Lɛta Fɔ Filipay 3 - Krio Fɔs Oli Baybul

Aw Gɔd de Mek Ɔltin Rayt Bitwin Wi ɛn In

¹ Mi Kristiɛn brɔda dɛn, na di las tin dɛn dis we a gɛt fɔ tɛl una na dis lɛta. A de tɛl una fɔ gladi bikɔs una gɛt wanwɔd wit di Masta. Fɔ rayt ɔl wetin a bin dɔn rayt to una fɔstɛm bak, nɔ mɔna mi, dat go bɛtɛ sɛf fɔ una.

² Una fɔ waydawek, sɔm pipul de we de du bad, ɛn dɛn de pin se ɔl dɛn man fɔ sakɔmsayz; dɛn tan lɛkɛ dɔg.

³ Na wi sakɔmsayz fɔ tru, bikɔs na Gɔd in Spirit de mek wi pre to Gɔd ɛn ɔna Am, ɛn wi gladi bikɔs wi gɛt wanwɔd wit Jizɔs Krays. Wi nɔ abop pan wetin pipul de du wit dɛn bɔdi fɔ sho se dɛn na Gɔd pipul.

⁴ If a want abop pan wetin pipul de du wit dɛn bɔdi fɔ sho se dɛn na Gɔd pipul, a kin du dat. If ɛnibɔdi fil se in kin abop pan dɛn tin we pipul de du wit dɛn bɔdi fɔ sho se dɛn Gɔd pipul, a gɛt rayt fɔ tink so pas da pɔsin de.

⁵ Bikɔs wan wik afta a bɔn nain dɛn sakɔmsayz mi. Mi mama ɛn mi papa na Ju, dɛn fambul to Bɛnja min, ɛn ɔl mi fambul dɛn na Ibru pipul. Mi na wan pan dɛn Faresi so a bin de du ɔl wetin di Ju Lɔ se, lɛkɛ dɛn.

⁶ A bin de fɛt fɔ mek ɔlman du ɔl wetin di Ju Lɔ tɛl wi fɔ du, so a bin de mek dɛn pipul we biliv pan Krays sɔfa. So if na we pɔsin de kip di Ju Lɔ de mek ɔltin rayt bitwin in ɛn Gɔd, wɛl, nɔbɔdi nɔ go pɔynt fiŋa pan mi.

⁷ Bɔt ɔl dɛn tin ya we bin ful mi yay, a nɔ tek dɛn mek natin naw fɔseka Krays.

⁸ Natin sɛf nɔ de na wɔl we min ɛnitin to mi igen fɔseka Krays, bikɔs fɔ no am bɛtɛ fawe pas ɛnitin na wɔl. Fɔ in sek a dɔn lɛf ɔltin so dat Krays go tek mi lɛkɛ in yon. Ɔl dɛn tin we a bin de du fɔstɛm, a luk se dɛn nɔ bɛtɛ naw, bikɔs Krays dɔn bi mi gen;

⁹ ɛn a nɔ want mek ɛnitin kam midul wi. Nɔto wetin a de du, dat na we a de kip di Ju Lɔ mek ɔltin rayt bitwin mi ɛn Gɔd, bɔt ɔltin rayt bitwin mi ɛn Gɔd bikɔs a biliv pan Krays. Na Gɔd de mek ɔltin rayt bitwin mɔtalman ɛn insɛf bikɔs mɔtalman biliv pan Krays.

¹⁰ Naw ɔl wetin a want na fɔ no Krays ɛn fɔ mek in pawa kam na mi layf, da pawa we mek i rayz frɔm di grev, a want sɔfa lɛkɛ aw i bin sɔfa ɛn a want day lɛkɛ aw i day,

¹¹ so a abop se misɛf go rayz frɔm di grev.

Gɔd Mek Krays Gi Wi Layf Sote Go

¹² A nɔ de se a dɔn du ɔl wetin Gɔd want mi fɔ du ɛn a nɔ de se a dɔn bi wetin a fɔ bi na Gɔd yay, bɔt a de tray fɔ du ɔl wetin Gɔd want mi fɔ du, bikɔs Krays dɔn mek a bi in yon.

¹³ Mi Kristiɛn brɔda dɛn, na tru se, a nɔ bi ɔl wetin a fɔ bi yet na Gɔd yay, bɔt a nɔ de put mi at pan ɔl wetin dɔn pas, bifo dat a de du ɔl wetin a ebul fɔ du fɔ gɛt wetin de bifo.

¹⁴ Na dat mek a de du ɔl wetin a fɔ du, fɔ gɛt di prayz we Gɔd de gi; dat na layf na ɛvin we go de sote go we Gɔd kɔl wi fɔ gɛt wɛn wi gɛt wanwɔd wit Jizɔs Krays.

¹⁵ Wi ɔl we dɔn biliv Krays gud gud ɛn we dɔn no ɔl wetin Gɔd want wi fɔ du, fɔ put wi at pan ɔl wetin a dɔn tɔk bɔt so, bɔt if una nɔ gri wit wetin a dɔn tɔk, Gɔd insɛf go sho una se wetin a tɔk na tru.

¹⁶ Na wan tin nɔmɔ a gɛt fɔ se, lɛ wi nɔn nɔ lɛf fɔ fala di sem lɔ dɛn we wi dɔn de fala ɔl dis tɛm.

¹⁷ Mi Kristiɛn brɔda dɛn, una fɔ de du ɔl wetin una si a de du. Una fɔ de luk dɛn wan we de du wetin wi dɔn sho una se gud fɔ du.

¹⁸ If una mɛmba, a bin dɔn tɛl una plɛnti tɛm bɔt sɔm pipul, ɛn naw a de kray we a de rayt una bɔt dɛn igen. A bin dɔn tɛl una se: di layf we dɛn liv mek di day we Krays day na di krɔs nɔ min natin.

¹⁹ Bɔt dɛn pipul ya go go na ɛl, bikɔs dɛn tek ɔl wetin dɛn want fɔ dɛnsɛf tɔn dɛn to dɛn yon gɔd; ɛn dɛn tin we fɔ mek dɛn shem, nain dɛn de gladi fɔ. Dɛn put ɔl dɛn at pan dɛn tin we de na dis wɔl.

²⁰ Bɔt ɛvin blant wi. Wi de wet fɔ di pɔsin we go kɔmɔt na ɛvin kam fɔ sev wi, da pɔsin de na wi Masta Jizɔs Krays.

²¹ Jizɔs go tek in pawa we de mek i ebul rul ɔltin chenj dis bɔdi we wi gɛt naw, ɛn mek i tan lɛkɛ in yon bɔdi, we nɔto mɔtalman yon ɛn we wɔndaful.