Lûqa 9 - Пәймана Ну (Инщил)

Шандьна һәр донздәһа

¹ Иса гази һәр донздәһ шагьртед Хԝә кьр, ԛәԝат у һʼӧкӧм да ԝан, кӧ һʼәму щьна дәрхьн у жь нәхԝәшийа ԛәнщ кьн.

² Әԝ шандьн, кӧ Пʼадшатийа Хԝәде даннасин кьн у нәхԝәша ԛәнщ кьн

³ у ԝанарʼа гот: «Бона рʼе тьштәки һьлнәдьн, нә шьвдар, нә турьк, нә нан, нә пʼәрә, нә жи дӧ дәст кьрас.

⁴ Чь мала кӧ һун һәрʼьне, ԝьр бьминьн у жь ԝьр рʼекʼәвьн.

⁵ У әԝ дәра кӧ ԝә ԛәбул нәкьн, гава жь ԝи бажари дәртен, тʼоза ньгед хԝә даԝшиньн, ԝәки ԝанарʼа бьбә шәʼдәти».

⁶ У шагьрт рʼабун, гӧнд-гӧнд гәрʼийан у һәр дәра Мьзгини дан, нәхԝәш ԛәнщ кьрьн.

Шашийа Һеродәс

⁷ Аԝа Һеродәсе сәрԝер бона һʼәму кьрьнед Иса бьһист у тʼәвиһәв бу, чьмки һьнәка дьгот: «Әва Йуһʼәнна йә, жь нав мьрийа рʼабуйә»

⁸ у һьнәка жи дьгот: «Елйас ә кʼьфш буйә» у һьнәкед майин жи дьготьн: «Әва йәк жь пʼехәмбәред бәре йә сах буйә».

⁹ Һеродәс гот: «Мьн сәре Йуһʼәнна да лехьстьне, ле Әва кʼи йә кӧ әз дәрһәԛа Ԝида ван тьшта дьбьһем?» У ԝи дьхԝәст Иса бьдита.

Иса пенщ һʼәзара тʼер дькә

¹⁰ Гава шанди вәгәрʼийан, чь кӧ ԝан кьрьбу Исарʼа гьли кьрьн. Әԝи тʼәне шандийед Хԝә тʼәви Хԝә һьлдан у чунә бәрбь бажаре Бәйтсайдайе.

¹¹ Гава әʼлаләт пе һʼәсийа, пәй Ԝи чу. Иса әԝ ԛәбул кьрьн у тʼәви ԝан бона Пʼадшатийа Хԝәде хәбәр дьда у әԝед кӧ һʼәԝще ԛәнщбуне бун ԛәнщ кьрьн.

¹² Бәре еваре һәр донздәһ һатьнә щәм Ԝи у жерʼа готьн: «Әʼлаләте бәрʼдә, кӧ һәрʼьн гӧнд у бәргед дор-бәра щи-ԝар бьн у хԝәрʼа хӧрәк дәст хьн, чьмки әм ль щики хьки-хԝәли нә».

¹³ Ле Иса ԝанрʼа гот: «Һун хӧрәк бьдьнә ԝан». Ԝана жи ле вәгәрʼанд у готьн: «Пештьри пенщ нан у дӧ мәʼсийа ԝәки майин тьштәки мә тʼӧнә, һәгәр әм нәчьн тʼәмамийа щьмәʼтерʼа хӧрәк нәкʼьрʼьн?»

¹⁴ Чьмки ԝәкә пенщ һʼәзар мери бун. Әԝи шагьртед Хԝәрʼа гот: «Щьмәʼте пенщи-пенщи бьдьнә рʼуньштандьне».

¹⁵ У ӧса кьрьн, һʼәму жи данә рʼуньштандьне.

¹⁶ Әԝи әԝ пенщ нан у һәр дӧ мәʼси һьлдан, бәре Хԝә әʼзменда кьр шькьри да, кәркьр у да шагьрта, кӧ бәлайи әʼлаләте кьн.

¹⁷ Һʼәмуйа жи хԝар тʼер бун у донздәһ сәлә жи һурькед бәрмайи бәрәв кьрьн.

Пәтрус шәʼдәтийе ль сәр Иса дьдә

¹⁸ Щарәке Иса бь тʼәне тʼәви шагьртед Хԝә дӧа дькьр, жь ԝан пьрси: «Бь тʼәхмина щьмәʼте Әз кʼи мә?»

¹⁹ Ԝана ле вәгәрʼанд у готьн: «Һьнәк дьбежьн ‹Йуһʼәннайе ньхӧмдар ә›, һьнәкед дьн дьбежьн ‹Елйас ә›, һьнәкед майин жи дьбежьн ‹йәк жь пʼехәмбәред бәре йә сах буйә›».

²⁰ Әԝи жь ԝан пьрси: «Ле һун чь дьбежьн? Бь тʼәхмина ԝә Әз кʼи мә?» Пәтрус ле вәгәрʼанд у гот: «Тӧ Мәсиһе Хԝәде йи».

