Marqos 15 - Пәймана Ну (Инщил)

Иса ль бәр Пилато

¹ Сәре сьбәһе зу сәрәкед кʼаһина тʼәви рʼуспийа, ԛанунзана у тʼәмамийа щьвина гьрәгьрарʼа шеԝьрин. Иса гьредан у бьрьн данә дәсте Пилато.

² Пилато жь Ԝи пьрси у гот: «Тӧ йи Пʼадше щьһуйа?» Әԝи щаб да у гот: «Тә бь дәве хԝә гот».

³ Һьнге сәрәкед кʼаһина гәләк тьштада авитьнә Ԝи.

⁴ Пилато диса жь Ԝи пьрси у гот: «Тӧ ԛәт щабәке нади? Дина Хԝә бьде, кӧ чьԛаси давежьнә Тә!»

⁵ Ле Иса иди тʼӧ щаб нәда ԝи, һʼәта кӧ Пилато шаш ма.

Диԝанеда һʼӧкӧме кӧштьне ль сәр Иса дәрдьхьн

⁶ Аԝа һәр Щәжьна Дәрбазбунеда әʼдәте ԝәли бу, кӧ гьртики щьмәʼтерʼа бәрʼдә, кʼижан кӧ ԝан бьхԝәста.

⁷ Гьртик кәледа һәбу наве ԝи Барабас, кӧ тʼәви рʼабәрикʼаред һәвалед хԝә сәрһьлданеда мер кӧштьбун.

⁸ Әʼлаләт щьвийа у жь ԝәли хԝәст кӧ әԝ ль анәгори ԝи әʼдәте хԝә хԝәстьна ԝан бькә.

⁹ Пилато жи ԝанрʼа гот: «Һун дьхԝазьн ԝәки әз бона ԝә Пʼадше щьһуйа бәрʼдьм?»

¹⁰ Әԝи заньбу кӧ сәрәкед кʼаһина жь дәст һʼәвсудийе Иса дабунә дәсте ԝи.

¹¹ Ле сәрәкед кʼаһина һе нав әʼлаләте дан, кӧ бьхԝазьн ԝәки Барабас бона ԝан бе бәрʼдане.

¹² Пилато диса жь ԝан пьрси у гот: «Ле әз иди Әԝи чаԝа бькьм, йе кӧ һун жерʼа Пʼадше щьһуйа дьбежьн?»

¹³ Ԝана кьрә ԛирʼин у готьн: «Ԝи хач кә!»

¹⁴ Пилато ԝанрʼа гот: «Чьма? Әви чь хьраби кьрийә?» Ле ԝана һе дькьрә ԛирʼин: «Ԝи хач кә!»

¹⁵ Пилато хԝәст кӧ әʼлаләт рʼази кьра, Барабас бона ԝан бәрʼда. У Иса да бәр ԛамчийа у да дәсте ԝан, ԝәки бе хачкьрьне.

Әскәр ԛәрфе хԝә ль Иса дькьн

¹⁶ Һьнге әскәра Әԝ бьрә һьндӧрʼе сәрайе, аԝа готи һʼәԝша ԛәсьра ԝәли у һʼәму рʼәфа әскәра ль сәр щьвандьн.

¹⁷ Чӧхәки ширк ле кьрьн у тʼащәк жь стьрийа вәгьрти данә сери.

¹⁸ Дәстпекьрьн сьлав дане у готьн: «Хԝәш бә Пʼадше щьһуйа!»

¹⁹ Пе ԛамиш ль сәре Ԝи дьхьстьн, тʼуйи Ԝи дькьрьн у ль сәр чока ль бәр Ԝи та дьбун.

²⁰ Ле пәй ԛәрфкьрьнерʼа, әԝ чӧхе ширк же ехьстьн, кʼьнщед Ԝи ле кьрьн у бьрьнә дәрва кӧ Ԝи хач кьн.

Хачкьрьна Иса

²¹ Шьмһʼуне жь Курене, баве Скәндәр у Рʼуфо ԝьррʼа дәрбаз дьбу, кӧ жь кʼәԝшен дьһат. Әскәра пʼейи сәр ԝи кьрьн кӧ хаче Иса һьлдә.

²² Иса бьрьнә ԝи щийе кӧ жерʼа Голгота дьготьн, кӧ те фәʼмкьрьне: «Щийе Ԛафа».

²³ Шәрава зьмьр тʼәвкьри дане кӧ вәхԝә, ле Ԝи вәнәхԝар.

²⁴ Әԝ хач кьрьн, сәр кʼьнщед Ԝи пʼәшк авитьн, кʼа кʼерʼа ԝе чь бькʼәвә, нава хԝәда бәла кьрьн.

²⁵ У сьбәһе сьһʼәт нәһә бу, гава Әԝ хач кьрьн.

²⁶ Ньвисара нәһәԛийа Ԝи аһа ньвисар бу: «ПʼАДШЕ ЩЬҺУЙА».

