Adlezenn 2 - Bibl Koad 21: Ar Bibl e Brezhoneg evit ar Vretoned

Pennad 2 Er gouelec'h. Trec'h war Sihon

¹ Aet omp en-dro d'ar gouelec'h war-zu ar Mor Ruz, evel m'en doa lavaret an AOTROU din, ha kerzhet hon eus pell amzer war-dro da Venez Seir.

² An AOTROU a gomzas ouzhin o lavarout:

³ Kerzhet a-walc'h hoc'h eus war-dro d'ar menez-se, troit war-zu an hanternoz.

⁴ Ro urzhioù d'ar bobl ha lavar: Tremen a reot war harz ho preudeur, mibien Ezaü a zo o chom e Seir. Hag o devo aon razoc'h, met diwallit mat:

⁵ Arabat brezeliñ outo, rak ne roin ket deoc'h eus o bro, zoken evit derc'hel sol ho treid; roet em eus da Ezaü Menez Seir da hêrezh.

⁶ Prenañ a reot diganto evit arc'hant ar boued a zebrot, ha prenañ a reot ivez diganto evit arc'hant an dour a evot.

⁷ Rak an AOTROU da Zoue en deus da venniget e kement a ri gant da zaouarn. Anavezet en deus da gerzhadeg dre ar gouelec'h bras-mañ. An AOTROU da Zoue a zo bet ganit e-pad an daou-ugent vloaz-se, ha netra n'en deus graet diouer dit.

⁸ Tremenet omp e-kichen hor breudeur, mibien Ezaü a zo o chom e Seir, hebiou da hent ar blaenenn, hebiou da Elad ha da Ezion-Geber, ha troet hon eus da dremen dre hent gouelec'h Moab.

⁹ An AOTROU a lavaras din: Na stourm ket a-enep ar Voabiz ha na vrezel ket outo, rak ne roin netra eus o bro dit en hêrezh; roet em eus da vibien Lot Ar da hêrezh.

¹⁰ An Emim a oa o chom eno gwechall, ur bobl vras ha niverus, a vent uhel evel an Anakim.

¹¹ Brudet e oant evel Refaim, evel an Anakim, met ar Voabiz a c'halve anezho Emim.

¹² An Horianed a oa o chom e Seir gwechall. Mibien Ezaü o c'hasas kuit hag o distrujas azirazo; hag e chomjont en o lec'h evel m'en deus graet Israel e bro e hêrezh, en deus roet an AOTROU dezhañ.

¹³ Bremañ savit ha treuzit froud Sered. Treuzet hon eus froud Sered.

¹⁴ An amzer ma'z omp bet o kerzhout eus Kadesh-Barnea betek tremen froud Sered a zo bet eizh vloaz ha tregont, betek ma voe kuzumet holl rummad an dud a vrezel a-greiz ar c'hamp, evel m'en doa touet an AOTROU dezho.

¹⁵ Dorn an AOTROU a voe a-enep dezho evit o distrujañ a-greiz ar c'hamp, betek ma voent bet kuzumet.

¹⁶ Pa voe kuzumet an holl dud a vrezel dre ar marv a-douez ar bobl,

¹⁷ an AOTROU a gomzas din o lavarout:

¹⁸ Hiziv e tremeni harz Moab, en Ar,

¹⁹ hag e tostai ouzh mibien Ammon, met na stourm ket a-enep dezho ha na vrezel ket outo, rak ne roin netra eus bro mibien Ammon dit en hêrezh; roet em eus anezhi da vibien Lot da hêrezh.

²⁰ Ar vro-se ivez a oa brudet evel bro Refaim. Ar Refaim a oa o chom eno gwechall, met an Ammoniz a c'halve anezho Zamzumin,

²¹ ur bobl vras ha niverus e oa, a vent uhel evel an Anakim. An AOTROU o distrujas dirak an Ammoniz, a gasas anezho kuit; hag e chomjont en o lec'h.

²² Evel-se en deus graet evit mibien Ezaü a zo o chom e Seir, pa zistrujas an Horianed dirazo; int a gasas anezho kuit, hag e chomjont en o lec'h betek hiziv.

²³ An Aviz, hag a oa o chom er c'hêriadennoù betek Gaza, a voe distrujet gant ar Gaftorim o tont eus Kaftor; int a chomas en o lec'h.

²⁴ Savit, kit ha treuzit froud Arnon. Sell, lakaet em eus etre da zaouarn Sihon, roue Hesbon, an Amorean, gant e vro. Krog da berc'hennañ, gra ar brezel outañ.

²⁵ Adal hiziv ez an da skuilhañ spont hag aon ac'hanout war ar pobloù dindan an neñv a-bezh, en doare ma krenint ha ma vint spontet o klevout komz diwar da benn.

²⁶ Neuze em eus kaset, eus gouelec'h Kedemod, kannaded da Sihon roue Hesbon, gant komzoù a beoc'h o lavarout:

²⁷ Va lez da dremen dre da vro, kerzhout a rin dre hent bras hep distreiñ nag a-zehou nag a-gleiz.

²⁸ Gwerzhañ a ri din ar boued a zebrin evit arc'hant, ha reiñ a ri din an dour a evin evit arc'hant. War droad e tremenin hepken.

²⁹ Evel-se o deus graet din mibien Ezaü a zo o chom e Seir hag ar Voabiz a zo o chom en Ar, ken na'm bo tremenet ar Jordan evit mont er vro en deus roet an AOTROU deomp.

³⁰ Sihon, roue Hesbon, ne fellas ket dezhañ hol lezel da dremen dre e vro, rak an AOTROU da Zoue en doa kaletaet e spered ha reudet e galon, evit lakaat anezhañ etre da zaouarn, evel m'emañ hiziv.

³¹ An AOTROU a lavaras din: Sell, emaon o vont da reiñ dit Sihon hag e vro. Krog da berc'hennañ e vro evel hêrezh.

³² Sihon a yeas a-ziarbenn deomp gant e holl bobl evit stourm ouzhimp e Jahaz.

³³ An AOTROU hon Doue a roas anezhañ deomp, pilet eo bet ganeomp, eñ, e vibien hag e holl bobl.

³⁴ Kemeret hon eus e holl gêrioù ha lakaet hon eus anezho da verz, gwazed, gwragez, bugale, ha ne chomas den ebet.

³⁵ Preizhet hon eus evidomp al loened ha madoù ar c'hêrioù hor boa kemeret.

³⁶ Adalek Aroer war ribl froud Arnon hag ar gêr a zo e-kichen ar froud betek Galaad, ne voe kêr ebet re greñv evidomp. An AOTROU hon Doue a roas holl deomp.

³⁷ Met ne dostai ket ouzh bro mibien Ammon, nag ouzh lec'h ebet e-kichen froud Jabok, nag ouzh kêrioù ar menez, nag ouzh kement en deus difennet ouzhimp an AOTROU hon Doue.