YOANE 3 - Kakwa New Testament 1977

¹ Nyenaga le’de Farisayota, kari ti lepe kine se naga Nikodemo‚ lepe a druma lo Yahudi kilo,

² ŋutu ŋanilo apondra ku Yesuni kuwaze, druga takindra lepe adi, “Katogoloni, yi adeni adi do a katogoloni lo ŋiyu ku Ŋun yulo‚ igbonaga le’de ŋutu ’bayi lo romoki kondra kpiyesi na konu do kine kugbo Ŋun ani gbo’da ku lepe kugele.”

³ Yesu druga teyitokindro lepe adi, “Na takindra do a ’diri, kugbo le’de ŋutu aku yuŋe a loludu, lepe ani romoki medra tumata na Ŋun ina.”

⁴ Nikodemo druga piza lepe adi, “Ŋutulo roromoki yuŋe ti a temezika adidinyo ya? Lepe roromoki lubo ku ŋote i pele yu luŋa mure i yuŋe ’do ya?”

⁵ Yesu druga teyitokindro lepe adi, “Na takindra do a ’diri, kugbo le’de ŋutu aku yuŋe ku pio‚ ku Yuka Nakiyena itro, lepe ani romoki lubo i tumata na Ŋun ina kata yu.

⁶ Ŋo laga lo yuŋe ku mugulo a lo mugu‚ ’bo ŋo laga lo yuŋe ku Yuka Nakiyelo a lo yuka.

⁷ Ku rarami mugu ku naga ma na takindri do adi, ‘Ku ta yuŋeleni ’do’ ina.

⁸ Kobuŋena budya i piri naga ma nye nyadrinina‚ do yiyinga woŋo na lepena‚ ’bo do aku de piri naga me lepe ŋiyuni nu ku naga ma lepe utini nu. Ŋutulu giri gele gele lo yuŋele ku Yuka Nakiyena kilo gbo de.”

⁹ Nikodemo druga piza lepe adi‚ “Kine kuliata de ma gbo’da adidinyo ya?”

¹⁰ Yesu druga teyitokindro lepe adi‚ “Do a katogoloni lo Isiraeli kilo, ’bo do aku deni kine kuliata de ya?

¹¹ Na takindra do a ’diri, yi tazu kulia naga ma yi dendri kine‚ yi ’dodru bo na kulia naga ma yi medri kine‚ ’bo ta aku rugo bo na kulia naga ma yi ’dodri kine.

¹² Ku na laga takindra ta kulia ti kuzo kine‚ ’bo ta aku rugo‚ ku na lo takindra ta kulia ti ’diko kine, ta irugo adidinyo ya?

¹³ Le’de ŋutu ’bayi laga akiyadru i ’diko yulo‚ ŋolo lo kiyundra kani ŋiyu i ’diko yulo‚ laga a Ŋiro lo ŋutulo.

¹⁴ Beti naga ma Mose ’bi’i munulo i diŋo kata yuna‚ gbode Ŋiro lo ŋutulo i’bi’biluzi ki yu de,

¹⁵ adi ŋutulu giri lo rugo lepe kilo ma gbo’da ku ru naga ani lengana.”

¹⁶ ’Bo Ŋun anyari ŋutulu laga i kani kilo koru‚ kuwade lepe atikindra Ŋiro lonye laga lo yuŋe gelelo‚ adi ŋutu gele gele laga lo rugo lepelo ka’bi ku karaki‚ ’bo ma gbo’da ku ru naga ani lengana.

¹⁷ ’Bo Ŋun agbo’da sunyundro Ŋiro lonyelo i kani i ŋerakindra na ŋutu ti ka kilo kulia naroni, ’bo ma ŋutulu kilo riteni ku lepe ayu.

¹⁸ Ŋutu lo rugo lepelo‚ ani ŋeraki kulia naro, ’bo ŋutu laga aku rugo lepelo aŋeraki azo‚ igbonaga lepe aku rugo kari ti Ŋiro lo yuŋe gele lo Ŋun ilona.

