Leviegezh 14 - Bibl Koad 21: Ar Bibl e Brezhoneg evit ar Vretoned

Pennad 14 Glanidigezh an den lovr

¹ An AOTROU a gomzas da Voizez o lavarout:

² Setu al lezenn diwar-benn an den lovr evit deiz e c’hlanidigezh. Degaset e vo d’an aberzhour.

³ An aberzhour a yelo er-maez eus ar c’hamp hag a sello ouzh an den lovr. Mar d-eo pareet gouli al lorgnez war an den lovr,

⁴ an aberzhour a c’hourc’hemenno kemer, evit e c’hlanidigezh, daou labous bev ha glan, koad sedrez, ruz-moug hag sikadez.

⁵ An aberzhour a c’hourc’hemenno ma vo lazhet unan al laboused war ul lestr-pri, a-us da zour bev.

⁶ Al labous bev a gemero, gant ar c’hoad sedrez, ar ruz-moug hag ar sikadez, hag e soubo anezho, gant al labous bev, e gwad al labous lazhet a-us d’an dour bev.

⁷ Ober a raio ar sparfadur seizh gwech war an hini da c’hlanaat eus al lorgnez, en disklêrio glan, hag e laosko al labous bev er parkeier.

⁸ An hini en em c’hlana a ganno e zilhad, a douzo e vlev, en em walc’ho en dour, hag e vo glan. Goude ez aio er c’hamp met e chomo e-pad seizh devezh er-maez eus e deltenn.

⁹ D’ar seizhvet deiz e touzo holl vlev e benn, e varv hag e abrantoù, touzañ a raio e holl vlev, kannañ a raio e zilhad, gwalc’hiñ a raio e gorf en dour, hag e vo glan.

¹⁰ D’an eizhvet deiz e kemero daou oan disi hag un dañvadez disi eus ur bloaz, teir dekvedenn efa (3/10 efa   9 l) flour bleud mezet gant eoul evel donezon, hag ul log eoul.

¹¹ An aberzhour hag a ra ar c’hlanidigezh a lakaio an den da c’hlanaat gant an traoù-se dirak an AOTROU, ouzh digor teltenn an engalv.

¹² An aberzhour a gemero unan an oaned d’e ginnig evel aberzh a gablusted gant al log eoul, hag e hejo anezho evel ur prof dirak an AOTROU.

¹³ Lazhañ a raio an oan el lec’h ma vez lazhet an aberzh-dic’haouiñ hag al loskaberzh, el lec’h santel, rak, evel ma’z eo an aberzh-dic’haouiñ evit an aberzhour, an aberzh a gablusted a zo evitañ ivez. Un dra santel-meurbet eo.

¹⁴ An aberzhour a gemero eus gwad an aberzh a gablusted hag an aberzhour en lakaio war flipezenn skouarn dehou an hini da c’hlanaat, war veud e zorn dehou ha war veud e droad dehou.

¹⁵ An aberzhour a gemero eus al log eoul hag en skuilho war balv e zorn kleiz e-unan.

¹⁶ An aberzhour a soubo biz e zorn dehou en eoul a vo en e zorn kleiz, hag e sparfo an eoul gant e viz seizh gwech dirak an AOTROU.

¹⁷ An aberzhour a lakaio eus an eoul a vo manet en e zorn war flipezenn skouarn dehou an hini da c’hlanaat, war veud e zorn dehou ha war veud e droad dehou, dreist gwad an aberzh a gablusted.

¹⁸ An eoul a vo manet e dorn an aberzhour, eñ en lakaio war benn an hini da c’hlanaat, hag an aberzhour a raio evitañ an dic’haou dirak an AOTROU.

¹⁹ An aberzhour a ginnigo an aberzh-dic’haouiñ hag a raio an dic’haou evit an hini da c’hlanaat eus e zic’hlanded, ha goude e lazho al loskaberzh.

²⁰ An aberzhour a ginnigo al loskaberzh hag an donezon war an aoter, hag an aberzhour a raio evitañ an dic’haou; hag e vo glan.

²¹ Mar d-eo paour ha ma n’en deus ket aez da gement-se, e kemero un oan hepken evit an aberzh a gablusted da hejañ evel ur prof, evit ober an dic’haou evitañ, un dekvedenn efa (1/10 efa   3 l) flour bleud mezet gant eoul evel donezon, ul log eoul,

²² ha div durzhunell pe div goulm yaouank, hervez e aez, unan evit an aberzh-dic’haouiñ hag eben evit al loskaberzh.

²³ D’an eizhvet deiz e tegaso an traoù-se evit e c’hlanidigezh d’an aberzhour ouzh digor teltenn an engalv, dirak an AOROU.

²⁴ An aberzhour a gemero an oan evit an aberzh a gablusted gant al log eoul, hag e hejo anezho evel ur prof dirak an AOTROU.

²⁵ Lazhañ a raio oan an aberzh a gablusted. An aberzhour a gemero eus gwad an aberzh a gablusted hag en lakaio war flipezenn skouarn dehou an hini da c’hlanaat, war veud e zorn dehou ha war veud e droad dehou.

²⁶ An aberzhour a skuilho eus an eoul war balv e zorn kleiz e-unan.

