YOANE 2 - Kakwa New Testament 1977

¹ I luŋa lo musala lu tokomona na ’depani noka nu kata Galili yu i kezi naga Kana yuna, ti ŋote na Yesuna nu yu.

² ’Bo Yesu lepe ku lotodiniki kanye kilo aluŋu itro.

³ Ku suwe ti konye ti zabibu kine naga aduwe, ŋote na Yesuna druga takindra lepe adi, “Suwe kasiko ti konye ti zabibu kine gbo’di ’bayi.”

⁴ Yesu druga teyitokindro lepe adi, “Nokana, ku tataki na kulia ku’de. Luŋa liolo inga aku yeŋundra.”

⁵ Ŋote na lepena druga takindra kaloko kilo adi, “Kulia giri na taki lepe ta kine, ’dia gbo adinyo kpe, koneta.”

⁶ Kuwade ti ŋoropo laga akepa a luku’dolo ti pio bukiye kilo kulu atogbo’daki yu de, laga Yahudi kilo ma yakizi i toke’ya na ’beri kilo, gelelo tozore ku soŋgbolo mure kuwa musala.

⁷ Yesu druga takindra kaloko kilo adi, “Tozoreta luku’dolo kilo ku pio kine.” Ko druga tozodru zore ’biru’biru.

⁸ Lepe druga takindra ko adi, “ ’Bo ’ilarata, zoŋeta ku kametani lo komolo yu.” Ko druga ’iladru, zonga de.

⁹ Kametani lo komolo kugbo a’de’dendra pio naga gbo’di awusa a suwe ti konye ti zabibu kine, ’bo ti aku deni piri ŋani na ŋiyuni ina, ’bo ka’ila ti pio kilo lo dendra ’du, kametani lo komolo druga lungu ko’doonilo,

¹⁰ druga takindra lepe adi, “Ŋutulu giri bita tikindra suwe ti konye ti zabibu naga na toto’bi kine a nze. Kugbo ŋutulu kilo amozu tritri azo‚ ko bita tikindra naga patata kine a bo. ’Bo laga do ariridra suwe ti konye ti zabibu na toto’bi kine yeŋundra tinade.”

¹¹ Ilo kpiye de laga a kayo lo konu Yesu Galili yulo i kezi naga Kana yuna i kpeza na todruma nanyena. Kuwade lotodiniki ti lepe kilo druga rugo lepe.

¹² I bo ŋanina Yesu druga ŋiyoro tu Kaperinauma yu, lepe ku mugu, kasi ŋote nanyena, ku luŋaseri ku lotodiniki kanye kilo itro. Ko druga saka yu de luŋa ’baziŋa.

¹³ Kugbo kolo druma naga a Roseto na Yahudi kilona naga gbo’di nyoga, Yesu druga utu Yerusalema yu.

¹⁴ Lepe druga rumbi i kadi na Ŋun ina kata yu katogboro ti su, kebilizi, ku a’bugo, ku katogbuwa ti riye ti kulu agbi’diki yu de.

¹⁵ Ku lepe laga akukundra pata na tratrakana, lepe druga droŋodru koŋa giri kaŋo i kadi na Ŋun ina kata yu ku kebilizi kine ku su kilo. Lepe druga teteriri riye ti katogbuwa ti riye kilo kaŋo druga dudukuza mesala kasiko kine.

¹⁶ Lepe druga takindra katogboro ti a’bugo kilo adi, “Zoŋeta kilo kapazi de kaŋo. Ku wowonyuta kadi na Monye liona a kadi na togboroni kapazi.”

¹⁷ Lotodiniki ti lepe kilo druga rambu adi awuro adi, “Puso na kadi nonuna ilelenga na.”

¹⁸ Yahudi kilo druga teyitokindro lepe adi, “Do ilo kpekindra yi kpiye laga a inyo mo do kondri kine konesi dena ya?”

¹⁹ Yesu druga teyitokindro ko adi, “Ranyeta ina kadi na Ŋun de kaŋo, ’bo i bo na luŋazi musala na i’du’du lepe i piri ’do.”

²⁰ Yahudi kilo druga kulia adi‚ “ ’Duko na ina kadi na Ŋun de ina ’dumadru kiŋazi meria iŋmani ku konye bukiye, ’bo do i’du’du lepe ’do i luŋa musala ’du ya?”

²¹ ’Bo lepe tazu kulia ti kadi naga a mugu nanyena.

²² Kuwade i bo na ŋiye na lepe naga i dridriŋi na ŋutulu laga atatuwa kilo yuna, lotodiniki ti lepe kilo druga rambu adi lepe atakindra se kine kulia de, druga ko rugo kulia na wuwuro kine ku kulia na ta Yesu kazu kunu de.

²³ Ku inga Yesu lu Yerusalema kata yu ku kulia ti kolo druma na Rosetona kine‚ ŋutulu rodri arugo kari ti lepe kine ku medra na kpiyesi naga ma lepe kondri kine.

²⁴ ’Bo Yesu lepe aku nyadru ’delakindra teili kasiko kini,

²⁵ igbonaga lepe adeni ŋutulu girina. Aku nyadru adi le’de ŋutu ka’bi ku kpekpe kulia ti ŋutulu naga lepe ku mugu adeni ŋo laga ku loŋutu i teiliko yulo ina.