Adlezenn 3 - Bibl Koad 21: Ar Bibl e Brezhoneg evit ar Vretoned

Pennad 3 Trec'h war Og. Hêrezh Ruben, Gad hag hanter-veuriad Manase. Difennet eo ouzh Moizez da dreuziñ

¹ Aet omp en-dro da bignat dre hent Basan. Og, roue Basan, a yeas a-ziarbenn deomp gant e holl bobl evit stourm ouzhimp en Edrei.

² An AOTROU a lavaras din: Na'z pet ket aon dirazañ, rak lakaet em eus anezhañ etre da zaouarn, gant e holl bobl hag e vro. Hag e ri dezhañ evel ma ec'h eus graet da Sihon, roue an Amoreaned, a oa o chom en Hesbon.

³ An AOTROU hon Doue a lakaas etre hon daouarn Og, roue Basan, gant e holl bobl. Trec'hiñ a rejomp anezhañ betek ma ne chomas den ebet.

⁴ Kemeret hon eus e holl gêrioù, ne voe kêr ebet ha ne gemerjomp ket: tri-ugent kêr, holl rannvro Argob, rouantelezh Og e Basan.

⁵ Ar c'hêrioù-se a oa kreñvaet, gant mogerioù uhel, dorojoù ha sparloù, ouzhpenn ar c'hêrioù e niver bras-meurbet n'o doa ket a vogerioù.

⁶ Lakaet hon eus anezho da verz evel ma hon doa graet da Sihon, roue Hesbon. Lakaet hon eus an holl gêrioù da verz, gwazed, gwragez, bugale.

⁷ Preizhet hon eus evidomp al loened ha madoù ar c'hêrioù.

⁸ En amzer-se hon eus kemeret eus dorn daou roue an Amoreaned ar vro a oa en tu-mañ d'ar Jordan, adalek froud Arnon betek Menez Hermon,

⁹ an Hermon a vez galvet Sirion gant ar Sidoniz ha Senir gant an Amoreaned,

¹⁰ holl gêrioù ar blaenenn, holl C'halaad, holl Vasan betek Salka hag Edrei, kêrioù rouantelezh Og e Basan.

¹¹ Og, roue Basan, a oa e-unan manet e dilerc'h ar Refaim. E wele a oa ur gwele houarn, ha n'emañ ket e Rabbad e-touez mibien Ammon? E hirder a zo nav ilinad, e ledander pevar ilinad, a ilinad den.

¹² En amzer-se hon eus kemeret dalc'h eus ar vro-se. Roet em eus d'ar Rubeniz ha d'ar C'hadiz an douaroù adalek Aroer, a zo war froud Arnon, hag an hanter eus menez Galaad gant e gêrioù.

¹³ An nemorant eus Galaad ha Basan a-bezh, rouantelezh Og, am eus roet da hanter-veuriad Manase, holl rannvro Argob gant Basan a-bezh, a c'halved bro ar Refaim.

¹⁴ Jair mab Manase a gemeras holl rannvro Argob betek harz ar C'heshurianed hag ar Vaakatianed hag a roas e anv da vourc'hioù Basan, galvet Bourc'hioù Jair betek hiziv.

¹⁵ Roet em eus Galaad da Vakir.

¹⁶ D'ar Rubeniz ha d'ar C'hadiz em eus roet adalek Galaad betek froud Arnon, betek kreiz ar froud, ha betek froud Jabok, harz gant mibien Ammon,

¹⁷ hag ar blaenenn bevennet gant ar Jordan, adalek Kinnered betek mor ar blaenenn, Mor an Holen, e traoñ ar Pisga, war-zu ar sav-heol.

¹⁸ En amzer-se em eus roet urzhioù o lavarout: An AOTROU ho Toue en deus roet deoc'h ar vro-mañ evit he ferc'hennañ. C'hwi holl, tud kadarn, tremenit harnezet dirak ho preudeur, mibien Israel.

¹⁹ Ra chomo hepken ho kwragez, ho pugaligoù hag ho loened, ha gouzout a ran hoc'h eus kalz, er c'hêrioù am eus roet deoc'h,

²⁰ ken na roio diskuizh an AOTROU d'ho preudeur evel deoc'h, ha ken na berc'hennint int ivez ar vro emañ an AOTROU ho Toue o vont da reiñ dezho en tu all d'ar Jordan. Hag e tistroiot pep hini ac'hanoc'h d'an dalc'h am eus roet deoc'h.

²¹ En amzer-se em eus roet urzhioù da Jozue o lavarout: Da zaoulagad o deus gwelet ar pezh en deus graet an AOTROU ho Toue d'an daou roue-se; evel-se e raio an AOTROU d'an holl rouantelezhioù az po da dremen drezo.

²² N'ho pet ket aon razo, an AOTROU ho Toue a stourmo evidoc'h.

²³ En amzer-se em eus goulennet gras digant an AOTROU o lavarout:

²⁴ Aotrou AOTROU, kroget ec'h eus da ziskouez da'z servijer da vraster ha da zorn kreñv, rak pehini eo an doue, en neñv ha war an douar, a c'hellfe seveniñ oberennoù ha burzhudoù heñvel ouzh da re?

²⁵ Me az ped, ma tremenin ha ma welin ar vro vat-se a zo en tu all d'ar Jordan, ar menez mat-se hag al Liban.

²⁶ Met an AOTROU a fuloras a-enep din en abeg deoc'h, ne selaouas ket ouzhin. An AOTROU a lavaras din: A-walc'h eo! Na gomz ken ouzhin eus an afer-se!

²⁷ Pign war-lein ar Pisga, sav da zaoulagad war-zu ar c'huzh-heol ha war-zu an hanternoz ha war-zu ar c'hreisteiz ha war-zu ar sav-heol, ha sell gant da zaoulagad; met ne dremeni ket ar Jordan-se.

²⁸ Ro urzhioù da Jozue, kreñva anezhañ, kennerzh anezhañ, rak eñ eo a dremeno dirak ar bobl-mañ, hag a roio da hêrezh dezho ar vro a weli.

²⁹ Chomet omp en draonienn a-dal da Vet-Peor.