एहूदिकू राः सींड़ नियम अवुर कानूनिय रद गोत्तेडा। अवुर नेन घयते एहूदिकू अवुर अनजात कुय मेल मिलाप केडबुआ।

¹⁶ हेंय कुरूस रेय गोजेना ते बनर जात रेनकू मिनियेंटंगाः देंह घयते भगवान सुदाय मिलो केडकुआ, नेन घयते बयेर भाव दोहो एना, हेनाय हटो गोत्तेडा।

¹⁷ अवुर हेंय मेजकेन ते अपे सँगिंञ रे दोहोएन हेंकू, अवुर ठाँव रे दोहोएन हेंकू, बनर जात रेनकू मेल मिलाप राः बढ़ियाँः खभेरिय लाय वडपेआ।

¹⁸ कहेकि हें-नी राः चलते ते, मिनियेंटंगाँः पवितर आत्मा राः सहेता ते भगवान अपा थरे अबू बनर जात रेनकू सेन सकोअबू।

¹⁹ हेनाते अब वरी अपे एटाः देस रेनकू अवुर बे-जान परचान कू ना लगे। लेकिन अब दो पवितर होड़कू सुदा मिनियेंटंगाँः देस रेनकू अवुर भगवान ओड़ाः रेनकू पे बनो यना।

²⁰ अब अपे मियाँटंग ओड़ाः घयगी अपे, हेना नेंव परेरितकू अवुर भविस्यवक्‍ताकू हवे, अवुर ईसु मसीह खुद कोना राः अहनीसा दिरी घयगी अयू।

²¹ अवुर ईसु मसीह सुदा सींड़ेकू मिलकोःते पवितर मँडिल घयते बू बनोः तना।

²² अवुर अपे हो मसीह रेनकू हवे ते मियाँ मियाँ ते पवितर आत्मा राः दोवारा ते भगवान दोहोन लगड ओड़ाः घयतेय बनो यडपेआ।