Marqos 5 - Пәймана Ну (Инщил)

Иса йәки щьнакʼәти ԛәнщ дькә

¹ Әԝана дәрбази ԝи бәри гола Щәлиле бун у гьһиштьнә тʼопрахед Гьрасине.

² Гава кӧ Иса жь ԛәйьке дәркʼәт, һьнге жь нав горʼьстана мәрьвәк рʼасти Ԝи һат, кӧ рʼӧһʼе һʼәрам перʼа бу.

³ Әԝ нав горʼьстанада дьма у тʼӧ кәси иди нькарьбу бь зьнщира жи әԝ гьреда.

⁴ Чьмки гәләк щара әԝ бь ԛәйд у зьнщира гьредабун, ле ԝи зьнщир ԛәтандьбун у ԛәйд шкенандьбун. Тʼӧ кәси нькарьбу әԝ зәфт бькьра.

⁵ Тʼьме шәв у рʼож горʼьстанада у сәре чʼийа дькьрә ԛирʼин, пе кәвьра хԝә бьриндар дькьр.

⁶ Гава әԝи дурва Иса дит, бәзи, хԝә авитә бәр ньга

⁷ у бь дәнгәки бьльнд кьрә ԛирʼин у готе: «Тӧ чь жь мьн дьхԝази, Исайе Кӧрʼе Хԝәдейе Һәри Жорьн? Тӧ хатьре Хԝәде ки, мьн нәдә щәфе!»

⁸ Әԝи әв йәк дьгот, чьмки Иса дьготе: «Һәй рʼӧһʼе һʼәрам! Жь ви мәрьви дәркʼәвә!»

⁹ Иса же пьрси у гот: «Наве тә чь йә?» Әԝи жи гот: «Наве мьн Кʼомәскәр ә, чьмки әм гәләк ьн».

¹⁰ У гәләки рʼәща жь Иса дькьр, кӧ ԝан жь ԝе тʼопрахе дәрнәхә.

¹¹ Ԝьр ль синге чʼийе сурики бәразайи мәзьн дьчʼерийа.

¹² Рʼӧһʼед һʼәрам рʼәща жь Иса кьрьн у готьн: «Мә бьшинә нава бәраза, әм бькʼәвьнә нава ԝан».

¹³ Әԝи жи изьн да ԝан, рʼӧһʼед һʼәрам дәркʼәтьн у кʼәтьнә нава бәраза. Әԝ сури незики дӧ һʼәзар бәраза бу, әԝ жорда рʼәви, хԝә жь кәнделда авитьнә голе у хәньԛин.

¹⁴ Бәразван рʼәвин чунә бажар у гӧнда, әв йәк гьли кьрьн. У бьнәли һатьн кӧ тьштед буйи бьбиньн.

¹⁵ У һатьнә щәм Иса, дина хԝә дане, ԝе әԝ мәрьве щьнакʼәтийи кӧ кʼомәскәрәкә щьна перʼа бу, кʼьнще ԝи ле, сәр һʼьше хԝәда һати рʼуньшти йә. Һьнге әԝ тьрсийан.

¹⁶ Әԝед кӧ әв йәк дитьбун щьмәʼтерʼа гьли кьрьн, кӧ чь һатә сәре ԝи щьнакʼәти у бәраза.

¹⁷ Һьнге ԝана рʼәща жь Иса кьр, кӧ Әԝ жь әʼрде ԝан һәрʼә.

¹⁸ Гава Иса кʼәтә ԛәйьке, әԝи кӧ щьнакʼәти бу, рʼәща же кьр, кӧ тʼәви Ԝи һәрʼә.

¹⁹ Ле Иса нәһьшт у жерʼа гот: «Вәгәрʼә мала хԝә у нәфәред мала хԝәрʼа бежә, кӧ Хӧдан бона тә чь кьр у чаԝа ль тә һатә рʼәʼме».

²⁰ Әԝ жи чу у дәстпекьр чь кӧ Иса бона ԝи кьрьбу ԛәза Декаполиседа бәла кьр у һәр кәс әʼщебмайи дьма.

Ԛизька мьри у кʼӧлфәтәкә нәхԝәш

²¹ Гава Иса диса бь ԛәйьке дәрбази ԝи бәре дьн бу, әʼлаләтәкә гьран ль дора Ԝи щьвийа. Гава Әԝ ль дәве голе бу,

²² йәки жь сәрԝеред кʼьниште кӧ наве ԝи Йайиро бу һатә щәм Ԝи, гава ԝи Иса дит, хԝә авитә ньгед Ԝи,

²³ гәләк рʼәща же кьр у гот: «Ԛизька мьн ль бәр мьрьне йә. Ԝәрә у дәстед Хԝә дайнә сәр ԝе, кӧ ԛәнщ бә у бьжи».

