Lɛta Fɔ Filipay INTRO1 - Krio Fɔs Oli BaybulWetin Dis Lɛta Tɔk Bɔt Di Lɛta we Pɔl rayt to di Kristiɛn dɛn na Fili pay na bin di fɔs lɛta we i rayt to di chɔch we i opin na Yurop, na Masidonia we di Roman pipul dɛn bin de rul. Pɔl, we na bin apɔsul, bin de na jel wɛn i rayt dis lɛta, ɛn in at bin wɔri bikɔs sɔm ɔda Kristiɛn dɛn we bin de wok fɔ Krays nɔ bin de fɔ am, ɛn sɔm pipul bin de lan di chɔch pipul dɛn na Fili pay tin dɛn we nɔto tru. Pan ɔl dat, dis lɛta sho aw Pɔl gladi bikɔs i biliv pan Jizɔs Krays wit ɔl in at ɛn abop pan am. Di tin we mek Pɔl rayt dis lɛta na fɔ tɛl di Kristiɛn dɛn we de na Fili pay tɛnki fɔ we dɛn ɛp am di tɛm we i bin want mek dɛn ɛp am bad bad. I tek dis chans fɔ tɔk to dɛn so dat dɛn go gɛt kɔrej ɛn dɛn go biliv gud gud pan Gɔd, pan ɔl we in, Pɔl, bin de pan trɔbul ɛn dɛnsɛf bin de pan trɔbul. I beg dɛn mek dɛn nɔ prawd lɛkɛ aw Jizɔs insɛf nɔ prawd, ɛn i beg dɛn fɔ mek dɛn nɔ jɛs de du wetin dɛn want nɔmɔ na layf. Pɔl mɛmba dɛn se, di wanwɔd we dɛn gɛt wit Krays na di tin dat we Gɔd gi dɛn bikɔs dɛn biliv pan Jizɔs Krays, nɔto bikɔs dɛn de du wetin di Ju Lɔ se. Pɔl tɔk bɔt di gladi ɛn kol at we Gɔd de gi dɛn pipul we gɛt wanwɔd wit Jizɔs Krays. Di impɔtant tin dɛn we Pɔl tɔk bɔt na dis lɛta na di gladi, di wanwɔd we di Kristiɛn dɛn gɛt, aw dɛn biliv Gɔd traŋa wan ɛn we natin nɔ de mek dɛn tap fɔ fala Krays. Dis lɛta de sho se Pɔl lɛk di chɔch we de na Fili pay, fɔ tru. |
Krio Bible © The Bible Society of Sierra Leone, 2013.
Bible Society in Sierra Leone