²⁷ Тʼәви Ԝи дӧ ԛачах жи хач кьрьн, йәк ль мьле Ԝийи рʼасте, йе дьн ль мьле Ԝийи чʼәпе.

²⁸ Бь ви аԝайи әԝ ньвисар һатә сери, йа кӧ дьбежә: «Әԝ тʼәви зӧлмкʼара һатә һʼәсабе».

²⁹ У әԝед кӧ ԝьррʼа дьчун-дьһатьн, әԝ беһӧрмәт дькьрьн, сәре хԝә дьһʼәжандьн у дьготьне: «Һейи! Нә Тәйе пʼарьстгәһ һьлшанда у се рʼожада чекьра,

³⁰ дә Хԝә хьлаз кә, жь хач ԝәрә хԝаре!»

³¹ Ӧса жи сәрәкед кʼаһина тʼәви ԛанунзана нав хԝәда ԛәрфе хԝә ле дькьрьн у дьготьн: «Хәлԛ хьлаз кьр, ле Хԝә нькарә хьлаз кә!

³² Дә бьра ньһа Мәсиһ, Пʼадше Исраеле жь хаче бе хԝаре, ԝәки әм бьбиньн у баԝәр бькьн». Йед тʼәви Ԝи һатьбунә хачкьрьне жи тәʼн ль Ԝи дьхьстьн.

Мьрьна Иса

³³ Нивро жь сьһʼәта донздәһа һʼәта сьһʼәта сьсийа, тʼәмамийа әʼрде бу тәʼри.

³⁴ У сьһʼәта сьсийа Иса бь дәнгәки бьльнд кьрә ԛирʼин у гот: «Елойи, Елойи, лама сабахтани?» кӧ те фәʼмкьрьне: «Хԝәдейе Мьн, Хԝәдейе Мьн, Тә чьма Әз һьштьм?»

³⁵ Әԝе кӧ незик сәкьнибун, гава әв хәбәр бьһистьн, готьн: «Бьньһерʼьн, Әԝ гази Елйас дькә».

³⁶ Жь ԝан йәк бәзи, луфька бәʼре һьлда сьркеда кьр, ԛамишәкива дани у дьрежи Ԝи кьр, кӧ вәхԝә у гот: «Бьсәкьньн. Әм бьбиньн кʼа Елйасе бе Ԝи бинә хԝаре».

³⁷ Иса бь дәнгәки бьльнд кьрә ԛирʼин у рʼӧһʼе Хԝә да.

³⁸ Ԝи чахи пʼәрʼда пʼарьстгәһе жь сери һʼәта бьни ԛәльши, бу дӧ тиша.

³⁹ Сәрсәде кӧ ль пешбәри Иса сәкьни бу, гава дит кӧ Иса чаԝа рʼӧһʼе Хԝә да, гот: «Рʼасти жи әва Мәрьва Кӧрʼе Хԝәде бу!»

⁴⁰ Ль ԝе дәре кʼӧлфәт жи һәбун, кӧ дурва ль ве йәке дьньһерʼин. Мәрйәма Мәждәлани, Мәрйәма дийа һәр дӧ бьра, Аԛубе бьчʼук у Йусес у ӧса жи Сәлома нав ԝанда бун.

⁴¹ Әвана һьнге, гава Иса ль Щәлиле бу, пәй Ԝи дьчун у жерʼа хьзмәткʼари дькьрьн. Пештьри ван, гәләк кʼӧлфәтед дьн жи ԝьр һәбун, кӧ тʼәви Иса һатьбунә Оршәлиме.

Дәфьнкьрьна Иса

⁴² Әв йәк рʼожа тʼьвдарәккьрьне бу, аԝа готи рʼожа бәри шәмийе. Бәре еваре

⁴³ Усьве Аримәтйайи һат, әԝ йәки хԝәйиԛәдьр у әндәме щьвина гьрәгьра бу. Әԝ хԝәха жи ль һивийа Пʼадшатийа Хԝәде бу. Ԝи тӧрӧш кьр, чу щәм Пилато, щьнйазе Иса же хԝәст.

⁴⁴ Пилато бьһист кӧ Иса иди мьрийә, әʼщебмайи ма. Гази сәрсәд кьр у же пьрси: «Рʼаст ә кӧ Әԝ ӧса зу мьрийә?»

⁴⁵ Гава әԝ жь сәрсәд әʼсәйи пе һʼәсийа, щьнйаз да Усьв.

⁴⁶ Ԝи ԛәдәке кʼьтани кʼьрʼи, щьнйаз ани хԝаре, пе кʼәфән кьр, тʼьрбәкеда дани, йа кӧ ԛәйеда кʼолайи бу. Кәвьрәк һол кьрә бәр дәре тʼьрбе.

⁴⁷ Мәрйәма Мәждәлани у Мәрйәма дийа Йусес дитьн кӧ әԝ ль кʼӧ дәре һатә дәфьнкьрьне.