²⁴ Иса рʼабу тʼәви ԝи чу. Әʼлаләтәкә гьран пәй Ԝи дьчу у тәнгаси дьданә Ԝи.

²⁵ Ԝьр кʼӧлфәтәк жи һәбу, кӧ донздәһ сале ԝе бун, сәр хуне вәбьбу.

²⁶ Әԝе гәләки дәсте һʼәкимада кʼьшандьбу у һʼәму һәбука хԝә хәрщ кьрьбу, ле тʼӧ чʼарә ле нәбьбу у сәрда һе хьраб бьбу.

²⁷ Әԝе дәрһәԛа Исада бьһист, пьштева һатә нава әʼлаләте у ль кʼьнще Ԝи кʼәт.

²⁸ Чьмки әԝе дьле хԝәда дьгот: «Һәгәр әз тʼәне кʼьнще Ԝи жи кʼәвьм, әзе ԛәнщ бьм».

²⁹ У перʼа-перʼа хун же чʼькийа у бәдәна хԝәда тʼәхмин кьр, кӧ жь еша хԝә ԛәнщ бу.

³⁰ Иса дәстхԝәда пе һʼәсийа кӧ ԛәԝатәк же чу, нав әʼлаләтеда зьвьрʼи у пьрси: «Кʼе ль кʼьнщед Мьн кʼәт?»

³¹ Шагьртед Ԝи готьн: «Тӧ дьбини кӧ әʼлаләт тәнгасийе дьдә Тә, ле Тӧ дьбежи: ‹Кʼе ль Мьн кʼәт?›»

³² Ле Иса дор-бәре Хԝә дьньһерʼи кӧ бьбинә, кʼе әв йәк кьр.

³³ Һьнге кʼӧлфәт ль хԝә һʼәсийа кӧ чь ль ԝе ԛәԝьми, бь тьрсе у ләрьзәке һат хԝә авитә бәр Ԝи у һәр тьшт рʼаст гот.

³⁴ Иса ԝерʼа гот: «Әʼвде! Баԝәрийа тә тӧ ԛәнщ кьри. Бь хер у сьламәт һәрʼә у жь еша хԝә ԛәнщ бә».

³⁵ Иса һе хәбәр дьда, жь мала сәрԝере кʼьниште мәрьв һатьн у готьн: «Ԛиза тә мьр, иди зәʼмәте нәдә Дәрсдар».

³⁶ Ле Иса гӧһ нәда готьна ԝан, ԝи сәрәке кʼьништерʼа гот: «Нәтьрсә, тʼәне баԝәр бькә!»

³⁷ Әԝи нәһьшт кӧ кәс пәй Ԝи һәрʼә, пештьри Пәтрус, Аԛуб у Йуһʼәннайе бьре ԝи.

³⁸ Чахе гьһиштьнә мала сәрәке кʼьниште, Иса дит ԝе һеԝәрза ԝан ә, дьгьрин у дькьнә ԛарʼә-ԛарʼ.

³⁹ Гава Әԝ кʼәтә һьндӧрʼ, ԝанрʼа гот: «Чьма һун дькьн ԛалмә-ԛалм у дьгьрин? Зарʼ нәмьрийә, ле һеньжийә».

⁴⁰ Ԝана ԛәрфе хԝә пе дькьр. Ле Иса һʼәму дәрхьстьнә дәрва, де у баве ԛизьке тʼәви һәр се шагьртед Хԝә һьлдан у кʼәтә щийе кӧ ԛизьк ле бу.

⁴¹ Дәсте ԛизьке гьрт у готә ԝе: «Талита ԛум!» кӧ те фәʼмкьрьне: «Ԛизьк, әз тәрʼа дьбежьм, рʼабә!»

⁴² Ԛизьк перʼа-перʼа рʼабу у гәрʼийа. Әԝ донздәһ сали бу. Әԝед кӧ дитьн һʼьше сәре ԝан чу.

⁴³ Иса һʼьшк тʼәми ль ԝан кьр, кӧ ве йәке кәсирʼа нәбежьн у ԝанрʼа гот, кӧ хԝарьне бьдьнә ԝе.