လံာ်တၢ်ဂံၢ် INTRO1 - Sgaw Karen Common Bibleတၢ်ကတိၤဆှၢနုာ် လံာ်တၢ်ဂံၢ်တဲတၢ်ဘၣ်ဃးပှၤအံၣ်စရ့လးဖိအပူလၢအနံၣ်လွံၢ်ဆံ ဃၣ်ဃၣ်အတီၢ်ပူၤလၢ အစးထီၣ်ဖဲအဝဲသ့ၣ်ဟးထီၣ်လၢကစၢၢ်စံၤနါ ဒီးတုၤအတုၤလၢကီၢ်လၢကစၢ်ယွၤအၢၣ်လီၤလၢကဟ့ၣ်အဝဲ သ့ၣ်လၢအအိၣ်ဝဲဒၣ်လၢမုၢ်ထီၣ်ကီၢ်ဆၢန့ၣ်လီၤ. လံာ်အံၤအမံၤဒုးနဲၣ်ပှၤပူတယုၢ်အံၤအက့ၢ်အဂီၤလၢအအိၣ်ဖျါဝဲ ဂ့ၤဂ့ၤန့ၣ်လီၤ. ဒ်ပစံးတၢ်အသိး, မ့ၢ်ဝဲတၢ်ထၢဖှိၣ်ကွဲးနီၣ်ပှၤအနီၣ်ဂံၢ်လၢ စီၤမိၤၡ့ ဟံးန့ၢ်အီၤဖဲပှၤအံၣ်စရ့လးဖိတဖၣ်အိၣ်ဝဲဖဲကစၢၢ်စံၤနါ တချုးအဟးထီၣ်ကွံာ်ဒံးဘၣ်အကတီၢ်, ဒီးမၤကဒီးတဘျီ ဖဲအဝဲသ့ၣ်အိၣ်လၢကီၢ်မိၤအးလၢထံကျိယၢ်ဒ့ၣ်အမုၢ်ထီၣ်တခီ ဖဲပှၤတစိၤဝံၤအလီၢ်ခံန့ၣ်လီၤ. ဖဲတၢ်ထၢဖှိၣ်ကွဲးနီၣ်အနီၣ်ဂံၢ်ခံဘျီအံၤအဘၢၣ်စၢၤန့ၣ်ပှၤ အံၣ်စရ့လးဖိ တဖၣ်လဲၤဆူကၤဒ့ၣ်ဘၤနံးလၢအအိၣ်ဝဲဒၣ်ဖဲကီၢ်ကနၤဧၣ်ကလံၤ ထံးကီၢ်ဆၢတခီန့ၣ်လီၤ. ဘၣ်ဆၣ်ဒီးဖဲအဝဲသ့ၣ်အိၣ်ဝဲဒၣ်ဖဲန့ၣ်အခါန့ၣ်တလဲၤနုာ်ဘၣ်ဝဲ ဒၣ်ဆူကီၢ်တၢ်စံးပာ်အပူၤဘၣ်. ဖဲအဝဲသ့ၣ်အိၣ်ဝဲဖဲတၢ်လီၢ်န့ၣ်အါနံၣ်အါလါဝံၤအလီၢ်ခံ ဒီး, အဝဲသ့ၣ်လဲၤဆူတၢ်လီၢ်အိၣ်လၢထံကျိယၢ်ဒ့ၣ်အမုၢ်ထီၣ်တခီန့ၣ် လီၤ. ဖဲန့ၣ်ပှၤဂီၢ်မုၢ်အိၣ်တ့ၢ်သူၣ်လီၤဆီလီၤအသးတနီၤဒီးတနီၤ ကတဲာ်ကတီၤအသးလၢကခီထံကျိဒီးနုာ်လီၤဆူကီၢ် ကနၤဧၣ်အပူၤန့ၣ်လီၤ. လံာ်တၢ်ဂံၢ်အံၤမ့ၢ်တၢ်ကွဲးနီၣ်ဘၣ်ဃးဒီးပှၤတဖုလၢအညီနုၢ် သးဟးဂီၤဒီးပျံၤတၢ်ဖဲဘၣ်ကွၢ်ဆၢၣ်မဲာ်ဒီးတၢ်ကီတၢ်ခဲ, ဒီးပူထီၣ်ထီဒါကစၢ်ယွၤဒီးစီၤမိၤၡ့ပှၤလၢကစၢ်ယွၤပာ်ထီၣ် အီၤဒ်သိးကဆှၢအဝဲသ့ၣ်အဂီၢ်န့ၣ်လီၤ. မ့ၢ်ပူတယုၢ်လၢအပာ်ဖျါထီၣ်ကစၢ်ယွၤအတၢ်သူၣ်တီသးလိၤ, အတၢ်အံးထွဲကွၢ်ထွဲအပှၤဂီၢ်မုၢ်လၢတၢ်ပာ်သးစွံကတုၤဖဲလၢ အဝဲသ့ၣ်လီၤတူာ်လီၤကာ်ဒီးတဒိကနၣ်ဘၣ်တၢ်ဒၣ်လဲာ်အကတီၢ်န့ၣ် လီၤ. ဒ်န့ၣ်အသိးမ့ၢ်တၢ်ပာ်ဖျါထီၣ်ဝဲစီၤမိၤၡ့အတၢ်ပာ်သူၣ်ပာ်သး ဂၢၢ်ဂၢၢ်ကျၢၤကျၢၤဖဲအဝဲတဘျီဘျီအသးတစူၤလၢတၢ်ဘူၣ်ထီၣ်ဘါ ထီၣ်ကစၢ်ယွၤဒီးတၢ်အဲၣ်အပှၤဂီၢ်မုၢ်အခါဒၣ်လဲာ်န့ၣ်လီၤ. လံာ်အတကွီၣ် ပှၤအံၣ်စရ့လးဖိတဖၣ်ကတဲာ်ကတီၤအသးလၢကဟးထီၣ်လၢကစၢၢ်စံၤနါ ၁:၁-၉:၂၃ (က) တၢ်ထၢဖှိၣ်ကွဲးနီၣ်ပှၤနီၣ်ဂံၢ်တၢတဘျီ ၁:၁-၄:၄၉ (ခ) တၢ်ဘူၣ်တၢ်ဘါအတၢ်သိၣ်တၢ်သီအကလုာ်ကလုာ်ဒီးတၢ်သိၣ်တၢ်ဘျၢ တဖၣ် ၅:၁-၈:၂၆ (ဂ) ဘူၣ်လဲၤကပာ်ခံဘျီတဘျီ ၉:၁-၂၃ စးထီၣ်လၢကစၢၢ်စံၤနါဆူကီၢ်မိၤအး ၁၀:၁-၂၁:၃၅ တၢ်မၤအသးလၢကီၢ်မိၤအးအပူၤတဖၣ် ၂၂:၁-၃၂:၄၂ တၢ်ကွဲးပာ်ဖှိၣ်အဖုၣ်ဘၣ်ဃးတၢ်လဲၤစးထီၣ်လၢကီၢ်အဲၤကူပတူး ဆူကီၢ်မိၤအး ၃၃:၁-၄၉ တၢ်မၤလိာ်နဲၣ်ကျဲတဖၣ်တချုးတၢ်လဲၤခီဂာ်ထံကျိယၢ်ဒ့ၣ် ၃၃:၅၀-၃၆:၁၃ |
Sgaw Karen Common Bible © Bible Society of Myanmar, 1992.
Bible Society of Myanmar