Иса дәрһәԛа щәфа у мьрьна Хԝәда дьбежә

²¹ Һьнге Иса һʼьшк тʼәми да ԝан, кӧ ԝе йәке кәсирʼа нәбежьн.

²² У әԝи гот: «Кӧрʼе Мерьв гәрәке гәләки щәфа бькʼьшинә, жь алийе рʼуспийа, сәрәкед кʼаһина у ԛанунзанада бе тʼәхсиркьрьн у кӧштьне, ле рʼожа сьсийа ԝе жь мьрьне рʼабә».

Хаче хԝә һьлдә у ль пәй мьн ԝәрә

²³ У Иса һʼәмуйарʼа гот: «Һәгәр йәк дьхԝазә ль пәй Мьн бе, бьра хԝә инкʼар кә у һәр рʼож хаче хԝә һьлдә у ль пәй Мьн бе.

²⁴ Чьмки кʼи кӧ дьхԝазә әʼмьре хԝә хьлаз кә, әԝе ӧнда кә у кʼи кӧ әʼмьре хԝә бона Мьн ӧнда кә, әԝе хьлаз кә.

²⁵ Чь фәйдә, һәгәр мәрьв тʼәмамийа дьнйайе ԛазьнщ кә, ле әʼмьре хԝә ӧнда кә йан зьраре хә?

²⁶ У кʼи Мьн у хәбәред Мьн шәрм һʼәсаб кә, Кӧрʼе Мерьв жи ԝе ԝи шәрм һʼәсаб кә, гава Әԝ бь рʼумәта Хԝә, рʼумәта Баве у мьлйакʼәтед пирозва бе.

²⁷ Әз рʼаст ԝәрʼа дьбежьм, һьнәкед ль вьр сәкьни ԝе мьрьне нәбиньн, һʼәта кӧ Пʼадшатийа Хԝәде бьбиньн».

Шагьрт Иса нава нур у рʼумәтеда дьбиньн

²⁸ Пәй ве хәбәрданерʼа ԝәкә һʼәфтеке шунда, Иса Пәтрус, Йуһʼәнна у Аԛуб һьлдан чунә сәре чʼийе кӧ дӧа бькьн.

²⁹ Гава Иса дӧа дькьр, рʼәнге рʼуйе Ԝи һатә гӧһастьне, кʼьнщед Ԝи чил-ԛәрԛаш бун, бьрьԛин.

³⁰ У ва дӧ мәрьва тʼәви Ԝи хәбәр дьдан, йәк Муса бу, йәк жи Елйас.

³¹ Әԝана бь рʼумәт кʼьфш бун у бона мьрьна Ԝи хәбәр дьдан, кӧ Оршәлимеда ԝе бьбуйа.

³² Чʼәʼвед Пәтрус у әԝед тʼәви ԝи жь хәԝе гьран бьбун, ле гава һʼьшйар бун, рʼумәта Ԝи у һәр дӧ мәрьвед щәм Ԝи сәкьни дитьн.

³³ Чахе әԝана жь Ԝи дур кʼәтьн, Пәтрус Исарʼа гот: «Мамоста, чаԝа рʼьнд ә кӧ әм вьр ьн! Дә әме се һʼолька чекьн, йәке Тәрʼа, йәке Мусарʼа у йәке жи Елйасрʼа». Чьмки әԝи ньзаньбу әԝ чь дьбежә.

³⁴ Гава әԝи һе хәбәр дьда, әʼԝрәк һат у сәр ԝан кьрә си. У чахе кʼәтьнә бьн ԝи әʼԝри, әԝана тьрсийан.

³⁵ У жь ԝи әʼԝри дәнгәк һат у гот: «Әв ә Кӧрʼе Мьн, Бьжартийе Мьн! Гӧһдарийа Ԝи бькьн!»

³⁶ Гава әԝ дәнг һат, Иса тʼәне ма. У ԝана дәнге хԝә бьрʼи, ԝан рʼожада чь кӧ дитьбун кәсирʼа нәготьн.

Иса кӧрʼькәки щьнакʼәти ԛәнщ дькә

³⁷ Рʼожа дьне, гава әԝана жь чʼийе һатьнә хԝаре, әʼлаләтәкә гьран пешийа Ԝида һат.

³⁸ Һьнге жь нав әʼлаләте мәрьвәки гази кьр у гот: «Дәрсдар, әз һиви жь Тә дькьм, бь чʼәʼве рʼәʼме ль кӧрʼе мьн бьньһерʼә. Әԝ тайе мьни тʼәне йә.

³⁹ Рʼӧһʼәки хьраб ԝи дьгьрә у ньшкева дькә ԛирʼин вәдьчʼьрʼькә, кʼәф сәр дькʼәвә һурдәхԝәши дьбә у бь зорәке жь ԝи дур дькʼәвә.

⁴⁰ Мьн лава жь шагьртед Тә кьр, кӧ щьн же дәрхьн, ле ԝана нькарьбу».

