Izaia 41 - Bibl Koad 21: Ar Bibl e Brezhoneg evit ar Vretoned

Pennad 41

¹ Inizi, tavit evit va selaou, ra gemero ar pobloù nerzhoù nevez, ra dostaint ha ra gomzint! Tostaomp a-gevret evit ar varnedigezh.

² Piv en deus lakaet da sevel eus ar sav-heol an hini emañ ar reizhder oc'h heuliañ e gammedoù? Piv en deus roet dezhañ ar broadoù ha lakaet anezhañ da ren war ar rouaned? Lakaet en deus anezho evel poultr gant e gleze, hag evel plouz o nijal gant e wareg.

³ Redet en deus war o lerc'h, hag e tremen e peoc'h dre un hent n'en doa biskoazh aet e dreid warnañ.

⁴ Piv en deus graet ha sevenet an traoù-se, ha galvet ar rummadoù adalek ar penn-kentañ? Me, an AOTROU, me a zo ar c'hentañ ha me a zo gant ar re ziwezhañ.

⁵ An inizi o deus gwelet hag o deus bet aon. Pennoù an douar o deus krenet, tostaet o deus, deuet int.

⁶ Sikouret en deus an eil egile, pep hini en deus lavaret d'e vreur: Kalon vat dit!

⁷ An engraver a galoneka an orfebour, an hini a lufr gant ar morzhol a galoneka an hini a sko war an annev, hag a lavar diwar-benn ar soudeür: Mat eo! Hag e stag al labour gant tachoù, evit na fiñv ket.

⁸ Met te, Israel va servijer, Jakob am eus dibabet, gouenn Abraham va c'haret-mat,

⁹ te hag am eus kemeret eus pennoù an douar hag am eus galvet eus al lec'hioù pellañ, te hag am eus lavaret dit: Te eo va servijer, da zibabet em eus, ne'm eus ket da zistaolet.

¹⁰ Na'z pez ket aon, rak me a zo ganit, na sellez ket nec'het, rak me eo da Zoue; da nerzhañ a rin, da sikour a rin, da zerc'hel a rin gant dorn dehou va reizhder.

¹¹ Ar re holl a gounnare ouzhit a vo mezhek ha pinous; kaset e vint da netra hag ez aint da goll, ar re a stourm a-enep dit.

¹² O c'hlask a ri ha n'o c'havi ket; ar re a c'hourdrouze ac'hanout a vo kaset da netra hag a zeuio da vezañ evel mann ebet.

¹³ Rak me eo an AOTROU da Zoue, me a grogin ez torn dehou, hag e lavarin dit: Na'z pez ket aon, da sikour a rin.

¹⁴ Na'z pez ket aon, preñvig Jakob, nemorant eus Israel, da sikour a rin, eme an AOTROU, Sant Israel eo da zasprener.

¹⁵ Setu ma ran ur freuz lemm nevez-flamm evidout, gant bizied; mac'hañ a ri ar menezioù, o bruzunañ a ri, hag e lakai ar c'hrec'hioù da vezañ heñvel ouzh pell.

¹⁶ O gwentañ a ri, an avel o c'haso anezho, ar barr-amzer o stlabezo. Ha te a laouenaio en AOTROU, hag e kavi da c'hloar e Sant Israel.

¹⁷ An ezhommeien hag ar beorien a glask dour, ha n'eus ket; o zeod a zo disec'het gant an itik. Me an AOTROU o selaouo. Me Doue Israel ne zilezin ket anezho.

¹⁸ Lakaat a rin stêrioù war al lec'hioù uhel, ha mammennoù e-kreiz an traoniennoù. Treiñ a rin ar gouelec'h e stank-dour, hag an douar sec'h e stivelloù.

¹⁹ Plantañ a rin er gouelec'h gwez-sedrez, kasia, meurta, gwez-olivez, lakaat a rin el lec'hioù difrouezh gwez-siprez, tilh ha beuz a-gevret,

²⁰ evit ma welint ha ma ouezint, ma eveshaint ha ma komprenint holl, ez eo dorn an AOTROU en deus graet an traoù-se, hag ez eo Sant Israel en deus krouet anezho.

²¹ Tostait da zifenn ho kaoz, eme an AOTROU, diskouezit ho prouennoù, eme roue Jakob.

²² Ra ziskouezint anezho, ra zisklêrint deomp ar pezh a dle c'hoarvezout, ra zisklêrint petra 'zo deuet da vezañ an traoù kentañ, evit ma taolimp evezh outo ha ma'c'h anavezimp o diwezh; lakait ac'hanomp da glevout an traoù da zont,

²³ disklêrit an traoù en em gavo diwezhatoc'h, hag e ouezimp ez oc'h doueed; grit mat pe drouk, hag e welimp, hag ec'h eveshaimp a-gevret.

²⁴ Setu ez oc'h nebeutoc'h eget netra, hag ar pezh a rit n'eo mann ebet. Un euzhusted eo en em blijout ennoc'h.

²⁵ E savet em eus eus an hanternoz hag e teuio; eus ar sav-heol e c'halvo va anv, kerzhout a raio war ar briñsed evel war ar fank, evel ma vac'h ar poder ar pri.

²⁶ Piv en deus henn disklêriet adalek ar penn-kentañ evit m'henn goufemp? Piv en deus henn lavaret en a-raok, ma lavarfemp: Reizh eo? Met den n'en deus henn disklêriet, den nen deus roet d'henn klevout, den n'en deus klevet ho kerioù.

²⁷ Me eo an hini kentañ o lavarout da Sion: Setu int-i amañ! Setu int-i amañ! Hag e roin da Jeruzalem ur c'hannad a geloù mat.

²⁸ Sellet em eus ha ne oa den, kuzulier ebet en o zouez evit respont pa c'houlennan.

²⁹ Setu n'int holl nemet moged, o oberennoù n'int nemet netra, o idoloù a zo avel ha disneuz.