Lûqa 3 - Peymana Nû (Încîl)

Dannasînîya Yûhʼennayê nixumdar

¹ Panzdeh salîya pʼadşatîya Tîberyoyê Qeyserda, Pîlatoyê Pontîyo welîyê Cihûstanê bû, Hêrodes serwêrê Celîlê bû, Fîlîpoyê birê wî serwêrê qeza Îtûryayê û Traxonîdayê bû û Lûsanyas serwêrê Avêlînyayê bû,

² Henan û Qeyafa jî serekkʼahîn bûn. Hingê xebera Xwedê berʼîyêda Yûhʼennayê kurʼê Zekerîyarʼa hat

³ û Yûhʼenna hate hʼemû dor-berêd çʼemê Ûrdunê dannasîn dikir, ku cimeʼt ji gunekirinê vegerʼe û bi avê bê nixumandinê, wekî Xwedê wan bibaxşîne.

⁴ Çawa kʼitêba Îşaya pʼêxemberda nivîsar e ku dibêje: «Dengê berʼîyêda dike gazî: ‹Rʼîya Xudan hazir bikin û şiverʼîyêd Wî rʼast bikin.

⁵ Hʼemû gelî bira tʼijî bin, çʼîya-banî nimiz bin, rʼîyêd xaro-maro rʼast bin û çʼeʼl-çʼûl dûz bin.

⁶ Û her kesê azayîya Xwedê bibîne›».

⁷ Gelek dihatine cem Yûhʼenna, ku ji wî bêne nixumandinê. Ewî wanrʼa digot: «Çʼêjikêd meʼra! Kʼê werʼa got, ku hûn ji xezeba tê birʼevin?

⁸ De bi kirêd qenc bidine kʼifşê, ku hûn ji gunekirinê vegerʼîyane. Û rʼanebin nebêjin: ‹Birahîm bavê me ye›. Ez werʼa dibêjim, ku Xwedê ji van kevira jî dikare zarʼa Birahîmrʼa derxe.

⁹ Va ye bivir li ser rʼawê darê ye. Her dara ku berê qenc neyne, wê bê birʼînê û avîtinê nava êgir».

¹⁰ Eʼlaletê ji wî pirsî û got: «Lê em çi bikin?»

¹¹ Ewî li wan vegerʼand û got: «Du dest kʼincê kʼê hene, bira yekî bide wî, yê kʼê ku tʼune û xurekê kʼê heye, bira dîsa usa bike».

¹² Xercgir jî hatin ku bêne nixumandinê û wîrʼa gotin: «Dersdar, em çi bikin?»

¹³ Ewî wanrʼa got: «Çiqas ji we tê xwestinê ji wî zêdetir nestînin».

¹⁴ Eskera jî ji wî pirsî: «Lê em çi bikin?» Ewî wanrʼa got: «Kesekî neşêlînin, bêbextîyê li xelqê nekin û bi heqê xwe rʼazî bin».

¹⁵ Hʼemû hîvîyê bûn û bona Yûhʼenna dilê xweda digotin: «Gelo ev e Mesîh?»

¹⁶ Yûhʼenna li hʼemûya vegerʼand û got: «Ez we bi avê dinixumînim, lê Yekî ji min qewattir wê bê. Ez ne hêja me benê çarixêd Wî jî vekim. Ewê we pê Rʼuhʼê Pîroz û êgir binixumîne.

¹⁷ Melhʼeba Wî destê Wîda ye. Ewê bêdera Xwe paqij ke, genim bike eʼmbara Xwe, lê kayê wê bi agirê ku natemire bişewitîne».

¹⁸ Awa Yûhʼenna bi gelek tiştêd din jî xelq şîret dikir û Mizgînî dida.

¹⁹ Lê gava Yûhʼenna li Hêrodesê serwêr jî hilat bona Hêrodîya jina birê wî û hʼemû xirabîyêd ku wî dikirin,

²⁰ hingê Hêrodes ser van kirinada ev neheqî jî kir, ku Yûhʼenna avîte kelê.

Îsa tê nixumandinê

²¹ Gava hʼemû cimeʼt dihate nixumandinê, Îsa jî hate nixumandinê. Wê demê ku dua dikir, eʼzman vebû

²² û Rʼuhʼê Pîroz bi bedenî mîna kevotkekê ser Wî danî û dengek ji eʼzmên hat û got: «Tu kurʼê Minî delal î, ku Ez ji Te rʼazî me».

Rʼikʼinyata Îsa

²³ Îsa nêzîkî sî salî bû, gava Ewî dest bi kʼarê Xwe kir û wan tʼirê Ew kurʼê Ûsiv bû, Ûsivê Elî,

²⁴ Elîyê Metat, Metatê Lêwî, Lêwîyê Melkʼê, Melkʼêyê Yannay, Yannayê Ûsiv,

²⁵ Ûsivê Metîtîya, Metîtîyayê Amos, Amosê Nehûm, Nehûmê Heslî, Heslîyê Necay,

²⁶ Necayê Mehat, Mehatê Metîtîya, Metîtîyayê Şêmeyîn, Şêmeyînê Yûsêx, Yûsêxê Yoda,

²⁷ Yodayê Yûhenan, Yûhenanê Rʼêşa, Rʼêşayê Zerûbabel, Zerûbabelê Şaltîyêl, Şaltîyêlê Nerî,

²⁸ Nerîyê Melkʼê, Melkʼêyê Êdî, Êdîyê Qosam, Qosamê Êlmedam, Êlmedamê Er,

²⁹ Erê Yêşû, Yêşûyê Êlîyazêr, Êlîyazêrê Yorîm, Yorîmê Metat, Metatê Lêwî,

³⁰ Lêwîyê Şimhʼûn, Şimhʼûnê Cihûda, Cihûdayê Ûsiv, Ûsivê Yonam, Yonamê Êlyaqîm,

³¹ Êlyaqîmê Melyo, Melyoyê Mena, Menayê Metîtîya, Metîtîyayê Natʼan, Natʼanê Dawid,

³² Dawidê Yêşa, Yêşayê Ovêd, Ovêdê Bowaz, Bowazê Selmon, Selmonê Nehşon,

³³ Nehşonê Amînadav, Amînadavê Admîn, Admînê Aram, Aramê Hesrûn, Hesrûnê Pêrês, Pêrêsê Cihûda,

³⁴ Cihûdayê Aqûb, Aqûbê Îshaq, Îshaqê Birahîm, Birahîmê Têrah, Têrahê Nehor,

³⁵ Nehorê Serûx, Serûxê Rʼêwo, Rʼêwoyê Pêlêg, Pêlêgê Eber, Eberê Şelah,

³⁶ Şelahê Qênan, Qênanê Arpexşad, Arpexşadê Sam, Samê Nuh, Nuhê Lamex,

³⁷ Lamexê Metûşela, Metûşelayê Henox, Henoxê Yarêd, Yarêdê Mahalalêl, Mahalalêlê Qênan,

³⁸ Qênanê Enoş, Enoşê Sêtʼ, Sêtʼê Adem û Ademê Xwedê.