¹⁹ Kulia na ŋeŋera kine gbo de. Pararana apondra i kani azo, ’bo ŋutulu kilo nyadru mudena alangu pararana, igbonaga konesi kaSiko kine a naro ina.

²⁰ Ŋutu lo ko ndra kulia narolo ŋmoza pararana, lepe ani pondra i pararani, konesi ti lepe kine ka’bi ku kpeza ’beri gboŋa.

²¹ ’Bo ŋutu lo kondra ŋo laga a ’dirilo nye lo pondra i pararani, konesi ti lepe kine ma kpeza ’beri adi kona ku Ŋun.

²² I bo na kine kuliata de Yesu druga utu kasi lotodiniki kanye kilo i ka na Yudaya yu. Lepe druga saka yu de kasi ko druga tikindra baputizilo.

²³ Ti Yoane lu tikindra baputizilo Ainona nyoga ku Salema yu, igbonaga pio kine zore i nu piri dena. ’Bo ŋutulu kilo bita utu ku lepe yu i ’deba na baputizilo,

²⁴ ti Yoane inga aku zoŋa i drodrora yu.

²⁵ Nyenaga lotodiniki ku’de ti Yoane kilo apoki i rerenya ku le’de Yahuditio ku kulia ti tokela kine.

²⁶ Kuwade ko druga utu ku Yoane yu, druga takindra lepe adi, “Katogoloni, ŋutu laga lo saka seku do Yorodani i lu lozo, laga mo do trugi kulia ti lepe kinelo, mete, lepe lo tikindra baputizilo, ŋutulu kilo giri kilo ipondra ku lepeni.”

²⁷ Yoane druga teyitokindro ko adi, “Ŋutulo ani romoki rumbi le’de ŋo, kuwa aku tiki lepe ŋiyu i ’diko yu.

²⁸ Ta lepe a’dodru bo nio na kuliana, adi na kulia adi, ‘Na ani gbo’da a Kristo, ’bo na asunye ku lepe i koŋoni.’

²⁹ Ŋutu lo ’deba ŋiro ’diyelo, lepe a ka’depanilo. ’Bo wori lo ka’depani laga lo lira i yinga na kulia ti lepe kinelo gbo ku nyola koru i yinga na roro lo ka’depani ŋanilo. Kuwade ina nyola nio de atorumoki.

³⁰ Todruma na lepena ti ’dudyi. Todruma niona ti yeŋundri ka.”

³¹ Ŋutu lo ŋiyu ki yulo lepe gbo i kuliata giri kini. Ŋutu lo ŋiyu i kuzonilo lepe a ŋutu lo kuzo, lepe lo tazu kulia ti kuzo kine. Ŋutu lo ŋiyu i ’diko yulo gbo i kuliata giri kini.

³² Ŋo laga ma lepe medri, ma lepe yingi kilo, lepe lo ’dodru bo na kulia ŋani kine, ’bo le’de ŋutu ’bayi lo rugo bo na kulia naga ma lepe ’dodri kine.

³³ Ŋutu lo rugo bo na kulia naga ma lepe ’dodri kinelo‚ atanyakindra kpiye nanyena kini‚ adi Ŋun ilo a ’diri.

³⁴ Ŋutu laga ma Ŋun sunyundrilo tazu kulia ti Ŋun kine, igbonaga Ŋun ani tikindra Yuka Nakiyena be ŋo laga lo momoro.

³⁵ Monyelo anyari Ŋirolo‚ ’bo lepe atikindra kuliata kine giri ku lepe i kenini.

³⁶ Ŋutu lo rugo Ŋirolo gbo ku ru naga ani lengana. Ŋutu laga ani sobu kulia ti Ŋirolo kinelo ’baka medra runi, ’bo ŋoma na Ŋun ina ina saka ku lepe kini.