²⁷ Eus an eoul a vo en e zorn kleiz, an aberzhour a sparfo gant e viz dehou seizh gwech dirak an AOTROU.

²⁸ An aberzhour a lakaio eus an eoul a vo en e zorn war flipezenn skouarn dehou an hini da c’hlanaat, war veud e zorn dehou ha war veud e droad dehou, dreist gwad an aberzh a gablusted.

²⁹ An eoul a vo manet e dorn an aberzhour, eñ en lakaio war benn an hini da c’hlanaat, evit ober evitañ an dic’haou dirak an AOTROU.

³⁰ Neuze e kinnigo unan an div durzhunell pe unan an div goulm yaouank, hervez ar pezh a c’hello kaout,

³¹ unan evel aberzh-dic’haouiñ hag eben evel loskaberzh, gant an donezon, hag an aberzhour a raio an dic’haou dirak an AOTROU evit an hini da c’hlanaat.

³² Hounnezh eo al lezenn diwar-benn an hini en deus ur gouli lorgnez, ha n’en deus ket aez a-walc’h evit e c’hlanidigezh.

³³ An AOTROU a gomzas da Voizez ha da Aaron o lavarout:

³⁴ Pa viot aet e bro Ganaan, a roan deoc’h da berc’hennañ, mar lakaan ur gouli lorgnez war un ti eus ar vro a vo deoc’h,

³⁵ an hini a vo dezhañ an ti a zeuio ha a gomzo d’an aberzhour o lavarout: Gwelout a ran evel ur gouli en ti.

³⁶ An aberzhour a c’hourc’hemenno goullonderiñ an ti a-raok ma’z aio an aberzhour ennañ da welout ar gouli, evit na vo ket dic’hlan kement a vo en ti; goude-se ez aio an aberzhour da welout an ti.

³⁷ An aberzhour a sello ouzh ar gouli. Mar en deus ar gouli a zo war vogerioù an ti kleuzioù arwer pe arruz ha mar kav dezhañ eo donoc’h eget ar voger,

³⁸ an aberzhour a yelo er-maez eus an ti, ha, pa vo ouzh an nor, e serro an ti e-pad seizh devezh.

³⁹ D’ar seizhvet deiz an aberzhour a addeuio ennañ hag a sello. Mar d-eo ar gouli astennet war vogerioù an ti,

⁴⁰ e c’hourc’hemenno an aberzhour tennañ ar vein emañ warno ar gouli hag o zeurel er-maez eus kêr, en ul lec’h dic’hlan.

⁴¹ Ober a raio raklañ an ti en diabarzh, tro-dro, hag e vo taolet kuit ar poultr a vo raklet er-maez eus kêr, en ul lec’h dic’hlan.

⁴² Kemeret e vo mein all hag e vint lakaet e-lec’h ar re gentañ; kemeret e vo pri-raz all evit induañ an ti.

⁴³ Mar deu ar gouli adarre ha mar dispuilh en ti goude ma oa bet tennet ar vein, goude ma oa bet raklet an ti ha goude ma oa bet induet,

⁴⁴ an aberzhour a addeuio ennañ hag a sello. Mar d-eo ar gouli astennet en ti, ez eo ul lorgnez wriziennet en ti, dic’hlan eo.

⁴⁵ Diskaret e vo an ti, e vein, e goad hag holl bri-raz an ti. O c’haset e vint er-maez eus kêr, en ul lec’h dic’hlan.

⁴⁶ An hini a vo aet e-barzh an ti e-pad an holl amzer ma oa bet serret a vo dic’hlan betek an noz.

⁴⁷ An hini en devo kousket en ti a ganno e zilhad, hag an hini en devo debret en ti a ganno e zilhad.

⁴⁸ Met mar deu an aberzhour ha mar gwel penaos ne vo ket astennet ar gouli en ti goude ma’z eo bet induet an ti, an aberzhour a zisklêrio an ti glan, rak ar gouli a zo pareet.

⁴⁹ Kemer a raio, evit glanaat an ti, daou labous, koad sedrez, ruz-moug hag sikadez.

⁵⁰ Lazhañ a raio unan al laboused war ul lestr-pri, a-us da zour bev.

⁵¹ Kemer a raio ar c’hoad sedrez, ar sikadez, ar ruz-moug hag al labous bev, hag e soubo anezho e gwad al labous lazhet a-us d’an dour bev. Ober a raio ar sparfadur seizh gwech war an ti.

⁵² An ti a c’hlanaio gant gwad al labous, gant an dour bev, gant al labous bev, gant ar c’hoad sedrez, gant ar sikadez ha gant ar ruz-moug.

⁵³ Hag e laosko al labous bev er-maez eus kêr, er parkeier, hag e raio dic’haou evit an ti; glan e vo.

⁵⁴ Hounnezh eo al lezenn diwar-benn pep gouli a lorgnez ha diwar-benn an tagn,

⁵⁵ diwar-benn lorgnez an dilhad hag an tiez,

⁵⁶ diwar-benn ar yoc’hennoù, an darouedennoù hag an tarchoù,

⁵⁷ evit reiñ anaoudegezh eus an dra dic’hlan hag eus an dra glan. Hounnezh eo al lezenn diwar-benn al lorgnez.