⁴¹ Иса гот: «Ньсьле нәбаԝәр у хальфи! Һʼәта кʼәнге Әзе тʼәви ԝә бьм у ль ԝә сәбьр кьм? Кӧрʼе хԝә бинә вьр».

⁴² Гава һе дьһат, щьн әԝ әʼрде хьст у вәчʼьрʼьки. Иса ль рʼӧһʼе һʼәрам һьлат, кӧрʼьк ԛәнщ кьр у да баве ԝи.

⁴³ Тʼәмамийа щьмәʼте сәр мәзьнайийа Хԝәде зәндәгьрти мабу. У чахе һʼәму сәр һәр тьштед кӧ Иса дькьрьн әʼщебмайи мабун, Әԝи шагьртед Хԝәрʼа гот:

Иса диса дәрһәԛа мьрьна Хԝәда дьбежә

⁴⁴ «Һун ван хәбәра бира хԝәда хԝәй кьн: Кӧрʼе Мерьв ԝе бькʼәвә дәсте мәрьва».

⁴⁵ Ле ԝана әв йәк фәʼм нәкьр, чьмки әв жь ԝан вәшарти бу кӧ фәʼм нәкьн у тӧрӧш нәдькьрьн жи бона ԝе йәке жь Ԝи бьпьрсийана.

Кʼи йә йе һәри мәзьн?

⁴⁶ Нав шагьртада пьрс пешда һат, кӧ нава ԝанда кʼи йә йе һәри мәзьн.

⁴⁷ Ле нетед дьле ԝан Исава әʼйан бун, зарʼокәк ани щәм Хԝә да сәкьнандьне

⁴⁸ у ԝанрʼа гот: «Кʼи кӧ әве зарʼоке бь наве Мьн ԛәбул кә, әԝ Мьн ԛәбул дькә. У кʼи кӧ Мьн ԛәбул кә, Йе кӧ Әз шандьмә ԛәбул дькә. Аԝа әԝи нава ԝә һʼәмуйада йе һәри бьчʼук ә, әԝ ә йе һәри мәзьн».

Йе нә мьԛабьли ԝә йә, әԝ алийе ԝә йә

⁴⁹ Йуһʼәнна рʼабу у гот: «Мамоста, мә мәрьвәк дит кӧ бь наве Тә щьн дәрдьхьстьн, ле мә кьр кӧ әм нәһельн, чьмки әԝ пәй мә найе».

⁵⁰ Ле Иса ԝирʼа гот: «Пешийе ль ԝи нәгьрьн, чьмки әԝе кӧ нә мьԛабьли ԝә йә, әԝ пьшта ԝә йә».

Гӧндәки самәрийа Иса ԛәбул накә

⁵¹ У чахе әԝ рʼожед кӧ Исайе бьһата һьлдане незик бун, Әԝи бәре Хԝә да Оршәлиме, кӧ һәрʼә ԝьр.

⁵² У пешийа Хԝә мәри шандьн, әԝана чунә гӧндәки Самәрйайе кӧ бона Ԝи һазьрийе бьбиньн.

⁵³ Ле самәрийа Әԝ ль ԝьр ԛәбул нәкьр, чьмки бәре Ԝи кʼәтьбу Оршәлиме.

⁵⁴ Гава шагьртед Ԝи Аԛуб у Йуһʼәнна әв йәк дит, готьн: «Хӧдан, Тӧ дьхԝази әм жь әʼзмен агьр бьхԝазьн кӧ бьбарә у ԛьрʼа ван бинә?»

⁵⁵ Ле Әԝ вәгәрʼийа, ль ԝан һьлат.

⁵⁶ У чунә гӧндәки дьн.

Щабдарийа йед кӧ пәй Иса дьчьн

⁵⁷ У чахе әԝана рʼеда бун, йәки Ԝирʼа гот: «Тӧ кʼӧда жи һәрʼи әзе пәй Тә бем».

⁵⁸ Иса готә ԝи: «Рʼувийарʼа ԛӧл һәнә, тәйрәдед әʼзменрʼа жи һелин, ле бона Кӧрʼе Мерьв щик тʼӧнә кӧ сәре Хԝә ле дайнә».

⁵⁹ Иса йәки дьнрʼа гот: «Пәй мьн ԝәрә». Әԝи жи гот: «Хӧдан! Изьне бьдә мьн, кӧ әз пешийе һәрʼьм баве хԝә дәфьн кьм».

⁶⁰ Ле Иса ԝирʼа гот: «Бьра мьри мьрийе хԝә дәфьн кьн. Тӧ һәрʼә Пʼадшатийа Хԝәде даннасин кә».

⁶¹ Йәки дьн жи гот: «Әзе пәй тә бем Хӧдан, ле тʼәне изьне бьдә мьн, кӧ әз пешийе хатьре хԝә жь нәфәред мала хԝә бьхԝазьм».

⁶² Иса гот: «Кʼи кӧ дәсте хԝә датинә сәр кʼотане у ль пьшт хԝәва дьньһерʼә, әԝ нә һежайи Пʼадшатийа Хԝәде йә».