၁ ပ့းတရူး INTRO1 - Sgaw Karen Common Bibleတၢ်ကတိၤဆှၢနုာ် လံာ်ပရၢအခီၣ်ထံးတဘ့ၣ်လၢစီၤပ့းတရူးအအိၣ်အံၤဘၣ် တၢ်ကွဲးန့ၢ်ပှၤခရံာ်ဖိတဖၣ်လၢအဘၣ်တၢ်ကိးအီၤလၢ “ကစၢ်ယွၤအပှၤဃုထၢဖိတဖၣ်” လၢအလီၤပြံလီၤပြါဝဲလၢကီၢ်အၤစံမံနၤအကလံၤစိးတကပၤ န့ၣ်လီၤ. လံာ်အံၤအတၢ်တိာ်မိၢ်ပှၢ်မ့ၢ်ဝဲတၢ်ဟ့ၣ်ဆူၣ်ထီၣ်ပှၤဖးတၢ်ဖိ တဖၣ်အဂံၢ်အဘါ, ပှၤလၢအဘၣ်ကွၢ်ဆၢၣ်မဲာ်တၢ်မၤအၢမၤသီဒီးတၢ်နးတၢ်ဖှီၣ်လၢ အတၢ်စူၢ်တၢ်နာ်အဃိန့ၣ်လီၤ. ပှၤကွဲးလံာ်အံၤဒုးသ့ၣ်နီၣ်ထီၣ်ပှၤဖးတၢ်ဖိတဖၣ်လၢတၢ်သးခု ကစီၣ်ဘၣ်ဃးယ့ၣ်ၡူးခရံာ်, လၢအဟ့ၣ်အဝဲသ့ၣ်တၢ်မုၢ်လၢ်ခီဖျိ အတၢ်သံ, အတၢ်ဂဲၤဆၢထၢၣ်သမူထီၣ်က့ၤဒီးအတၢ်အၢၣ်လီၤလၢ ကဟဲက့ၤကဒါက့ၤန့ၣ်လီၤ. လၢတၢ်ဂ့ၢ်အံၤအဃိ, အဝဲသ့ၣ်ကဘၣ်တူၢ်လိာ်ဒီးသ့တူၢ်တၢ်နးတၢ်ဖှီၣ်, အိၣ်ဒီးတၢ်နာ်လၢတၢ်အံၤမ့ၢ်တၢ်မၤကွၢ်အဝဲသ့ၣ် အတၢ်စူၢ်တၢ်နာ်မ့ၢ်တၢ်နီၢ်နီၢ်ကစီဒီဧါ, “ဒီးမုၢ်နံၤလၢယ့ၣ်ၡူးခရံာ်ဘၣ်တၢ်လီၣ်ဖျါထီၣ်အီၤန့ၣ် အဝဲသ့ၣ်ကန့ၢ်ဘၣ်ခိၣ်ဖးအဂီၢ်န့ၣ်လီၤ.” ပိာ်ထွဲဃုာ်ဒီးတၢ်ဟ့ၣ်ဂံၢ်ဟ့ၣ်ဘါလၢတၢ်နးတၢ်ဖှီၣ်အဆၢ ကတီၢ်အံၤန့ၣ်, ပှၤကွဲးလံာ်သဆၣ်ထီၣ်အပှၤဖးတၢ်ဖိတဖၣ် အခံဒ်သိးကအိၣ်မူဒ်ပှၤတဖၣ်လၢတၢ်ဘၣ်ဃးဒီးခရံာ်အသိး န့ၣ်လီၤ. လံာ်အတကွီၣ် တၢ်ကတိၤလၢညါ ၁:၁-၂ တၢ်ဒုးသ့ၣ်နီၣ်ထီၣ်ကစၢ်ယွၤအတၢ်အုၣ်က့ၤခီၣ်က့ၤ ၁:၃-၁၂ တၢ်သဆၣ်ထီၣ်ခံလၢတၢ်အိၣ်မူစီဆှံအဂီၢ် ၁:၁၃-၂:၁၀ ပှၤခရံာ်ဖိအမူအဒါတဖၣ်လၢ တၢ်နးတၢ်ဖှီၣ်အဆၢကတီၢ် ၂:၁၁-၄:၁၉ ပှၤခရံာ်ဖိအတၢ်ဆီၣ်လီၤသးဒီးတၢ်မၤ ၅:၁-၁၁ တၢ်ကတိၤလၢခံကတၢၢ် ၅:၁၂-၁၄ |
Sgaw Karen Common Bible © Bible Society of Myanmar, 1992.
Bible Society of Myanmar